Mat 21 | TpjSC | STEP | Jesús hareka mboireare hãndi vãhẽserima jyraha Jerusalenperã, vãhẽ tenta Betfage yvy olivo heta’õpe. Haivi Jesús mondo mokue mboireare hỹnonderã.

Matthew 21

Jesús iche Jerusalénpe

1 Jesús hareka mboireare hãndi vãhẽserima jyraha Jerusalenperã, vãhẽ tenta Betfage yvy olivo heta’õpe. Haivi Jesús mondo mokue mboireare hỹnonderã. 2 Heishu reta: Pekua hareka pyvãhẽ tenta ñanynonde’õpe, haipepo pyhesha pente mbirika ñapintĩãva memby hãndi. Pijora hareka perushe. 3 Ĩme’ẽ potamba perushiarã pereshukui: “Yreja rãnga pota’ẽ, areãndapo verukajyndekui”. 4 Kyrã jehu iko verã hekope kavi Tũpa ĩñee mbeu’ia hei vekua rãĩmi: 5 Pereshu Sionpe’õre: “Pymaĩhe, kõõ ou punduruvishavasu mbirikare, mbirikamire, jyrojamba ijeheva”. 6 Haivi mboireare oho japo Jesús heishua rãĩmi. 7 Hãrã rahashu reta Jesús, mbirika memby hãndi hareka haire ñonohẽ reta mondevarã, Jesús jupihe. 8 Hãrã kuaretare mbipyso mondevare haperãpe, ĩme’ẽjy jasyjava yvyra hãkarã ñono rahava pehupi. ^{▼▼Arykai kyrãĩ japoha mburuvisha vasu iche tentaperã.} 9 Hãrã kuaretare tynonde hareka taykue ohovare õñepyrõ sapukerã hei: Tũpa ohovasa mburuvisha vasu David Tay! Toñemombai Ñandeja heepe ouva! Toñemombai Tũpa! 10 Vãhẽma oho Jesús Jerusalenperã, opa ikorai retarã hei reta: Mbavarajy kova? 11 Hãrã Jesús oho hãndiare hei: Ko rãnga hai Tũpa ĩñee mbeu’ia Jesús, tenta Nazaretvi ouva, Galileape’õ.

Jesús mõhẽ tũpaovi haipe mãvende’õre

12 Haivi Jesús iche tũpaope hãrã opa mohẽ haipe mãvendeva hareka mba‘ova’õre. Haipe opa mbijapara mesa kyrypoti mbyhepyha ẽvãpe, hareka pykasu meẽ’õre vapy ñynõĩheare. 13 Hãrã heishu reta: Tũpa ĩñeepe rãnga hei: “Shero rãnga mbyheeapo, oo jurureha’ipe verã”, tẽvã pee pijaposhi manarõ’iare ikua. 14 Haivi tũpaope ñymboja reta Jesús ẽvãpe heshamba kuvãĩpiare hareka japava, hai opa mynguera. 15 Pai ruvishare hareka Moisés mbypara vekua pyrỹmboi’iheare heshama mbaikavi heshaha verã Jesús japova, hareka hendu mãrãra sanjayre sapuke tũpaope: “Tũpa tymãĩ kavihe mburuvisha vasu David tay!” Hãrã poshy jyre. 16 Hãrã hei jyreshu Jesús: Rỹhendura mãrãra heijyre? Haipe Jesús heishu reta: Ahendu rãnga ãĩ. Pimbijeta ãĩteira Tũpa ĩñee heiva? Kyrã hei: Rymbypyrahe opaite sanjaymire hareka kambuteri’iare hekope kavi shemombai verã. 17 Hãrã ma’ẽĩhe retarã, õhẽ oho tenta Betania kyty, hareka hoka pyhare haipe pyta.

Jesús jahehe igo jypy iambava

18 Kõ’ẽĩ Jesús oujy tenta Jerusalenperã, ñandu ñymbahy. 19 Hãrã hesha pente igo jypy pe hỹmbeype’õ, ñymbojaherã mba’ẽã heshapy; koñeĩ hokykuerei. Haipe Jesús heishu igo jypy: Ynteñomapo ndi’iakui! Haipevãĩ igo jypy opa jipi. 20 Hãrã mboireare hokava hesharã mbyrymaĩ reta hãrã pyrãndushu Jesús: Mãrãĩra are’ãĩte opa jipi igo jypy? 21 Jesús heishu reta: Ãñete hai pee, piroja pyndypya mokuemba ryheverã, ko igo jypyre ajapova rãĩmi katupo pee pijapo jyve, katupo pereshu yvyturusu: “Syry koivi, ekua eapy yyvasu” hãrã kyrãpo iko. 22 Opava maĩnunga pee pirureshuva Tũpa, pirojakue rupii pipitypo.

