Phili 2 | TpjSC | STEP | Hãma Cristo meẽpe mbaikatu pymykyrẽỹ verã yngava retape, jyhaihukue pyndyraha pypyrỹmbypya kavi verãrã, hareka Espiritupe ñimi’ĩrũ hãndivape hareka ĩmepyre pya kaviva hareka pyryparekovarã,

Philippians 2

Jaiko Cristo ikova rãĩmi

1 Hãma Cristo meẽpe mbaikatu pymykyrẽỹ verã yngava retape, jyhaihukue pyndyraha pypyrỹmbypya kavi verãrã, hareka Espiritupe ñimi’ĩrũ hãndivape hareka ĩmepyre pya kaviva hareka pyryparekovarã, 2 kyrãpo shymbyvyapi, piko ijupive pente ñeeperã, jyhaihupe, pente pyapeĩ piko, hareka pente mbai pevarã rãĩmi. 3 Avy pijapo maĩnunga piñymbyvaishopi pijehevape maĩrã pota peñemombaipiva rãĩmi, peñemomishĩĩvape rãngapo pijapo, hareka pepenteĩpo rekohe hapisha vateve’ẽshi haiva rãĩmi. 4 Harekajy, avypo mbava heka ha’ei haikavishu verãvẽĩ, koñeĩ yngavare pevarã jyve. 5 Piko Cristo iko vekua rãĩmi hareka pijapo hai japo vekua rãĩmi:
6 Ajemaĩ haite Tũpa,
hai he’iã ijehe mbivacheva Tũpa maĩnunga ha’ĩ pysy verã rãĩmi,
7 koñeĩ opa heky ijuhuvii hai rekova,
japo ijuhuvi haiteiva jokuehareireva rãĩmi,
oava kuareta rãĩmi.
8 Hãrã ikoma kuareta rãĩmirã jyrojaã ijehe,
ĩñee rẽndu manopeve, hai mano kurusure!
9 Hãrã Tũpa vateve ñono opavaivi,
haivi meẽshu pente tyree ẽvã opavare ĩãrẽ.
10 Jesús heepe ĩñesushu verã
opava ẽvã vate arapy,
yvy’ĩãrẽ hareka yvy’ipe.
11 Hareka opavare hei verã Jesucristo haiva Teja,
õñemomba’e vasushu verã Tũpa Teru.

Tũpa tayre hai sapeva rãĩmiva yvy’ĩãrẽ

12 Hãrã shyryvyre ahaihuva, ãĩme ãĩ penendierã pijapoñoĩ she haiva, ha’eã ãĩme ãĩ penendierãmeĩ, katynga shembape hetave ã’ẽ, kyjevape hareka ryryvape pymba’apohe pynymondojepevare, 13 shara Tũpa japo pyndyrehe haikaviva pijapo verã hareka pynymbory pinimbijapoka, shara kyrã hai potarã. 14 Opa mba’e pijapo pijetakavivape hareka pijakambava ryheve. 15 Iko pyndyhevi verã mbaimba heshahahea hareka jyrojamba ijeheva, Tũpa tayre rãĩmi kuareta ñarõva hareka mbai porãmba japo’iare mbyteipi, haipepo pinihimbipekui jasytata vate’õre rãĩmi. 16 Tãnta pẽĩhe hokava Ñee kavi meẽva tykove. Kyrã, Cristo oujymarã shypya horypo pyndyrehe, aikuama ãñanireĩã hareka amba’aporeiarã. 17 Ajemaĩpo shyrykove hekyhatẽ shyhevi opa japo verã pee pymeẽva Tũpape pirojakue rupii, hãrã avy’a jyve penendie. 18 Kyrãĩ jyve pee, pyndyrory hareka pyvy’a shendie.

Timoteo hareka Epafrodito japo verã

19 Ãhãrõ’ãĩ Ñandeja amondo verã Timoteo, avya verã aikuama pyhevi marãra piko. 20 Shara mba’ety arejy ynga pyapenteĩ shendieva, hareka ãñete ojepy’apy pyndyreheva; 21 shara opaiteva yngavare heka haire pevarãĩ haikavishuva, ha’ẽã Jesucristo ryheva. 22 Tẽvã pee pikuaama marãra haikavi Timoteo heko, hareka shyray rãĩmi shymbory ambeu verã Ñee kaviva. 23 Hãrã ãhãrõ’ãĩ pykoty ãmondo verã, haivi aikuaama verã mbaivara ikopo shyhevi. 24 Tẽvã airojahe Ñandeja aha apyryresha verã jyve. 25 Tẽvã haikavivepokui amondo shyryvy Epafrodito hareka mba‘apo’i shendieva, shi’ĩrũ õñehãã’i shendieva hareka pymboushu vekua maĩ shyrehe verã aikotẽvevape; 26 hai rãnga kyrẽy oho pyndyresha opaite pee pẽĩva, shara pee pikuaama ñymbairasy’irã. 27 Ñymbairasy rãnga ãñete, hareka ajete mano, tẽvã Tũpa parekoshu, ha’ẽã ha’ẽĩ she jyve, potãã vyamba vekua ñimi’ĩrũvejyshe avyamba ãĩvaperã. 28 Hãrã ãrẽ’ãĩte amondojy pykoty, pyvya verã jyve pyheshajyrã, hareka she avyamba verã jyve. 29 Pymyvãhẽshu Ñandeja heepe vy’akue ryheve, hareka hai rãĩmiva pyndyroryñoĩpo hãndi. 30 Shara ajete mano Cristo rehe mba’apovapẽĩ, hareka hykove haihumbape shĩmi’ĩrũ verã, pee katumba pijapova, mbyrypẽĩ shyhevirã.