Mat 25 | TpjSC | STEP | Hãrã ko huvisha vasu vate arapy’õ, ovapokui 10 kuñatãi hekyva ñymbai sapekare ñandype hareka oho verã omendavape, mi’ĩrũ verã temerã.

Matthew 25

Jesús ijeta he 10 kuñatãire

1 Hãrã ko huvisha vasu vate arapy’õ, ovapokui 10 kuñatãi hekyva ñymbai sapekare ñandype hareka oho verã omendavape, mi’ĩrũ verã temerã. 2 Ko kuñatãi mbytepe 5 ẽẽ kuamba ijupeare hãma 5 ĩrũre kua’ihaivare. 3 Ko kuamba’ijupeare raha tẽvã ñymbai rẽndyka, rahããhipi ñandy ãmoikui opashirã, 4 tẽvã kuaa ijupehaivare, raha ñymbai rẽndyka hareka ñandy hyru ryheve. 5 Hoka temerã ỹrẽ’ã vãhẽrã, kuñatãire opa hypehy reta hareka opa oche. 6 Pyharembyteipimarã, sapy’ãĩ ñyhendu pente sapukerã heiva: “Ouma temerã. Pei pymãihe”. 7 Haipe sareko 10 kuñatãi myhendy tivisha verã ñymbai rẽndykare. 8 Ko 5 kuamba’ijupevare hei 5 kua’ihaiva retape: “Pimbijao jyve ore piniñandy, shara yrỹmbai rẽndyka rãnga oveserima”. 9 Kua ijupe haivare heishu reta: “Mba’ety, kyrãrã opaitevapo mbaimbape japytakui. Pekua peva pã’ãporã”. 10 Hãma 5 kuñatãi kuamba ijupevare oho heka ñandy ova verã, vãhẽ ou temerã, ĩrũ kuñatãire kua ijupe haivare iche hãndi temerã, hãrã haivi õche ñymboty. 11 Haivi, oujyma reta kuñatãi jyraha mba’ovavarã hei: “Sheja, Sheja, pea ore õche”. 12 Tẽvã hai heishu reta: “Ãñeteĩte hai pee, she apyrykuãã”. 13 Haivi Jesús hei: “Pysareko katupeĩ, hareka avy peche shara pikuãã ara hareka ora kuareta Tay oujy verãpe”.

Ñee ñimbivache kyrypoti ryheva

14 Kova huvisha vasu vate arapy’õ ryheva, ova pente kuimbai ohopo’õ ynga tentape, haipe hẽno jokuehareirea retape meẽshu verã kyrypoti ña’ãpovare. 15 Pentevape meẽ 5 mil nikere, hãrã ĩrũ 20 mil, yngava retape meẽ 10 mil pepenteĩ hipity kavishu verã. Haivi oho mbyry. 16 Ko jokueharea 5 mil nikere ĩmere vekua, mymba’apoka hareka 50 mil kyrypoti hipityjyshu. 17 Kyrãi jyve ĩrũ 2 mil ĩmere vekua, 20 mimoñajy kyrypoti. 18 Tẽvã 10 mil ĩmere vekua, oho manaroshu ija jokuereaivirã haivi raha ñoty yvykuape. 19 Heta arama hasarã ko pyrokue’õvã oujy, hãrã jururejyshu jokuehareireare oreveshu vekuare. 20 Tynonde vãhẽ ou 50 mil mẽ’ẽashu vekua haipe meẽjyshu 50 mil ĩãrẽve hãrã hei: “Sheja, 50 mil rãnga rỹmeẽ she, hãmã ko’ẽ, aru 50 mil ĩãrẽve amimoñajyva”. 21 Pyrokue’ia heishu: “Haikavite, nde hai jokuehareirea heko kaviva hareka jyrojahaheva; shara rĩngareko kavihe mĩshĩ ameẽndeva hãrã hetavepo ameẽjynde, iche vya shendie”. 22 Haivi ou jokuea rea 20 mil ĩmere vekua hãrã hei: “Sheja, 20 mil rãnga rỹmeẽ she, hãma arujynde 20 mil ĩãrẽve amimoñajyva”. 23 Pyrokue’ia heishu: “Haikavite, nde hai jokuehareirea pya kaviva hareka japumbaa; shara rĩngareko kavihe mĩshĩĩ ameẽndeva hãrã hetavepo ameẽjynde, iche vya shendie”. 24 Haivi vãhẽ ou jokuearea 10 mil me’ẽãshu vekua, hei pyrokue’iape: “Sheja, she rãnga aikuaa nde hai kuimbai heko pyatãtava, rỹmynõõ rĩñotymbape hareka rỹmbaty rỹmomohẽmbaipi. 25 Hãmẽ rãnga akyje hareka araha añoty yvype ndy kyrypoti, ko arujynde na’ãpova”. 26 Haipe ko pyrokue’ia hei: “Jokuehareirea ñarõva, ñatẽyva, rikuamba amynova ãĩmitymba aivaipi hareka ambaty ãmomohẽmbaipi. 27 Kyrãrã riñonotẽ verã kyrypoti natũhã’õpe, me’ẽãjyshe verã aijymarã shyrẽtape”. 28 Hãrã hei haipe’õ retape: “Pyhekyshi ko 10 mil hareka mẽe 50 mil ĩme revape. 29 Hoka ĩmereva, me’ẽãveposhu hareka hembypojyshu; tẽvã hoka mba’etyrea, hekyaveposhi mishĩĩ ĩmerevaivi. 30 Ko jokuehareirea mã‘ẽrãmba’iany pymohẽ, mymondo katuape pỹntuvape jaheo hareka hãĩ opa puru verãpe”.

