Phili 4 | TpjSC | STEP | Hãrã pee shyryvyre apyryraihuva, hareka shykyrẽy apyryreshava, tãnta katu pẽĩhe Ñandeja, ahaihuvare.

Philippians 4

Pyvyañoĩpo Ñandejare

1 Hãrã pee shyryvyre apyryraihuva, hareka shykyrẽy apyryreshava, tãnta katu pẽĩhe Ñandeja, ahaihuvare. 2 Airure Evodiape, hareka Síntiquepe jyve, tiñymbypya penteĩ Ñandejare. 3 Nde jyve, amba’apoape shimi’ĩrũriva airure nde rymbory verã jyve ñaniindy retape, hai reta rãnga heta shimi’ĩrũ kova Ñee kaviva ambeu’airã, Clemente hareka ĩrũ retajy. Haire hee opama mbyparaha kuatiape. 4 Pyvyañoĩpo Ñandejare opa ara. Hai jyvyĩ pee: Pyvy’a. 5 Opavare tyhesha pynymbaikaviva. Ñandeja kõõima oujy! 6 Avy pejepy’apy maĩnungare, opa pymbeu Ñandejape pimboimarã, pirureshu hareka pymeẽshu pyndyvy’akue. 7 Hareka Tũpa pyavapy, hai ojaimbava kuaretare pya mbijetahevaivi, ñyngarekopohe pyndypya hareka pyndypya pimbijetavare, Cristo Jesús rehe.

Pypya pimbijetahe maĩnunga haikaviva

8 Koñemahea shyryvyre, pypya pimbijeta katuhe opava oumbava japuivi, heko kaviva, pyrỹmbyhoryva hareka hyrãkua kavivare. Opaite ĩmereva mbai haikaviva hareka katu pyraheva, kova pypya pimbijetahe. 9 Pijapo katu she apyrỹmboihe vekua hareka ahejapeva pijapo verã, opaite pyhendu hareka pyhesha shyreva ajapo vekua; kyrã pijapo hãrãpo Tũpa pya kavikue ẽẽ penendiekui.

Filipope’iare rahakashu me’ẽhaĩva Pablope

10 Shyrory rãnga, Ñandeja rehe pynymanduajy shyreherã hareka peñepyrõ shymbory py’ahujyrã. Ha’eã pyndysare shyhevirã, pyvãheãshu rãmeĩ rãnga marãrapo shymborypi. 11 Ha’eãpe kova aikotẽve airã, ahasa kuaañoĩ rãngatẽ opa ĩme areami ryheve. 12 Aikatu aiko shypavete ryheve hareka aikatu heta ĩme’arejy maĩnunga, opavare hareka opava pevarã shymbo’eha jyve, shỹvãta hareka shimbahy ai verã, opa ĩme’arevape maĩrã mba’etyite arevape. 13 Opa mbai katu ajapo Cristo rupii, hai shymypỹrãtase’ia. 14 Katynga, pee pijapo kavi shymborypi aikotẽvevaperã. 15 Pee Filipope’õre pikuaa jyve, ãñepỹrõ ambeu’ai ko Ñee kavivarã, ahajy Macedoniaivirã, koñeĩ pende tũpao rahaka she Tũpape me’ẽãva aikotẽveva pevarã. 16 Shara aĩmeteri’ãĩ Macedoniaperã, pee hetajy pyrahaka she aikotẽverã pevarã. 17 Ha’ẽã rãnga aheka’aijyva ynga me’ẽãreiva; koñeĩ aipota me’ẽãjype hekovia pymeẽ she vekuare. 18 Ã’ẽ opama ĩme’are perukasheva. Hoka peruka she vekua Epafrodito rupii, mbaiveama mba’ety ẽẽ she. Kova pymbousheva hãĩ mbai pishekatuva, pishe kaviva rãĩmi, mbai mbijichehava haikaviva Tũpa pevarã. 19 Tũpa meẽpojype opava maĩnunga pee pikotẽveva, shara heta mbai ĩmere vate arape Cristo Jesús rupii. 20 Ñamombai vasushu opa ara Tũpa! Amén.

Ñymarãndu koñemahea

21 Pymarãndu opaiteva Cristo Jesús heepe opaite heko kyambare. Tyryvyre aiko ai hãndivare, pynymarãndu jyve. 22 Opaite heko kyambare, tynondeite’ẽ Romape huvisharã’õ hoo vasupe’iare, pynymymarãnduka jyve. 23 Ñandeja Jesucristo jyhaihu tõĩ penendie. Amén.