Mat 15 | TpjSC | STEP | Haivi ñymboja Jesús ẽvãpe fariseo hareka Moisés mbypara vekua pyrỹmboi’iheare, ouva Jerusalenvi, haire pỹrandushu:

Matthew 15

Mbai ñanymyngyava

1 Haivi ñymboja Jesús ẽvãpe fariseo hareka Moisés mbypara vekua pyrỹmboi’iheare, ouva Jerusalenvi, haire pỹrandushu: 2 Marã’ĩrãra rỹmboivare japoã hekope kuakuavare pyrỹmboiva rãĩmi? Jypoiã reta karu verã, japohasea rãĩmi! 3 Jesús heishu reta: Marã’ĩrãra hekope kaviã pijapo ñee japoa verã Tũpa heiva, pipykuava rãĩmi pijapopirãme? 4 Tũpa rãnga hei: “Emombaishu nderu hareka ndesy, shara jaheheva tuu hareka ishy, jukahañoĩpo”. 5 Peeny perekuei mbava katu heishuva tuu hareka ishy: “Katuany arỹmbory, shara opaiteva ĩme’areare opama ameẽ Tũpape”. 6 Ĩme’ẽ kyrãĩ heivarã, katuveama mbory tuu hareka ishy. Kyrã pimbijiche Tũpa heiva pijapo verã pipykuava rãĩmi. 7 Hova mokue’iare! Heikavi pyndyrehe Tũpa ĩñee mbeu’ia Isaias, heirã: 8 Kova kuaretare jurupẽi shemombai jyre, tẽvã pyare mbyry’ẽ shyhevi. 9 Hãrã reii shemombai rã’ãnga reta, shara haire kuimbaire hei vekuaĩ pyrỹmboi jyrehe. 10 Haivi Jesús hẽnoshu kuaretare hãrã heishu: Pyhendu, hareka pikuakavi verã. 11 Kuaretare juruipi icheva myngy’ããshu, juruivi õhẽvãĩ myngyashu ñee porãmba vekua. 12 Haipe mboireare ñymbojaherã heishu reta: Rikuara fariseore pya’ohoãhe hendu rereva rãĩmi? 13 Jesús heishu reta: Opaite yvyra Sheru ñotỹmba po’oapokui hapoivive. 14 Pyma’ẽihe hai reta rãnga heshamba kũvãipiare, ĩrũ heshamba kũvaipiare raharea. Hãrã pente heshamba kũvãĩpia rahare ĩrũ heshamba kũvaipiarã, mokue ryheveãrapo oa yvykuape. 15 Haipe Pedro heishu: Mbeu kavivejy ore mbaivara he’ise ko ñee ñymyhã’ãnga. 16 Jesús heishu reta: Peeavera pikuã teri kova? 17 Pikuããra opa mbai icheva ñandijuruipi oho ñandyretepy, haivi õhẽjy ñandyreteivi? 18 Ñandijuruivi õhẽva ñandypyaivive, hai hoka ñanymyngyava. 19 Ñandypya ñambijeta rupii õhẽ mbai porãmba, ijukava, javasa’ia, kyrãĩrãĩ’iare, manarõ, japuva, ijetareiva hapishare hareka jahehea. 20 Kova hai ñanymyngyava, tẽvã jaipohemba jakaru verã japohasea rãĩmi, mbavããpo myngyã.

Taupe haimba Judiova jyrojahe Jesús

21 Jesús ohẽ haivirã oho tenta Tiro hareka Sidon kyty. 22 Pente taupe Canaanpe’ia, ñymboja Jesús ẽvãperã sapuke: Sheja, David tay, shyparekomĩteño! Shymemby taupe ĩme’ẽ mbaiposhy ĩmere, hareka mbypaveteitereshu. 23 Tẽvã Jesús mba’ẽã heishu. Haipe mboireare ñymbojaherã heishu: Mondojy shara sapuke ou ñandaykue. 24 Haipe Jesús hei: Tũpa rãnga shymboushu Israelvare avisha rãĩmi kañyva heka verãi. 25 Haipe taupe ñymbojahe, ĩñesu hỹnonderã heishu: Sheja shymborymitẽño. 26 Jesús heishu: Porãã rãnga jahekyshi sanjay houva ñameẽshu verã ñaũmbare. 27 Ko taupe heishu: Ãñeteĩte rereva Sheja. Kyrãtẽvã, ñaũmba ho’uĩpojy timbiu ijare ñymesaivi oava. 28 Jesús heishu: Nde hai taupe tivisha rirojava! Tiko nde ripotava rãĩmi. Haiperaveĩ memby taupe kuera.

Jesús heta mynguera ñymbairasyva

29 Jesús õhẽ haivirã, hasa Galileape yyvasu hymbeypi. Jupi pente yvy vate’õrerã haipe vapy. 30 Heta hai ẽvãpe ouva, raha reta japava, heshamba kũvãipia, vatambaa, ña’ẽnguva hareka ñymbairasy vekuare. Ñono reta Jesús hỹnonderã mynguerashu reta. 31 Opavare mbyrymaĩ hesha mãrãra ña’enguvare ijetajy, japava vatajy kavi hareka heshajymba heshajy kũvaãĩpi, õñepyrõ õmombaishu reta Tũpa Israel Ija.

Jesús myngaru 4.000 kuimbaire

32 Jesús hẽnoshu mboirea retarã heishu: Aparekony ko kuaretare, mbahapy arama japo ẽẽ ai hãndiare, hãrã mba’ety maĩnunga hou verãre. Potã ñymbahy ryheve amondojyshu reta hentape, mãhẽ pehupi mamano jyrekui. 33 Hãrã mboireare heishu: Mãĩvirapo ñavãhẽshu maĩnunga ñamyngarupy verã ko kuaretare, mba’ety rãnga ikova koipi?

34 Jesús pyrãndushu reta: Mbovy pãhãra ĩmepyre? Haire heishu: 7 pãhã hareka mbovy pira. 35 Haipe Jesús opava retape mbyvapyka yvype, 36 hãrã heky 7 pãhã hareka pira, jurure Tũpa ohovasa verã. Haivi pysẽã meẽ mboirea retape, haire memẽeshu opavape. 37 Opa karu hareka hỹvãnta reta, haivi 7 kanãta mãrẽyva mỹñyhejy hemby vekuaivi. 38 Haipe karuva reta rãnga 4.000 kuimbaire, papahamba ryheve taupe hareka sanjay reta. 39 Haipe Jesús opa jy mondo reta hentape, jupi kanoaperã oho tenta Magadan kyty.