Matthew 24

Jesús mbeu tũpao opa mbaia verã

1Jesús õhẽjy tũpaovirã, ohojyma’ia, mboireare ou ẽvãpe mbyheshaka verã oo vate’õvã tũpaore. 2Jesús heishu reta: Pyheshara opaiteva kova? Ãñete hai pee, penteãpo pytakui ita jyvohy’õ. Opaitepo oarã ñymbai.

Jehu verã ara opama potarã

3Haivi oho reta ñũũ olivo he’iashuape, Jesús vapy haipe, hareka mboireare ñymboja hai ẽvãpe. Haipe hã‘ẽi’õpe pyrãndushu reta: Pota rãnga kuaahave mãrãrapokui vãhẽma reijy verãperã. Mbaivarãnirapo heshahakui vãhẽma hokava arape? 4Jesús heishu reta: Pymãĩkavikui, avy pyma’ẽĩhe mbava pynymbytavykui. 5Shara hetapo’ẽ shyreepe ou heipe verã: ‘She hai Cristo’, hãrã hetapo’ẽ mbytavyva. 6Pyhendupo iko ñyrãrõvasu oparupi, tẽvã avypo pykyje. Kova mbai rãnga ikoñõĩpo, hokava ha’ẽã he’iseva vãhẽmava ara opa verã. 7Pente tentavasu pũãpo ynga tenta vasure, hãrã opavare pũãpo ijehe. Opa rupipo ẽẽ ñymbahyvasu hareka yvy ryry. 8Kova opaite haipo õñepyrõhea ara jahasa’asy verãpe. 9Haivi pypysyapo pynymbyperesoa verã, hetapo jyvavareha pyndyrehe, pukahapo hareka opaiteva kuaretare pyndyreshatããpo shyryhevaperã. 10Hoka arape, hetapo’ẽ jyroja shyrehevare, poi jyroja shyrehe verã. Hokavare jyhaihuveamapo reta, õñehãpo ijity verã mburuvishare ipope. 11Hetapo’ẽ Tũpa ĩñee mbeu’iare japuva, hareka hetavapepo mbytavy. 12Oparupipo ẽẽ mbai porãmba vekua, hãrã mba’etymapo jyhaihuva, ijaihuva rãĩmi. 13Tẽvã tãtangatu ẽẽva japypeve, ohojepepokui. 14Kova Ñee Kaviva Mburuvisha vasurã vate araivi ouva ryheva, opa rupiipo mbe’uha ko yvy jerekue, opa henta’õre hendu verã. Haiperãpo, vãhẽkui ara opa verã. 15Pyheshama ko mbai porãmba’eite vekua ẽẽ kyamba’ẽvãpe, Tũpa ĩñee mbeu’ia Daniel heiva rãĩmi. Henduva ko he’iava, tikuaa mbaivara he’ise. 16Hokava pyheshamarã, Judeape’iare ãrẽ’ãite toho tiñemi ita vate ouvaipi. 17Oo ĩãrẽ’iva, avy tyvejy nohẽ verã maĩnunga hoo’ivi. 18Ñuuhupi’ia, avy toujy raha verã mondeva. 19Tengapokui taupere purua’ia hoka arape, hareka memby kambu’iare! 20Pirureshu Tũpa avy tikokui kova ara ro‘yma’iape, hareka putu’uava jy’arape. 21Hãma hetapo iko jyhasa’asy, hasa’asymbateria rãĩmi ko yvy oñepyrõrãvãĩ, hareka ko rãĩmiva jyhasa’asy maipivẽamapo jehukui. 22Hãrã Tũpa mykoĩpĩã kova ara, jyrojaheare reherã, mbavẽapo ohojepekui. Hai pyhyrõvare haihu rupii rãnga mykõĩpĩpokui. 23Hãrã hoka arape ĩme’ẽ heipeva: “Kõõ ẽẽ Cristo” maĩrã “Hooka’i”, avy pyroja. 24Shara hetapo Cristo rãĩmi ñymyhã’ãnga ouva, hareka Tũpa ĩñee mbeu’ia japuva. Hetapo mbaikavi heshahava japokui, mbytavy verã Tũpare jyroja retaivive, katurã. 25Ãmbeu’ãiĩpe kova, ndei ikorã. 26Hãrã ĩme’ẽ heipeva: “Mesia ĩme’ẽ yvy ikoambaipi”, avy pekua. Heiperã: “Koo rãnga ñemi’i, avy pyroja”. 27Verava heshava rãĩmi kuarasy ichea kytyve, kyrãpokui vãhẽma ara kuareta Tay oujy verãperã. 28Tã’õvẽ ẽvãpe, opa jaty vyrachevasure.

