Matthew 27

Jesús rahaha Pilato ẽvãpe

1Kõĩmajyrã pai ruvisha hareka kuakuavare pente ñeepe ñynoĩ jukaka verã Jesús. 2Haivi ipo pokuaha ryheve rahashu retarã meẽ reta Poncio Pilatope, huvishavasu mbory’õre ipope.

Judas manorã vekua

3Hãma Judas pyrypysyka vekua, heshama Jesús pysy retarã, mbyvya ãĩterã 30 kavi kyrypoti meẽjyshu pai ruvisha hareka kuakuava retape, 4hãrã heishu reta: Mbai porãmba rãnga ajapo, ko kuimbai heko kaviva ameẽ jukaha verã. Tẽvã Haire heishu: Tẽvãra mbaivẽãma hai ore hokava! Ndyreheima’ẽ hokava! 5Haipe Judas mombo kyrypoti tũpaoperã oho ijuvy. 6Pai juhuvishare mbatyjy nikererã hei: Katuã rãnga kova ñañono Tũpape me’ẽãva hyrupe, shara kova hai tuvy mbyhepyapy vekua. 7Hãrã pente ñeepeĩ ñynoĩ reta ova verã hokava kyrypoti yvy “Ñu tujure mba’apova rẽnda”, haipe ñoty verã opaite israelitambare. 8Hãma hoka yvy mbyheeha ã’ẽpeve, “Ñũũ tuvy”. 9Kyrã iko Tũpa ĩñee mbeu’ia Jeremias hei vekua rãĩmi: “Hekymba reta hoka 30 ia nikere, hoka pymbyhepy ñonohẽ reta israelitavare, 10hãrã ovambapy reta hokava Ñũ tujure mba’apova, Ñandeja heisheva rãĩmi”.

Jesús Pilato hỹnonde

11Raha reta Jesús huvisha vasu mbory’õre ẽvaperã hai pyrãndushu: Ndera hai Judiore juhuvisha? Jesús heishu: Nde rãnga rere. 12Hãma pai ruvisha hareka kuakuavare ñono vai ñynoishu, tẽvã Jesús mba’ẽãmba hei. 13Haivi Pilato heishu: Rỹhenduãra mbai porãmba hei ñynoĩ ndyreva reta? 14Tẽvã Jesús mba’ẽãmba hei, hãrã Pilato mbyryvasu maĩ.

Jesús ñonõashu hai juka verã

15Aretemarã huvisha vasu mbory’õre poimbashikuei mbyperesoarea, kuaretare pyhỹrõva. 16Ĩmemba’ẽ pente mbyperesoava oparupi kuaahava, Barrabas he’iashua. 17Haire ñymbaty ñynoĩrã Pilato pyrãndushu reta: Mbavara pipota apoijyshi: Barrabas maĩrã Jesús, Cristo he’iashuara? 18Shara Pilato kuaa haire heshatãã reheĩ meẽshu reta. 19Pilato vapyteri’ẽ tribunalperã, hyreko heishu: “Avy mãĩ’ẽhe, ndeave ko kuimbai heko kaviva, pyhare porãã apaihu, hai rehe”. 20Tẽvã pai ruvishare hareka kuakuavare hei jyvyĩ kuimbai retape jurure verã Barrabas typoihashi hareka Jesús tijukaha hai verã. 21Huvisha ijeta hareka pyrãndujyshu reta: Mbavara kova mokue’iaivi pipota apoishivi? Haire hei: Barrabas. 22Pilato pyrãndushu reta: Mbaivara ajapo pohe Jesús, Cristo he’iashuva? Opaiteva hei reta: Mbysavava kurusure! 23Haipe Pilato heishu reta: Mbaivara porãmba hai japo? Hãma haire hỹnatuvemba sapuke reta: Tymbysavavaha kurusure! 24Pilato heshama mba’ẽãpo japoherã, hareka sapukevaĩ ñymbyheta verã, veruka yy hareka jypoi kuaretare hỹnonderã, hei: Shepo ky’ãpo ko kuimbai heko kaviva manoivi, pee pevarãma kova. 25Hãma kuimbaire opaite hei reta: Toa ỹrẽãrẽ hareka yryrayre ĩãrẽ hai ñymanokue! 26Haipe Pilato poishi Barrabasvi, haivi nũpãka Jesús hareka heja ipope reta mbysavava verã kurusure. 27Hãma huvisha syndarore rahashu Jesús huvisha hentape hareka mbatykashu ĩrũre ẽẽ hãndiare. 28Haivi mondeva hekyshi retarã mymondeka reta pente mondeava pyntava, 29ñakare ñono pente korona juu ñopẽãva hareka pente takuara ipo jakata kyty. Haivi ĩñesu hỹnonde reta ñymbyhory ñynoĩhe retarã hei: Tikopuku Judiore juhuvisha! 30Myndyvyhe reta hareka nũpa jyre takuarapy ñakaipi. 31Kyrã hetama ñymbyhoryhe retarã, ñohẽjyshi reta mondeva pyntava, mymondekajy ha’ẽĩ mondeva, haivi raha reta Jesús mbysavava verã kurusure.

