Rev 1 | TpjSC | STEP | Kova hai Tũpa heshaka vekua Jesucristo rupii, mbykuaaka verã opaite jokueva retape; kova mbai areã iko verã. Jesucristo Tũpa jokuevape mboushu mbyheshaka verã jokueava Juan,

Revelation of John 1

Tũpa pyrỹmbyheshakava

1 Kova hai Tũpa heshaka vekua Jesucristo rupii, mbykuaaka verã opaite jokueva retape; kova mbai areã iko verã. Jesucristo Tũpa jokuevape mboushu mbyheshaka verã jokueava Juan, 2 hai opa mbeu opaite hesha vekua Tũpa ĩñee hareka Jesucristo mbeuva. 3 Vy’apo mbijetava Tũpa ĩñee hareka henduvare ko ñee iko verã, hareka japova, shara vãhẽmapo ara iko verãpe.

Juan mbypara 7 tũpaore pevarã

4 She Juan, amymarãndu 7 tũpaore ẽvã Asiape: Pymyvãhẽ jyhaihukue hareka pyavapy ouva, haiñoĩva hareka haiva, hareka ou verã, hareka 7 espiritu ẽvã hai vapypya hỹnonde, 5 hareka Jesucristoivi heshava jyrojaheva, tynondeite kuerajyva hareka mbaivasuveshiva mburuvisha vasu yvy ĩãrẽ’õre. Hai ñandyraihurã hareka opa ñandohe mbai porãmba vekuaaivi huvypy, 6 hai japo ñandyhevi mburuvisha vasu hareka paire, ñamba’apo verã Tũpa pevarã, haiva Jesucristo Tuu. Hĩmbipekue hareka mbaikatu ña’ãporãpo opa ara! 7 Shara Cristo oujypo ãvãpyntupy, opava retapo hesha, kuture vekua retaave hareka opaite yvy‘ĩãrẽ’õre ñymoñashia heshamarã hapĩrõpo hareka opapo jaheo reta. Amén. 8 She hai jypy hareka japyhea, õñepyrõhea hareka japyhea, hei Tũpa ñymbai katuveva, hykove’ia, hykoveñoĩ’i vekua hareka ouserimava.

Juan hesape’ou marãra Cristo hĩmbipeapy’ẽ

9 She Juan, pyndyryvy hareka pinimi’ĩrũva Jesucristo jyhasa’asype, hai vapyape mburuvisha vasurã’õpe hareka pyrãtape jahasa verã Jesucristo hasava rãĩmi, Tũpa ĩñee ambeu airã hareka Jesucristo rehe aijetarã shymondoha isla Patmos he’iashuape. 10 Ãĩme ãĩ Espiritupy Ñandeja jy’arape, hãrã ahendu shaykue pente ñee hỹnatuva, trompeta ipukue rãĩmiva, 11 hokava ñee heishe: She hai jypy hareka japyhea, õñepyrõhea hareka opahea ^{▼▼She hai jypy hareka japyhea, õñepyrõhea hareka opahea Kova ñee reta mba’ety arykai mbyparaha vekua.}, ryheshava mbypara kuatiape rahaka 7 tũpao Asiape’õ, Éfesope, Esmirnape, Pergamope, Tiatirape, Sárdispe, Filadelfiape, hareka Laodiceape. 12 Hãrã ajere ahesha verã mbavara ijeta’ẽshe ahesha 7 tataĩndy hyru ita vera ijuva. 13 Hareka hoka 7 tataