Phile | TpjSC | STEP |

Philemon

Pablo mbyparashu kuatia Filemon

1 She Pablo mbyperesoava Jesucristo rehe hãndi shyryvy Timoteo, marãnduha haihuhava Filemón, mba’apohavape ĩrĩmirũ’ia, 2 hareka jyrojavare ñymbatyva nyrẽntape jyve ñaniindy Apia hareka Arquipo, õñehã‘ãha’i hãndiva. 3 Tũpa Ñanderu hareka Teja Jesucristo tiñohẽ pyndyrehe mbai kavikue hareka pyavapy.

Pablo ñymboihe Filemón

4 Filemón, Tũpape ameẽñoĩshu shy’ajetekue shymanduama ndyree airurema ãĩrã, 5 heshara mbe’uashe nde ryhaihu Ñandeja Jesúsperã hareka hai rirojaherã, hareka rĩñanduheva jyhaihu opaite Tũpa henta’ĩrũ reta jyve. 6 Jyroja katuhe Ñandeja, ore rãĩmi. Hãme rãnga airure Tũpa rirojañoĩhe verã opa mbai haikaviva rikuaapeve jajapo verã Cristo jahaihurã. 7 Avya ãĩ hareka shymykyrẽỹ jyhaihu ĩmeryreva, shara nde shyryvy pyape rỹmykyrẽỹjyshu reta Tũpa ryhevare.

Pablo jurureshu pente mbai Onésimo pevarã

8 Hãmeara, ajema Cristo heepe ĩmete are hainderã rijapo verã, 9 aipotaĩ airure nde jyhaihukue heepe. She, Pablo, akuakuama hareka ã’ẽ shymbyperesohavape ãĩme’ãĩ Cristo Jesús rehe, 10 airure’asy nde shyray Onésimo pevarã, shara she ambeushu ñeẽ kavi shymbyperesohavape. 11 Ĩrũ arapeara nde pevarã Onésimo hai jokueharea mbaimba katu japova, tẽvã ã’ẽ haikavima jajokue nde pevarã hareka she pevarã. 12 Hãme rãnga ã’ẽ hykuaĩ amondojy nde, hareka airure nde rỹmyvãhe kavishu verã she shymyvãhẽva rãĩmi. 13 Sheara aipotate pyta shendie kope, shymbory verã nyrẽndakuepe ãĩmeteri’ãĩ shymbyperesoavape Ñee kaviva rehe. 14 Tẽvã mba’eãteripo ajapo ndeiteri ambeundevape, nymymba’apokamba verã airurendeva. 15 Katuara Onésimo mbovy ara syry ndyhevikui, ã’ẽ haimima pyta nde verã. 16 Koñeĩ ã’ẽ haiveãma pente jokuehareireva rãĩmi ryre verã, ndyryvy ryhaihuva rãĩmimapo, haikavive kyrã. She ahaihu, tẽvã nde ryhaihuitevepo, ha’ẽã kuaretare rãĩmi rĩmoña hãndiva rãĩmipo Ñandeja rehe. 17 Ãñeteĩte rĩmoña hãndia rãĩmi shyre rirojakueperã, airure nde rỹmyvãhẽ verã shymyvãhẽva rãĩmi. 18 Ĩme porãmba japo ndyrerã, maĩrã maĩnunga jipiahenderã, ñonokui shyreepe. 19 She, Pablo ambypara kova shepope hareka parava: Shepo ambyhepykui. Ha’eã nde, ndei rỹmbyhepy she verã, shara opaite ĩmeryreva hareka ndeteiva rereverẽĩjy she. 20 Shyryvy Filemón, japo she ko airure ndeva, tẽvã avy she hainderãmeĩ japo, koñeĩ Ñandeja ryhaihurã. Nde hareka she hai pente jahava: Meẽshe hokava kapyry ãĩ verã! 21 Ambypara nde heshara aroja katu ñee rỹhendurã, hareka aikuaa rijapove verã she airure ndeva. 22 Haivi airurejy nde, apyta verãpe rỹmyhẽva she verã, heshara pee pirureheva ãhãrõ ãĩ, Tũpa meẽpope aha apyryresha verã.

Marãndu japyhea

23 Epafras, shi’ĩrũ shymbyperesoavape’ãĩ hãndia Jesucristo rehe nymarãndu jyve. 24 Hareka jyve Markos, Aristarko, Demas hãndi Lucas shymbory’iare mba’apope. 25 Ñandeja Jesucristo jyhaihukue toĩñoĩ pyndykovepe. Amén.