Matthew 7

Avy ijeta porããhe ndapisha

1Avy pimbijiche papisha, hãrã Tũpa pinimbijicheãpo jyve. 2Papisha mbai porãmba pijapoheva rãĩmipo; Tũpa japo jyve pyndyrehekui. 3Marã’ĩrãra rỹmaĩrihe yvyraku’i ndyryvy hesape’õ, yvyra marẽyva ndyresape’õra ryheshããjy? 4Marãrapo rereshu ndyryvy: “Taheky ndyhevi yvyra ku’i ndyresape’õ”, ndeave ryrekova yvyra marẽyva ndyresape? 5Hova mokue’ia! Hekyrãni yvyra marẽyva ndyresape’õ ryheshakavi verã, hãrãpo ryhekyshi yvyra ku’i ndyryvy hesape’õ. 6Avy pymeẽshu ñaũmba mbai kyambaa, mahẽ jere pykotyrã opa pususukui, avy pymomboshu mãĩnũnga hepyva kushire hỹnonde, mahẽ opareii pyrõhekui.

Pirure, pyheka, hareka punũpa õche

7Pirure, hareka Tũpa meẽpo pee; pyhekava hareka hai heshakapo pee; pyhẽnoshu hõchepe, hãrã hai peapopekui. 8Jurureva rãnga me’ẽãposhu, hekava vãhẽposhu; hareka õche nũpava pe’aposhu. 9Mbara peeva, tay jurureshu pãhãra, meẽposhu ita pysẽvẽ? 10Pira jurureshurãra, meẽposhu mboi? 11Pee piniñarõva, mbai haikavivaĩ pymeẽshu pyndyrayre, ñopyĩara hai Peru vate arapy’õ, mbai haikavivapo meẽshu jurureshuare. 12Hãrã pijapo kavi jyvehe papishare, yngavare pipota japo kavi pyndyreherã. Kyrã hei ñande Moisés mbypara vekua hareka Tũpa ĩñee mbeu’iare jykuatiape.

Õche mishĩĩva

13Piche õche mishĩĩvaipi pyryrahava Tũpa huvisharã’õpe. Shara tivisha hai õche hareka pe pyryrahava Ãña ẽvãpe, javaiã javatahupi, hãrã heta’ẽjy icheva hokava õcheipi. 14Tẽvã õche hareka pe ohova tykove kyty mishĩĩ hai, javai javatahupi. Hãrã mbovyĩ’ẽ vãhẽshuva.

Yvyra iareĩ kuaaha marãvara

15Pingareko pindijeheshi Tũpa ĩñee mbeu rã‘ãnga’iare. Avisha rãĩmi jyverupe peĩvape, tẽvã pyape avaravasu ñarõ vekua rãĩmi. 16Hãrã japova reheĩpo pikuashu retakui: “Po’ohãã uva ñanaivi, hareka igo kapiãtivi”. 17Kyrã opaiteva yvyra haikaviva ia kavi, tẽvã yvyra porãmbava ia porãã jyve. 18Katuãpo yvyra haikaviva ia porãã, hareka yvyra porãmbava katuããpo ia kavi. 19Hãrã opaiteva yvyra ia porãmbava, jasyjaha hareka momboha tatape. 20Kyrãpo Tũpa ĩñee mbeu’iare japuva, japo vekua reheĩpo pikuaa kavi jyve.

Opaãpo ichekui Tũpa huvisha vasurã ẽvãpe

21Ha’ẽã opaiteva heisheva: “Sheja, Sheja”, iche verã vate arapy huvisha vasurã ẽvãpe, koñeĩ Sheru vate arapy’õ potava japovãĩpo ichekui. 22Hokava ara vãhẽmarã, hetapo’ẽ heisheva: “Sheja, Sheja, ndyreepe rãnga ore ñimiñe‘ẽhate’i jyve, ndyreepe mohẽha’i mbaiposhyre, ndyreepe heta japoha mbaikavi heshaha verã”. 23Tẽvã she haiposhu reta: “Mapeã rãnga apyrykuaa. Pysyry shyhevi, pee mbai porãmba japo’iare!”

Mokue kuimbai hoorã mupuã vekuare

24Hãrã ĩme’ẽ henduva shiñee hareka hekope kavi japova, ova pente kuimbai ñy’ãrãnduva, hoorã mupuãva ita ĩãrẽ. 25Haivi ou haivirã, ysyry jitivisha, yvytu ñakua pejurã oho’ẽhe oo, tẽvã o’ãã, shara ita vasu jypyrã’ẽshurã. 26Hãrã opaite henduva ko shiñee, tẽvã japoãrã, ova ko kuimbai mbaimba kuava hoorã mupuã vekua yvyku’i ĩãrẽ. 27Hãma ou haivirã, ysyryva jitivisha, yvytu ñakua pejurã oho’ẽhe oo, haipe oarã opa ñymambaishi. 28Jesús kova mbai heirã, kuaretare mbyry maĩhe reta pyrỹmboiheva, 29shara Jesús pyrỹmboi ñymbaikatu’ia rãĩmi ryheve, ha’ẽãmba Moisés mbypara vekua pyrỹmboi’iheare rãĩmi.