Matthew 3

Juan Bautista ñimiñee

1Heta arama hasarã, Juan Bautista ñimiñee yvy ikoambaipi, Judeape. 2Hai hei: Peijy Tũpa jykoty, shara kõõĩma ẽẽ huvisha vasu vate arapy’õ ryheva 3Juan, haimba arykai Tũpa ĩñee mbeu’ia Isaías ijetaherã kuatiape mbypararã vekua: Ñyhendu yvy ikoambaipi hỹnatu ijetava: “Pymyhẽvã Ñandeja haperã, pijaposhu pe symyĩ ohova”. 4Juan mondeva hai kamello haakueivi japoava, ku’a jokuaka hai vakapi, tuku hareka ei ñanaipi’õvaĩ hou’i. 5Opaĩ Jerusalén, hareka Judeape’õre jyraha jyve hai ẽvãpe hendu verã ĩñee, kyrã jyve yy Jordan hỹmbeype’iare. 6Opama ñymbeu reta mbai porãmba japo vekuaivirã, Juan myngaraishu reta yy syryva Jordanpe. 7Tẽvã Juan heshama fariseore ▼
▼Fariseo: Moisés mbyparava pyrỹmboi’iheare. Saduceo: Judiore pai mburuvisharã’ia rojambaa manova kuerajy verã.
hareka saduceore heta ou ẽvãpe myngarai verãrã, heishu reta: Pee mboi rãĩmipiva! Mbavara heipe katu piñemishi verã ñunũpa pohyva kõõĩma ouva? 8Tijyhesha pyndyrehe pyhejama mbai porãmba pijapo vekua. 9Avy pimoã Abraham ñymoshiaperã mba’ẽã jehupe, she hai pee Tũpa katu japoshi ko ita Abraham ra’yrã. 10Shara hasha ẽma jasyja verã yvyra jypyre; opaite yvyra ia porãmbava jasyjahapo hareka momboha verã tatape. 11Añete yypeĩ apyrỹmyngarai pyhejama mbai porãmba pijapo vekuarã. Tẽvã shaykue ouva pynymyngaraipokui Espiritu Santo hareka tatape, hai mbai vasuve shyhevi, jypasaĩmba katu ajorashua. 12Ũrũpe ipopemare trigo mbova verã, hãrã yngaipo ñonoshi ky’akue, ñono kavipo oo’ipe trigo hãỹ, tẽvã ky’akue hapypo tata ovembape.

Jesús ñymyngarairã vekua

13Jesús oho Galileaivi, ou Juan ẽvãpe yy syryva Jordánpe hai myngaraishu verã. 14Juan potaã myngaraire Jesús, hãrã heishu: Nde rãngate shymyngarai verã! Hãmera nde rei ãĩvãpe? 15Jesús heishu: Ã’ẽãra kyrãĩpo ryheja, haikavive rãnga jajapo hekope kavi Tũpa potava. Hãrã Juan japo Jesús heishuva rãĩmi. 16Jesús ñymyngaraimarã, yyvi õhẽrã jypeashu ara vate’õ, haipe Jesús hesha Tũpa Espiritu, pykasu rãĩmi vejy ĩãrẽ. 17Hãrã ñyhendu vate araivi pente ñee heiva: “Kova hai Shyray ahaihuva, hai reheĩ avyava”.
Copyright information for TpjSC