Mat 16 | TpjSC | STEP | Fariseo hareka saduceore oho Jesús’õpe, pyahãshu verã jurureshu reta mbai heshahava vate araivi ouva. Kyrãra hai heshakapo pyrãtãkue.

Matthew 16

Fariseo hareka Saduseore pota hesha mbai heshahamba

1 Fariseo hareka saduceore oho Jesús’õpe, pyahãshu verã jurureshu reta mbai heshahava vate araivi ouva. Kyrãra hai heshakapo pyrãtãkue. 2 Jesús heishu reta: Kuarasy icherã pere: “Ara haikavipo’ẽ shara ara pynta jykuaa”. 3 Parejyrã pere: “Yvytu porãpo ou, shara ara pyntavasĩ hareka opa ñy‘ãvãpyntu’ẽ”. Pee rãnga pikuaa mbaivara ikopo arare pymãirã. Pyrỹmbytavyĩ’iare, marãira pikuãã mbaivara he’ise kova mbai heshahava? 4 Tykove ñarõva Tũpa haihumba hareka ñee hendumbare jurure mbai heshaha verã ara vateivi ouva. Mẽ’ẽhãposhu mbai heshaha verã ara vateivi ouva, koñeĩ heshahakapo pee Tũpa ĩñee mbeu’ia Jonas ikohea rãĩmi. Haipe hejashu retarã oho.

Fariseore jylevadura

5 Mboireare vãhe yy hyvaisho kytyrã, haipe manduahe reta sareheare pãhã hou verãrẽ. 6 Jesús heishu reta: Pingareko katu fariseo hareka saduceore pyrỹmbytavyĩ’iare jylevaduraivi. 7 Tẽvã mboireare hei ijupe reta: Hoka rãnga hei’i shara jaruã pãhã. 8 Jesús kuaa mbaivara hei ñynoĩ, hãrã heishu: Marã’irãra perepi mba’ety pyrea pãhã? Piroja ãintemba shyrehe. 9 Pymandu’ãrahe ambijaorã vekua 5 pãhã 5.000 kuimbai retape? Mbovy kanatara pymynyhẽjy hemby vekuaivi? 10 Pymandu’ãrahe hoka 7 pãhã ambijaorã vekua 4.000 kuimbai retape? Mbovy kanãta mãrẽyvara pymynyhẽjy hokavaivi? 11 Mãrãira pikuakavi raniã aijetamba ãiheva pãhãre? She rãnga hai pee kuri, pingareko verã fariseo hareka saduceore jylevaduraivi. 12 Haiperãã kuaakavi reta Jesús ijetããheshu harina mby’ouapya, koñeĩ ijetaheshu fariseo hareka saduceore pyrỹmboiva rãĩmi.

Pedro hei Jesús haiva Tũpa Tay

13 Jesús oho tenta Cesarea Filipope, haipe õi terirã mboireare pyrãndushu reta: Mbaivara kuaretare hei shyrehe, kuareta Tay? 14 Haire heishu: Ĩme’ẽ heiva Juan Bautista, ynga hei Elías hareka ĩme’ẽjy heiva nde hai Jeremias maĩrã arykaiva pente Tũpa ĩñee mbeu’ia. 15 Jesús pyrãndushu reta: Peera mbaiva pere, mbavara she? 16 Simón Pedro heishu: Nde hai Cristo, Tũpa tay hykove’ia. 17 Jesús heishu: Ryvy’apo nde Simón, Juan tay, shara mba’ety kuaaka ndeva so’o hareka tuvy, koñeĩ Sheru vate arapy’õ kuaaka nde. 18 Hãrã haijyve, nde hai Pedro. Ko ita ĩãrẽpo amupũã shyrehe jyrojavare, hareka ñymano katuãpo jepyãpohe. 19 Ameẽpo nde huvisha vasu vate arapy’õ, oo pe’ahapyare. Opa rĩñapĩntiva ko yvy’ĩãrẽ, ñapĩntihapo jyve vate arapy, hãrã rijorava ko yvy’ĩãrẽ, jorahapo jyve vate arapy. 20 Hãrã Jesús hei kavijyshu mboireare potambaa mbavape mbeu verã haiva Jesús, Cristo he’iashua.

Jesús mbeu mano verã

21 Hokava araivive Jesús mbeushu mboireare hai oho verã Jerusalenpe, hareka haipe mbyhasa asypo kuakuavare, pai ruvishare, hareka Moisés mbypara vekua pyrỹmboi’iheare ipope. Jesús heishu reta: She ãmanopokui tẽvã mbahapy arapepo shyrykovejy. 22 Haipe Pedro rahashu Jesús hã’ẽĩ õpe, ñyngãtashurã heishu: Katuã rãngapo, Sheja! Katuã rãngapo kyrã iko ndyrehe! 23 Jesús jerepyrã heishu Pedro: Syry shyhevi Satanas! Nde pota shocharẽĩ. Ndypya rĩñanduva ha’ẽã Tũpaivi ouva, koñeĩ kuaretare ñanduva rãĩmi rĩñandu kova mbai.

24 Haivi Jesús heishu mboireare: Ĩme’ẽ pota shimi’ĩrũvarã tiñymbysare ijuhuvi, tuhupi jukurusu kupere, hãrã tou shimi’ĩrũ. 25 Shara hykove pota mondojepeva, õñehundipo; katynga shyreepe manova, iko pukupokui. 26 Mbaivara me’ẽãpojyshu kuareta ko yvy’ĩãrẽ ĩmereva, hykove mba’etymarã? Mba’etyva! Mbaivara kuareta meẽpo kuerajy verã? Mba’etyva. 27 Shara kuareta Tay, oujypokui Tuu hĩmbipekue ryheve hareka jokuevare hãndi. Haipe Tũpa meẽposhu pepenteĩ japo vekuare jurureva rãĩmi. 28 Ãñete hai pee kopepeĩva, manoãteripokui, heshapeve ko kuareta Tay Mburuvisha vasurã.