Mat 6 | TpjSC | STEP | Avy pijapo mbaikavi kuaretare hỹnonde, pijeshakashu verã retaĩ. Kyrã pijaporã Peru vate arapy’õ, maĩnungapeãpo mbyhekoviape.

Matthew 6

Jesús pyrỹmboihe marãrapo mboryha ikotẽvẽvare

1 Avy pijapo mbaikavi kuaretare hỹnonde, pijeshakashu verã retaĩ. Kyrã pijaporã Peru vate arapy’õ, maĩnungapeãpo mbyhekoviape. 2 Hãrã rymbory ikotẽvẽvarã, avy mbeu’i oparupi. Japosea rãĩmi hova mokue’iare Judiore ñymbatyseape hareka vataha’õ retaipi; haire kyrã japo ijetaha kavihe verãre. She haima pee kyrã haire opama mbyhekoviashu reta. 3 Hãma ĩme’ẽ peeva pavete’iare mboryshuva, avy mbavape tymbeu. 4 Ñemiãpẽipo rijapo hareka Nderu opa hesha ñemiãpeĩ rijapova, haipo mbyhekoviandekui.

Jesús pỹrỹmboi marãrapo jairureshu

5 Hãma pirurerã, avy pirure hova mokue’iare rãĩmi, hai reta rãnga haikavishu ñymboyvape jurure Judiore ñymbatyseape hareka vataha’õ retaipi ijeshakashu verã kuaretare. Ãñeteĩte hai pee, kyrã haire opama myngoviahashu reta. 6 Nde rirure potarã, iche ndero’ipe, mboty nyrõche, hãma jurureshu Nderu neĩĩ rẽĩvape. Kyrã Nderu hesha ko neĩĩ rijapovarã, hetavare hỹnondepo opa mbyhekoviajyndekui. ^{▼▼“Opavare hỹnonde”: Kova ñee mba’ety arykai Mateo mbyparavapy.} 7 Pirurerã avy pukureii pijeta, Tũpare jyrojamba japosea rãĩmi. Mõate heta ijetarã Tũpa hẽnduveposhu reta. 8 Avypo haire rãĩmipi, shara Peru ndei pirurerãvãĩ opa kuaa mbaivara mba’etype. 9 Tẽvã pee kyrãpo pirure: Yreru vate arapy rĩmerẽĩva, avy tymyngy’aha ndyree. 10 Tou ỹrẽãrẽ mburuvisha vasurãrẽĩvavive vateivi ouva. Tijapoha nde ripotava ko yvy’ĩãrẽ, vate arapeva rãĩmi. 11 Meẽ ore ho’ua verã ko ara pevãrã. 12 Hejareii yryhevi mbai porãmba vekua, ore hejareiishia rãĩmi japo porãmba’i yryreheare. 13 Avy ma’ẽĩhe to’aha jepyarããpe, koñeĩ porãmbaivi yryrekyshi. Shara na’ãpova hai mburuvisha vasurãrẽĩvape, mbaikatukue hareka himbipekue, opa ara pevarã. Amén. 14 Pee pyhejareiishi mbai porãmba japo pyndyrehevarã, Peru vate arapy’õ hejareiipo jyve pyndyhevi mbai porãmba pijapo vekua, 15 tẽvã pyhejareĩãshu mbai porãmba japo pyndyrehevarã, kyrã jyve Peru vate arapy’õ hejareiiãpo jyve pyndyhevi mbai porãmba pijapo vekua.

Jesús pyrỹmboihe karumba ryheva

16 Hãrã pykarumbapepeĩrã, avy pyvy’ããpi hova mokue’iare rãĩmi; kyrã haire japo kuaretare heshahe verãre karuã ñynõĩrã. Ãñete hai pee, myngoviahamashu haire. 17 Mbaimba reuvape rẽĩrã, jyvahe hareka ijakatu, 18 hãrãpo kuaretare kuãã rykarumbape rẽĩrã. Koñẽĩ Nderu vate arapy’õ heshapo ñemiãpẽi rijapova; hãrã myngoviapo nde hetavare hỹnonde. ^{▼▼“Opavare hỹnonde”: Kova ñee mba’ety arykai Mateo mbyparavapy.}

Mãĩnunga hetava vate arapy’õ

19 Avy pymbaty maĩnunga hetava yvy’ĩãrẽ, kupii opa houvaipi, maĩnungakuere opa tujavape, hareka mãnãrõ’iare icheseaipi opa ñomi verã. 20 Pymbatyĩ heta maĩnunga vate arapy, kupii ẽẽmbape, maĩnunga ñymbaimbape, hareka mãnarõ’iare ichembaa manarõpe verãpe. 21 Shara maĩnunga heta ryrevape, haipepo ẽẽjyve ndypya.

Ñandyretepy sapeva

22 Tyresa reta rãnga hai tyretepy sapeva, hãrã ndyresare haikavirã, sape kavipo ndyretepe. 23 Tẽvã ndyresa porããrã, ndyretepy opapo pỹntu, hãma ndyretepy sapeva opa pỹntu ndyhevirã, pỹntuĩtevepopy.

Penteĩpojare Ñandeja

24 Mbavẽãpo ijokuekashu mõkue ija pyrokue’ia. Mỹmorããpo penteva, tẽvã ĩrũpo haihuve; maĩrã japoveposhu penteva heishuva, tẽvã ĩrũpo mymorãã. Hãrã katuããpo Tũpa jairojatẽheva, jahaihujy kyrypoti.

Tũpa ñyngarekohe tayre

25 Hãrã she hai pee: Avy pejepy’apyhe peu verãre, hareka pymonde verãre. Ha’eãra hai mbai vasuveva ñandykove timbiuvi hareka ñandyrete mondeavaivi? 26 Pymãihe vyrare haire ñimityãã hai, myno’õavaĩjy hareka mbatyã ñonokavi. Tẽvã Peru vate’õ hareka arapy’õ myngarushu reta, pee rãnga mbai vasuveshi hai reta. 27 Mbavara ojepy‘apyve’irã, iko pukuvepota? 28 Marã’ĩrãra pejepy’apy pymonde verãre? Pymaihe yvoty ñuhupi’õre mãrãra heñorã vate oho, mba’apombaa ñymonde verã. 29 She haipe mburuvisha Salomon opaite hĩmbipe ryheve, ñimimonde hai mashyãvape yvoty rãĩmi. 30 Tũpa kyrãĩ mimonde ñana ñuupe puãva, parejyra hapyha tatape, tẽvã japoãrapo jyve pyndyrehe, pee kuareta sa’i jyrojava! 31 Hãmeara avy pejepy’apy pypyrãndupi pijupe: Mbaivara jaupo? Mbaivara ñambusururutẽpo? Mbaivara ñamõndetẽpo? 32 Opaitea kovare ojepy’apy Tũpa rojambare, tẽvã pyreko pente Peru vate’õ, opa kuaava mbaivara pikotẽvẽ. 33 Haikaviveva rãnga pyheka tynonde Tũpa huvisharã‘õpe’õ ryheva hareka hekope kavi’õ. Tũpa meẽpope opaite jy’arape mba’etypeva. 34 Avy pejepy’apy paree verãre, shara paree verã rekojy yngaa jepy’apy. Opaiteva arare, reko heta jepy’apy.