Phili 1 | TpjSC | STEP | Pablo hareka Timoteo Jesucristo jokuevare, opaiteva Cristo Jesús ryhevare kyambava Filipope’õre, Tũpa hoope miñaka’õre hareka tũpaope mba’apova.

Philippians 1

Ñymarãndu

1 Pablo hareka Timoteo Jesucristo jokuevare, opaiteva Cristo Jesús ryhevare kyambava Filipope’õre, Tũpa hoope miñaka’õre hareka tũpaope mba’apova. 2 Ñanderu Tũpa hareka jyve Teja Jesucristo tymeẽpe jyhaihukue hareka pyavapy.

Pablo jurure’ĩãrẽ Jesús jyrojaheare

3 Ameẽñoĩshu Tũpa shy’ajetekue shymandua pyndyreherã. 4 Hãrã ãĩmboirã, vy’apeñoĩ shymandua pyndyrehe, 5 shara shymborypi jyve ambeu verã Ñee kaviva, tynonde arape pyhendurã vekua ã’ẽpeve. 6 Arojakatu’ãĩ Tũpa õñepyrõ vekua mbai haikaviva japo pyndyreherã, japoveteripo oho Jesucristo oujypeve. 7 Haikavi rãnga kyrã shypya ambijeta pyndyreherã, shara shypyapeĩ apyryre; ajema shymbyperesoha amaĩ’ãĩ ĩãrẽ hareka amy’ãñete Ñee kaviva, opaite pẽĩ jyve shendie jyhaihu Tũpa meẽshevape. 8 Tũpa kuaa marãra opaiteva ãñeteĩte apyryraihu shypyaivive jyhaihukuepy Jesucristo meẽsheva. 9 Hãrã kova airure shiñymboipe, jyhaihu ĩmepyreva pynytynyhẽve peo verã, hetave opa mbai kuaakuepy hareka hendape kavi pimbijiche verã maĩnunga, 10 haikavivape piko verã, kyrãra pikopo pyndyreko kyambape hareka mba’etypo mbai porãmba he’ia pyndyrehe verã Cristo oujy verã jy’arape. 11 Pee rãnga pepo tynyhẽpo pyraha teko jyvache i’akue mbaikavi pijapova Jesucristo rupii, kuaretare pyrahe hareka õmombai vasushu verã Tũpa.

She pevarã tykove hai Cristo

12 Shyryvyre, aipota pikuaa kova mbai jehushevare haikavi jyve Ñee kaviva ryheva ñimbitivishave oho verã. 13 Opaite syndarore ẽvã mburuvisha vasu hoope hareka yngavare, kuaa reta Jesucristo ahaihurã rehe shymbyperesoava. 14 Hãrã hoka mykyrẽỹ opaite shyryvyre mbeu verã Tũpa ĩñee, kyjembape hareka jyrojakue ryheve Ñandejare. 15 Ãñete ĩme’ẽjy Cristo ĩñee mbeu’iare ñymbyvaisho’ẽ shyreherãmeĩ hareka shyreshatãã ñynoĩrã, tẽvã ĩme’ẽjy kyrẽ’ỹpe japova. 16 Ã’ãmo mbeu reta Cristo jyhaihupe; shara kuaa reta shiñonoha Ñee Kaviva ryheva amaĩ ĩãrẽ verãrã. 17 Tẽvã ĩme’ẽ Cristo ĩñee ryheva mbeuva Tũpa haihurã, shara kuaa reta Tũpa shiñono kope amaĩ ĩãrẽ verã Ñee kaviva. 18 Tẽvã hokava mba’ẽãshe. Hãmeara añetevape maĩrã japuvape, jypyite ijetahaheshe Tũpa ĩñeerãvaĩ shymbyvy’a hareka shymbyvyaveteripo oho. 19 Hãma aikuaa pimboi shyreherãmeĩ hareka Jesucristo Espiritu shymbory rupii yrẽãmipo ãhẽkui ko shymbyperesohavaivi. 20 Symyĩ kavivape ãhãrõ’ãĩ, ajapoãpo shymymarãka verã, koñeĩ pyavasupe ãmbeu Cristo ĩñee jepi ajaposea rãĩmi, tyhesha shyrehe kuaretare ko Cristo mbaivasuva, aikoterirã maĩrã amanomarã. 21 She pevarã shykove hai Cristo, hãrã amanorã haikavitevemapo ãĩkui. 22 Tẽvã, aikoteri ko shyreteperã, katupo amba’apo kaviteri amaĩ kavihe verã heta yngavare, aikuãã marãvara apyhỹrõpo. 23 Mokue maĩnunga shopy; shykyrẽy amano aĩme hãndi verã Cristo, hokava hai haikaviteveva; 24 tẽvã tekotẽvẽ aikoteri ko yvy ĩãrẽ pyndyrehevape. 25 Hãrã aikuaa ãĩteri verã penendie apyrỹmbory verã, pymypyrãtave verã Tũpa jyhaihukuepe hareka pyreko verã vya pirojakuepe, 26 hãma aijymarã, pyrekovemapo mbaiva reherapo pemombaivasu Jesucristo. 27 Koñeĩ airurepe pikokavi verã Ñee kavi Cristo ryheva pyrỹmboiva rãĩmi. Shara aha apyryresharã maĩrã ãĩmbate haipeva, koñeĩ tahendu pyndyhevi piko kavi ijupiiva hareka piñyhãã pente pyapeĩ Ñee kaviva pirojaheva rupii. 28 Hareka avy pykyjeshi ñymbyvaisho’i pyndyrehevare, hai reta rãnga ijyhesha kavihe opa verã kyty jyraha jyrerã, tẽvã pee pevarã hai heshakava ñymondojepeva ryheva, hokava ou Tũpaivi. 29 Pee rãnga me’ẽhape Cristo pirojapeveĩmbahe verã, pyhasa’asy verã rãnga jyve hai rehe. 30 Pee hareka she rãnga ñaĩmeñaĩ penteva ñyhããpeĩ, hokava pyheshama shyrehe, hareka ã’ẽ pyhenduma marãra ãñehããtẽ aha’ai.