Jesús ñymbaikatukue

23 Jesús ichejy tũpaope, haipe pyrỹmboiteri’õ, vãhẽ jyveru hai ẽvãpe pai juhuvishare hareka kuakuavare Israelva huvishare, pyrãndu jyreshu: Mbavara heinderã rijapo kova mbai? Mbavara meẽ nde ko mbaikatu? 24 Jesús heishu reta: Apyrãndupo jyve pee pente mbai, hãrã pymbeusherãpo ambeu jyvepe, mbava ñymbaikatu rupiira ajapo ãĩ kova. 25 Pereshe: Mbavara meẽshu mbaikatu, Juan pyrỹmyngarai verã? Tũpa maĩrã kuaretare? Hãrã haire õñepyrõ ijeta ijupi retarã hei: “Tũpa rãnga mboushu jairã, heipojy ñande: Akuarã mãrã’ĩrara pyrojããmbashu? 26 Hãrã kuaretare jaishurã, jakyje pũã ñandyrehe verã, shara haire roja Juan, Tũpa ĩñee mbeu’ia rãĩmi japoshu reta”. 27 Haire heishu Jesús: Kuaahãny. Haipe Jesús heishu reta: Akuarã ambe’ũãpo jyve pee, mbava ñymbaikatu rupiira ajapo ãĩ kova.

Ñymyhã’ãnga tyray mokue’ia ryheva

28 Jesús pyrãndushu reta: Mãrãra perereshu kova. Pente Kuimbai ĩmere mõkue tayre. Tynondevape hei: “Shyray, ekua mba’apo shu’uva rẽndape”. 29 Hãrã tay hei: “Shatẽyny aha”. Tẽvã kỹỹma ẽrã pya mbijetajy hareka oho mba’apo. 30 Haivi ohojy tay taykueitea ẽvãperã, kyrãĩ heijyshu oho mba’apo verã. Hãrã heishu tuu: Akuarã sheja, ahapokui! Tẽvã ohoã mba’apo. 31 Mbavara mokue’iare japoshu tuu heiva? Hãrã haire heishu: Tay tynondeiteva. Jesús heishu reta: Ãñete hai pee, kyrypoti mbatyse’iare Roma pevarã hareka taupe heko porãmbare tynondepo iche pyhevikui Tũpa huvisharã’õpe. ^{▼▼Kyrypoti mbaty iare hareka taupe heko poramba pya kavive Judio retaivi.} 32 Juan Bautista rãnga ou pynymboihe tape hekope kavi’õ, tẽvã pyrojããshu kyrypoti mbatyse’iare Roma pevarã hareka taupe heko porãmba rojashu reta. Tẽvã pee pyheshatẽva pyhejãã pyndyreko porãmba vekua, pirojahe verã.

Mba‘apo’iare heko porãmbare

33 Pyhendu jyve ko ñee ñymyhã’ãnga: Pente kuimbai ñotyka uva jy’yvype; opama mangorarã, japokajyshu uva ñamĩã verãpe. Mupũãjy pente oo vate’õ, haipe ẽẽ verã mãĩ’õ hareka ñyngarekohe verã jy’yvy. Haivi porykashu ju’uva rẽnda hepyre ñimĩty’ia retaperã, mbyry oho. 34 Vãhẽma ara uva ia myno’õhã verãperã, ko karai mondo jokuehareireare, mba‘apo’õre ẽvãpe, veru verã uva hai pevarã. 35 Tẽvã mba‘apo’iare pysy reta jokuehareirea pentevape, nũpa reta hareka ĩrũ juka, yngavape japi itape. 36 Tẽvã ko karai hetave mondojy jokuehareireare, mba‘apo’iare kyrãĩ japojyhe reta ĩrũre japohea rãĩmi. 37 Koñemahea tay mondojy shara pyape hei: “Shyray rãnga amondo, mba’ẽãpo japohe retakui shara kyje shyhevi reta”. 38 Heshama reta yvy ija tayrã, mba’apo iare hei: “Kovape rãnga opapo pytakui opa mbai, jajuka hãrãpo pyta ñandekui ko yvy”. 39 Haipe pysy reta nohẽ uva rẽndaivi hareka juka. 40 Haivi Jesús pyrãndu: Katynga ko uva rẽnda ija oujymarã, mbaivara japopohe retakui mba‘apo’iare? 41 Haire hei: Opapo juka parekoãpo ko heko porãmba retape. Haivi mẽ’ẽẽposhu uva rẽnda yngava mba‘apo’iare ña’ãpõrã. 42 Jesús heishu reta: Pikuããra Tũpa ĩñeepe heirã: Kova ita, oo japo’iare mombo vekua, hoka ĩãrẽ ã’ẽ mupũ’ãhã. Kova hai Ñandeja japova hãrã ore pevarã hai mbai haikaviva. 43 Hãmẽãra hai pee, Tũpa huvisharã’õpe hekypo pyhevi hãrã yngavapepo meẽ, kuaretare mynõõva Tũpa huvisharã‘õpe’õ ryheva. 44 Tẽvã ĩme’ẽ ita oahearã opapo my’õpe, ĩme’ẽ oava ita ĩãrẽrã opapo mungui. 45 Pai ruvishare hareka fariseore hendu hoka ñee ñymyhã’ãnga Jesús mbeu’õvarã, kuaa mondo reta haire he’ia ñynoĩshurã. 46 Hãrã pota pysyka jyre Jesús. Kuaretare kyje jyreshi rãmeĩ, shara rekoshu reta Tũpa ĩñee mbeu’ia rãĩmi.