Ara opamarã jehu verã

29Ara jyhasa’asy hasamarã, kuarasy ovepokui, jasy sapeveamapokui, jasytatare opapo oakui vateivi, hareka ara vate’õre opapo ryry. 30Haipe, heshahapo vate arare heshakava kuareta Tay, oumarã. Haivi kyjerã, opa yvy’ĩãrẽ tenta ijare jaheopo shyresha aima ãvãpỹtupyrã, mbaikatu hareka hĩmbipe ryheve. 31Ñyhendupo mimbyvasukue hỹnatu ipuva, haivi ãmondopokui ajokuevare mbaty verãre shyryhevare opaite yvy jerekue, ara japyivi opapeve. 32Pikuaashi kova ñee ñymyhã’ãnga igo jypy ryheva: Hãka hoky py‘ahuma’ẽjyrã, pikuaakuei ara haku vãhẽserimarã. 33Kyrãpo jyve, pyheshama kova opa ikorã pikuapokui vãhẽserima, She kuimbai rãĩmi ai vekua, õchepema ẽẽrã. 34Añeteĩteva haipe: Kova mbai opapo ikokui ndei opa mano ã’ẽ ikoteri’ia retarã. 35Ara hareka yvy opapokui, tẽvã shiñee opããpokui. 36Tẽvã mbai arapera hareka mbaipeitera, mba’ety kuava, Tũpa jokueva retamba kuaa verã hareka Taymba kuaa verã, koñeĩpo kuaa Sheru. 37Noe ikoteri yvy’ĩãrẽrã arape rãĩmipo, jehukui kuareta Tay oujymarã. 38Hoka arape ndei ãmavãsurã opava iko, karu, ñymbyu y hareka omenda jyre, Noe ichepeve varko vasupe. 39Hãrã ñymoãmba ñynoi vekua, ou ãma vãsurã opaite juka reta. Kyrãipo jyvekui kuareta Tay, oujymarã. 40Hoka arape, mõkue kuimbai ĩmepo’ẽ ñuupe, pentepo rahashi ĩrũpo hejaha. 41Mõkuepo taupe avati mungui ñynoĩ, pentepo rahaha, ĩrũpo hejaha. 42Pymãi kavipeĩ, shara pikuãã mbaipera oujypo Peja. 43Pyreko kova pankape: Pente oo ija kuaa mbaipera ichepokui ho’ipe manarõ’iarã, hai ocheãpo hareka ma’ẽĩãpohe ho’ipe manarõshu. 44Tẽvã, pẽĩ kavipopeĩ, shara pimoãmbapeĩvape, kuareta Tay oujypokui.

Jokuearea heko kaviva hareka heko porãmba

45Mbavara jokuearea jyrojahea hareka heko kaviva? Hai jokue’õ ñono ipope opaite ĩrũ jokuehareireare myngaru verãre ikotẽvema ñynoirã. 46Vy’apo jokuehareirea, jokue’õ oujy hesha opakavi japoshu heishuvarã. 47Añeteĩteva haipe, oo’ija opaiteapo ñono ipope ña’ãpovare. 48Tẽvã jokuehareirea heko porãmbavarã, pya mbijetarã mõãte jokue’õ kỹypo ohorã, 49õñepyrõ jyvavarehe hapishare, hareka õhẽ karu, hou hãndi kau’iare, 50haivi jokue’õ oujypo, hai ñymoamba hareka hãrõmba’ẽ vekua, 51jokue’õ ñũpa pohyposhu hareka mondopo hova mokue’iare ẽvãpe. Hãrã haipepo jaheo hareka hãĩ mbupurupo’i.