Ñimbivache japyhea opaite tenta rehe

31 Kuareta Tay oujyma hĩmbipekue ryheve opaite jokuevare hãndirã, vapypokui jyvapyka hĩmbipevapy vate arapy. 32 Opaite tenta reta mbatyhapo hỹnonde, hãrã hai hykypo ijuhuvi avisha ñyngareko’ihea rãĩmi heky jy’avishare kavarare mbyteivi. 33 Ñonopo jy’avishare jakata kyty hareka kavarare jasu kyty. 34 Haipe mburuvisha heiposhu jakata kyty’õre: “Pei Sheru ohovasashu vekua, piche ko Mburuvisha vasurã vate araivi mỹhẽva’ẽpeva Tũpa japorãvãĩ ko yvy’ĩãrẽ. 35 Shara shimbahy’airã pee shymyngarupi, shu’uherã shymbyupi; mbyryivi ouva rãĩmi airã shymyvahẽ kavipi pynyrẽntape. 36 Shynani’airã pee shimimondepi vekua; shymbairasyrã pee shiñandupi vekua, ãime’ãĩ shymbyperesoavaperã peiva shy rẽndape”. 37 Haivi po heko kavivare heishu: “Yreja, mbaipera ore ndyreshaha nimbahyrã hareka nymyngaruha hãndi ndu’uherã nymby’uha? 38 Maĩrã, mbaipera ore heshaha mbyryvatẽvã hareka myvãhẽhã ỹrỹrẽtape hãndi nynaniteireirã, nimimondeha? 39 Mbaipera ore ndyreshaha nymbairasyrã, hareka nymbyperesoarã, hãndi ohoha ma’ẽã ndyreherã?” 40 Hãma mburuvishavasu heiposhu reta: “Añetevape haipee, hokava pijapo vekua pente kova shyryvyre mishiveva rehe, Shyrehe opa pijapo jyve”. 41 Haivi mburuvishavasu heipo jasu kyty’õ retape: “Pysyry shyhevi, pee pimepẽĩva Tũpa ñunũpa’ipe; pekuape tata opamba’õpe myhẽvãha Ãña hareka jokuereare pevarã. 42 Shimbahyrã pee shymyngaruãpi, shu’uherã yy pyme’ẽã she; 43 mbyryivi airã, shymyvãhẽãpi pynyrẽtape. Shynani’airã pyme’ẽãshe amonde verã; shymbairasyrã hareka shymbyperesoarã, pehoãã pymaĩ shyrehe”. 44 Haipe haire heiposhu: “Yreja, mbaipera ore ndyreshaha nymbahyrã, ndu’uherã, maĩrã mbyryvanderã, nynanirã, ñymbai rasyrã, nymbyperesoavape, hareka nymboryhambava?” 45 Mburuvisha heiposhu reta: “Ãñeteĩte haipe, hoka pijapo mbavekua pente mishĩveva rehe, pijapoã jyve shy rehe”. 46 Harã kovare ohopokui ñunũpa opamba verãpe, tẽvã heko kavivare ohopokui tykove opamba verãpe.