Matthew 18

Mbavara hai mbaivasuveva

1Haivi, Jesús mboireare ñymboja ẽvãperã pyrãndushu: Mbavara hai vateveva huvisha vasu vate arapy’õpe? 2Haivi hẽno pente sanjaymi ñono mbyteperã, 3hei: Ãñete hai pee, piko vekua rãĩmi pyhejããrã hareka pikoã sanjay rãĩmirã picheãpo huvisha vasu vate arapy’õ ẽvãpe. 4Ko sanjay rãĩmi ñimimishĩva, hokavapo mbai vasuve huvisha vasu vate arapy’õpe. 5Ĩme’ẽ kuareta shyreepe myvãheva ko sanjay rãĩmi, shee shymyvãhe.

Mbai porambape katu ñandirityva ryheva

6Ĩme’ẽ mbai porãmba japokashua kova sanjay rãĩmi jyroja shyreheva, haikavivepo jajure ñapitĩha pente jytaky vasu momboha yyvasupe. 7Ko yvy’ĩãrẽ mbai porãmbape pirirityva, japoãã Tũpa heiva. Shara ẽẽñoĩpo mbai porãmbava, tẽvã tengapokui kuareta mbai porãmba pirĩmbijapokava. 8Hãrã ndepo hareka ndepy ndyrahapo porãmba kytyrã, jasyja hareka mombo mbyry, haikavivepo riche tykove ryheve, ndepy hareka ndepo hãndi, mãhẽ nymombohakui tatavasu opambape ndepy hareka ndepo mokue ryheve. 9Hãma ndyresa hai ndyraha’i mbai porãmba kytyrã, heky hareka mombo mbyry; haikavivepo nde riche tykove opambape pente ndyresa ryheve, mãhẽ nymombohakui mokue ndyresa ryheve tata vasupe.

Pente avisha kañyva

10Avy pijahehe sanjay rãĩmi jyroja shyryheva. Haipe Tũpa jokuevare haire ĩme’ẽ Ñanderu hỹnonde hareka hesha reta hova. 11She Kuareta tay rãĩmi aiva ko yvy’ĩãrẽ, ai ãnohẽ opavape mbai porãmbape jeky verã. 12Mãrãra pereshu? Pente kuareta ĩmere 100 avisharã, kañyshi pentevarã, hejarapo 99 õ yvyturusu kyty ĩrũre hãrã oho hekajy pente kañyshia? 13Vãhẽjymashurã, ãñete hai pya horyitevepo hoka avishare haipe 99 õre kañymbarã. 14Kyrã jyve Peru vate arapy’õ potãã mbava kañy ko sanjay ndeiveva rãĩmi jyrojava.

Marãrapo jahejareishi mbai porãmba ñandapisha

15Ndapisha japo ndyrehe porãmbarã, ijeta hãndi hã’ẽĩvape hãrã mbeu kavishu mbai porãmba japo vekua. Nyrẽndurãpo rẽi kavijy hãndi ndapisha. 16Hãrã nyrẽndusearã katu rỹhẽno pente o mokue hendu verã, katu mapo “opaite he’iava ñonoã kavipo, mokue hareka mbahapy’õ hyvache”, heiva rãĩmi Tũpa ĩñee. 17Hãma potã hendushu retarã, mbeu tũpaope, hãrã hẽnduseãjy tũpaoperã tẽvãra, pijaposhu haimba pyndyryhevava kyrypoti mbatyse’iare Roma pevarã rãĩmi. 18Añeteva hai pee, pee piñapintiva ko yvy’ĩãrẽ, ñapintiãpo jyve vate arapy, hareka pee pijora ko yvy’ĩãrẽva jorahapo jyve vate arapy. 19She hai jyve pee, mõkue peeva piñiñono pente ñeepe ko yvy’ĩãrẽ, pee pota pirureva ñymboipe, Sheru arapy’õva ẽvãpe meẽpope. 20Hãma mokue, maĩrã mbahapy shyreepe ñymbatyva, she haipe ãĩ hãndi reta. 21Hãrã Pedro ñymboja Jesús ẽvãpe heishu: Sheja, mbovyjyrapo ahejareiishi shapisha, porãmba japo shyreheva? 7 jyrapo? 22Jesús heishu: Ha’eande 7 jy peveĩ verã, katynga 70 kavi’õ 7 jypeve rãnga.

Mbai porãmba hapishaivi hejasembava

23Hãrã huvisha vasu vate arapy’õ, ova jyve huvisha vasu pyrãndushu vekua jokuehareirea japovare. 24Hãma õñepyrõ japo hoka verua hỹnonde pente hetaiteve oreveshuape. 25Mba’etyre mainũnga meẽ verã, ko kuareta hei õvendeha verã pyrokue’ia, jokuehareiire verã hyreko hareka tayre hãma opa ĩmerea ryheve, opa mbyhepy verã oreve vekua. 26Haivi ko jokuehareirea ĩñesu hỹnonde, jurure asyshurã hei: “Karai, shy’ãrõminte hãrã opapo ameẽjyndekui”. 27Hãma ko pyrokue’ia parekoiteshu jokuereirearã hejareiishi oreveshu vekua hãrã mã’ẽihe ohojy. 28Hãma õhẽjy oho hoka jokuehareirea hỹvãitijy ñi’irũ oreveshua 100 nikere, kũavãshu jaseoipirã hãrã puntue mbijapyshirã heishu: “Mẽ’ẽjyshe rereveshea”. 29Haipe jokuehareirea ĩñesu hapisha hỹnonde jurure’asyshurã hei: “Shy’ãrõ rãniani hãmepo opa ambyhepyjy ndekui”. 30Katynga, hai hãrõseã mbashua hãma mondo mbyperesoka opajy mẽepeveshu orevehe vekua. 31Hesha hoka ynga jokuehareirea mbyvy’ãã reta hãrã oho hoka ija õpe opa mbeushu reta ikova. 32Haipema pyrokue’ia hẽnoka jokuehareirearã heishu: Nde jokuehareirea heko porãmbava! She ahejareiite ndyhevije rereveshe vekua, shara rirure’asy reisheje. 33Hãma nde ryparekotẽ verã jyve ndapisha, she aryparekova rãĩmi. 34Hãma poshyite’i ko pyrokue’iarã raha mbyperesoka opa mbyhepyjypeve oreveva. 35Hãrã Jesús hei: Kyrã jyve Sheru arapy’õ japopo pyndyrehe pepenteĩ, pãtẽỹ pyhejareiishi pyndypyaivive papisharã.