Phili 3 | TpjSC | STEP | Ã’ẽ, pee shyryvyre, pyvya katu Ñandeja rehe. She pevarã ha’eã shymangatumba hykuaĩ ha’ĩ ambyparajype kuatiaperã, katynga kova pymborypo pijavymba verã.

Philippians 3

Tykove kyambava Tũpa meẽva

1 Ã’ẽ, pee shyryvyre, pyvya katu Ñandeja rehe. She pevarã ha’eã shymangatumba hykuaĩ ha’ĩ ambyparajype kuatiaperã, katynga kova pymborypo pijavymba verã. 2 Pingareko katu pijeheshi tykove ñaumba rãĩmi’ivare, porãmba mba’apovare, hareka pyndyrete pota chĩchĩvare. 3 Ñande hai ãñete ñymbai pire chĩchĩava; ñamombaiva Tũpa ñande espiritu ryheve, javyava Cristo Jesure, hareka jairojambaheva tyroore ^{▼▼Tyroore Pablo jyrojããmbahe ñanymbai pire chĩchĩãva hareka hai israelitava.}. 4 Ajema she ĩmetẽ jyve airojahe verã tyroore. Mba’ety rãnga mbaiva reheiterapo airojahe: 5 Shipire chĩchĩã shyhevi 8 aravape, she hai penteva Israelvi ñymoña hãndiva, Benjamín ryheva; she rãnga ha’eiteva hebreo, hareka Moisés mbypara vekua pevarã, she hai jyve penteva fariseo ryhevare. 6 Shapuiteherã, tũpaore amoña’are, hareka Moisés mbypara vekua rupii ajaporã, mba’ety mbava mbai heishe verã. 7 Opaite kova mbai haikavishe aryka’e, Cristo ahaihu rupii, ã’ẽ mbaiveãma she arykai ambyhaikavi areva. 8 Ã’ẽ ahesha kavi kova maĩnunga yty rãĩmi, shara haikaviveshe Cristo Jesús Sheja aikuaarã hareka ãmombo ytype kova maĩnungare, ĩme’are verã Cristo, kyrã Tũpa pota ñandyhevi. 9 Añymypente handi verã, ha’eã ñimbivacheva rupii Moisés mbypara vekua rehe, koñeĩ Cristo jairojaherã, ñimbivacheva hai jyrojakue rupii Tũpaivi ouva. 10 Shykyrẽy aikuaveshuvape, hareka mbaikatu puãjyva ryheva, aĩ verã jyve hai jyhasa’asykuere, hareka amano verã hai mano vekua rãĩmi. 11 Kyrã aipota apity manovare mbyteivi apũãjy verã.

Nde’iaveteri ãvãhẽ japype

12 Ha’eã ãvãhẽmava japype, maĩrã haikavitema ãĩva, katynga ahaĩterihe tynonde ãhãrõ apitypeve Cristo Jesús shipityva rãĩmi jyve. 13 Shyryvyre, she ha’eãpe opa kavima apity pota ãvãhẽvape, koñeĩ ãñete pente maĩnunga ajapo: Ãñymbysareshi opaite hasama vekuaivi hareka ãñehãã apity verã shynonderãpe ẽvã. 14 Ahaterihe ãvãhẽ verã japyape, hareka apity verã me’ẽãreiiva Tũpa ñanyrẽno ñamyvãhẽ verã Cristo Jesús rupii. 15 Ñande opa kavima ñanytarõva jyrojakue ĩme jarevape, kyrãmipo ñandypya ñambijeta jyve. Ĩme’ẽ pynymbytepe yngai pya mbijetavarã, Tũpa pynymbyheshakapo jyve kova pipity verã pota pyvãhẽvape. 16 Tẽvã ñande hokava japitykavivare, pente ñeepeĩpo jaiko hareka penteva pyapeĩ. 17 Shyryvyre, piko katu she aikova rãĩmi, hareka pymaĩjyhe kyrã ikovape, pikuaa jyveshi ore ikohava me’ẽhapeva rãĩmi ikovare. 18 Hetama hai jyvyĩpeva rãĩmi, hareka ã’ẽ shysay syry ẽẽ shyrovare, ĩme’ẽ heta heshatamba Cristo jukurusurã. 19 Hokavare japyapepo jyvareahe retakui. Ñu tũpa ha’ĩĩ potaveshi reta, hareka japuhe reta notitẽ verãre. Yvy’ĩãrẽ õvaĩ pya mbijetahe reta. 20 Ñande katy hai vate arapy’õ ryheva, haivi ñahãrõ jyve ñanykyrẽỹ ryheve Ñanymondo jepeva Jesucristo. 21 Hai ñono kavipojy ñandyretepy hai hete hĩmbipekue rãĩmi ñymbaikatu rupii, opa ipope’ẽ opa mbaire.