Matthew 22

Ñee ñymyhã’anga omendava ryheva

1Jesús poryjy ñee ñymyhã’ãnga ijetajy verã opavape. Heishu reta: 2Huvisha vasu vate arapy’õ rãnga ova mburuvisha japova karuvasu tay omendapo’ẽrã. 3Mondo jokuehareirea hẽno verã opaite hai hẽnokavare. Tẽvã haire ñateỹ jyveru. 4Hykuaĩ mondojy jokuehareirea retarã, heishu reta: “Pymbeushu opaite tou reta ãhẽnokavare, opama ẽẽ hou verãre, pymbeushu reta ajukakama shurũmba kyrava”. 5Tẽvã opaite jurureshu vekuare ou verã mba’ẽã kuahase ñynoĩ. Penteva oho maĩhe jy’yvy, ĩrũ oho mba’ova, 6ĩrũ hembyvare opa oushurã pysy reta jokuehareirea mburuvisha vasu jokueva, heta nũpa retarã juka. 7Haipe mburuvisha poshyite’irã, mondo ñysyndarore opa juka verã jokueva juka vekuare hareka opa hapyshi verãre hentare. 8Haivi heishu jokuehareireare: “Opaitema ẽẽ jykaruvasu shyray omenda verã. She airuretẽshu ou verã retava, tẽvã jave’ãĩ haire sherope ou verãre. 9Hãrã pekua oparupii pyheshava pereshu ou verã jykaru vasupe”. 10Haipe jokuehareireare opa rupi jyraha mbaty heshavavive, heko kavi hareka porãmba opaite oho, kyrãĩ mynyhẽ reta oo. 11Hãrã mburuvisha vasu iche hesha verã ouvare, haipe hesha pente kuimbai mondembava omendavare ẽvãpe mondeava. 12Heishu: “Shi’ĩrũ, mãrãra riche kope rỹmondemba omendavare ẽvãpe mondeava?” Ko kuimbai jasakãi’i. 13Haivi mburuvisha vasu heishu jokuereare: “Pijokuashi ipy hareka ipo, pymombo katuape pyntuvape, haipe tijaheo hãĩre tyrorokua ijehe”. 14Jesús poi ijeta verã hei: Hetavape rãnga hẽnoha, tẽvã mbovyi’ẽ pyhyrõãvare.

Tũpa ña’ãpova hareka mburuvisha ña’ãpova

15Fariseore ijeta ijupi retarã pente ñeepe ñynoĩ pysyka verãre Jesús, hareka heivare ñonovaishu verãre. 16Fariseore mondo mboireare hareka Herode ẽẽ hãndiare. Heishu reta: Pyrỹmboi’ia, kuaa rãnga añeteva rỹmbeurã, hareka hekope kavi rymboi Tũpa hape. Kuaahaĩjy rymbyvapyã ndijehe, he’iandevarã, hãndi rỹma’ẽãvãĩjyhe marãvara. 17Pota kuaaha mbaivara rereshu kova: Haikavira mẽ’ẽhãshu kyrypoti mburuvisha vasu Cesar Romape’õ, maĩrã mba’etyva? 18Jesús kuaa potai kyrãĩ hei jyreshurã, heishu: Pee hova mokue’iare! Marã’ĩrãra pota shiñono porããpi? 19Ñamaĩheno, kyrypoti kuei pymẽ’ẽsea. Haivi verushu reta nikere denario he’iashua. 20Jesús maĩherã pyrãndushu reta: Mbava hã’anga hareka mbava heera ẽẽhe? 21Haire heishu: Huvisha Cesar. Jesús heishu reta: Akuarã, pymeẽshu mburuvisha vasu ña’ãpova, hareka Tũpape, Tũpa ña’ãpova. 22Hendu hokavarã opa mbyrymaĩ reta. Haipe hejashurã opajy oho reta.

Ñypyrãndu kuerajya ryheva

23Hoka arapevaĩ Saduseore oho reta Jesús ẽvãpe. Saduceore rojããmba hai manova kuerajy verã, hãrã heishu reta Jesús: 24Pyrỹmboi’ia, Moisés rãnga heja kuatiape, pente kuimbai manoshi hyreko membymba vekuarã, tyvypo rekojy hyrekokue mimoña verã tichey mano vekua. 25Iko rãnga aryka’e 7 kuimbai pente’iare. Tynondeiteva omendateã mano, hyreko membymba vekua, hãrã tyvy omendajyhe. 26Kyrãi jehu jyveshu mokuehea hareka mbahapyhea, hipitypeve kõñẽmahea. 27Haivi kõñeitema hea mano jyve taupe. 28Hãrã manovare puãjymarã, mbavara pokui ko taupe, hyrekoite ko 7 iare omendãã hevekuare mbytepe? 29Jesús heishu reta: Tivisha rãnga pijavy. Pee pikuãã Tũpa ĩñee maĩrã Tũpa ñymbaikatu. 30Mba’erã manovare puãjymarã, kuimbai hareka taupe omendaveãmapo ijehe. Ikoposhi reta, Tũpa jokuevare vate arapy’õre rãĩmi. 31Pyrojãã manovare puãjy verãrã, pikuãmba Tũpa heipeva? Hai heimba aryka’e: 32“She hai Abraham, Isaac hareka Jacob ñu Tũpa”. Hai ha’ẽã manovare ñu Tũpa. Hykoveteri’iare ñu Tũpa rãnga hai. 33Hendu hokavarã, opavare hãĩrã hesha ko mbai Jesús pyrỹmboihea.

Ñee japoa verã mbaivasuveva

34Fariseore henduma Jesús opa mikuirĩrĩ saduceo retarã, ñymbaty jyraha Jesús ẽvãpe. 35Penteva, Moisés mbypara vekua opavee kuaava, ity verã pyrãndushu: 36Pyrỹmboi’ia, marãva ñee japoa verãra haikavive ñee mbyparahava japoa verãivi? 37Jesús heishu: “Haihu Ñandeja nu Tũpa ndypyaivive, ndykove ryheve hareka opaite ny’ãrãndukue ryheve”. 38Kova hai tynonde’õ hareka ñee japoa verã haikaviveva. 39Haivi haykue ouva ovajy, kyrãĩ hei: “Haihu ndapisha nde rijyhaihuva rãĩmi”. 40Kova mokue’õvaivi ñee japoa verã ẽẽ jyvehe Moisés mbypara vekua hareka Tũpa ĩñee mbeu’ia pyrỹmboihe vekuapy.

Mbavaivi ñymoña vekuara Jesús

41Jesús ijeta fariseore jaty õperã. 42Pyrãndushu reta: Mbaivara perehe Cristo? Mbavaivi ñymoñavara hai? Haire heishu: David. 43Haipe Jesús heishu reta: Marã’ĩrãra David Espiritu Santo rupii heishu: “Sheja”? David rãnga heimba: 44Ñandeja heishu Sheja: “Vapy shakata kyty, tãñono ndepy ẽvãpe ndyreshatamba’iare”. 45David teiva rãnga heishu. “Sheja”? Hãmerã marã’irã David ñymoña hãndiapojy? 46Haipe mbaveã mbai heijyshu. Haivivãĩ mbavea mbaiva pyrãndujyshu.