Jesús mano kurusure

32Õhẽ jyjaha retarã, ñyvãiti hãndi reta pente kuimbai Cirenepe’ia Simón he’iashua; mbyrahaka reta Jesús jukurusu. 33Haivi vãhẽ jyraha Golgota he’iashuape, he’iseva tãkakãvẽ rẽnda. 34Haipe mbyho’uka reta vino irova mbihi’ava Jesúspe, tẽvã hããmarã ho’uãã. 35Mbysavavama kurusurerã, syndarore jyvare ñynoĩ Jesús mondeva mbijao ijupe verãre. Kyrã iko Tũpa ĩñee mbeu’ia hei vekua rãĩmi jykuatiape: “Mbijao reta mondeva jyvare ñynoihe mbavarapo raha”. 36Haivi haire vapy haipe ñyngareko ñynoĩhe verãre Jesús. 37Hãma ñaka’ĩãrẽ ñono reta pente yvyra ipeva mbyparahava heiva: “Kova hai Jesús Judiore juhuvisha”. 38Mbysavavaha jyve hãndi kurusure mõkue manarõ’iare, pente jakata kyty hareka ĩrũ jasu kyty. 39Hãma hasa ohovare haipi jahehe Jesús hareka ñaka mbyvavai jyrerã, 40hei: Nde rityndaporẽĩ tũpao hareka rũmũpũã ndapojy mbahapy aravape, ñymondojepe jyvy. Nde hai Tũpa tayrã vejy hoka kurusuivi. 41Kyrã ñymbyhory jyvehe reta pai ruvisha hãndi Moisés mbypara vekua pyrỹmboi’iheare hareka fariseore, kuakuavare hãndirã hei jyre ijupe: 42Ynga reta mondojepe’i, tẽvã hai katuã ñymondojepe. Israelitavare juhuvisha rãnga, tyvejy kurusuivi hãrãpo jyrojahahekui. 43Jyroja rãnga hai Tũpare, tymondojepeshu Tũpa ã’ẽvãĩ, ãñete haihushurã; hai hei ñandeva rãĩmi Tũpa Tayva. 44Hãma mãnarõ’iare mbysavava hãndia kurusure jyve, ijeta porããmba jyvehe reta. 45Haivi mondii opa pỹtu yvy jerekue kõĩ mbyteivive ka’aru mbahapy orapeve. 46Hãma mbahapy oraipi Jesús hỹnatu sapukerã hei: Eli, Eli, lama sabactani? Hokava he’ise: Shu Tũpa, shu Tũpa, Marã’irãra sheĩĩ shyreja? 47Haipe ĩme’õ reta hendumarã hei: Ko kuimbai hẽno’ẽ Tũpa ĩñee mbeu’ia Elías. 48Pente haivare ñani oho veru pente esponja hareka mãky vinagrepe, pente takuarare ñonorã mbyho’uka reta. 49Tẽvã ĩrũ reta hei: Mã’ẽĩheno, jaheshara Elías ou mondojepeshukui. 50Jesús hỹnatu sapukejyrã, haivi mano. 51Hãrã mondii tũpaope’õ tarapo jochahapya mbyteipitei soro, vateivi yvykyty. Yvy opa ryry hareka ita opa jeka. 52Haivi tã’õvere ẽvãpe opa jypea hareka heta heko kyambare mano vekuare, opa kuerajy. 53Hokavare õhẽjy ñotỹhã vekuaivi, haivi iche reta tenta kyamba’ẽvape, heta’ẽ heshavare. 54Syndaro ruvisha hareka opaite haipe’ẽ hãndiare Jesús ñyngareko’ẽheare heshama yvyryry hareka opaiteva mbai ikovarã, kyjeiterã hei: Kova rãnga ãñeteimba Tũpa Tay. 55Haipe heta’ẽ jyve taupere mbyryivi maĩ’iare, Jesús mi’ĩrũreare Galileaivive hareka mbory verã. 56Hokavare mbytepe’ẽ Maria Magdalena hãndi Maria Santiago hareka José ishy, Zebedeo tayre ishy.

Jesús ñotyha

57Ka’aruiterã pyntuma’ia, vãhẽ ou pente karai ikokatuva, José he’iashua. Tenta Arimateape’õ, hareka Jesús mboireare jyve. 58Hai oho Pilato ẽvãpe jurureshu Jesús hetekue, hãma Pilato me’ẽkashu. 59José tyretekue rahãrã ñomapy pente tarapo pyrẽrĩva kyambava, 60hãma ñono ita jo’oa vekuapy, manova ñotya verãpe ha’ei ña’ãpova, hãirã jo’okava. Mbotyma jo’oava juru pente ita marẽyvãpyrã, ohojy. 61Maria Magdalena hareka ĩrũ Maria vapyjyre tã’õve rẽnda hỹnonde. 62Hoka ara kuty jyape, putu’uava jy’aramarã, pai ruvisha hareka fariseore oho Pilato ẽvãpe. 63Heishu reta: Yreja, ỹrỹmandua rãngahe tykove japu hei vekua ĩmeteri’ĩrã vekua, mbahapy arape kuerajy verã manovare pãũvi. 64Hãrã pota riñono ñyngarekohe verã tã’õve rẽnda mbahapy arapeve, mahẽ mboireare ou ñomi rahakui pyhare hetekue, haivi heipo retakui, pũãjymava manoare pãuvi. Kyrã jehurã, ko japuva teitevemapojykui, tynonde ñahendu vekuaivi. 65Haipe Pilato heishu reta: Ameẽpopekui oho ñyngareko verãre tã’õve ñonoavape. Pijapo pee pikuava rãĩmi. 66Haivi jyraha mboty reta tã’õve ñonoavape hõche hesha verã ĩme’ẽ peavarã. Hãrã haipe heja reta syndarore ñyngareko’ẽhe verã.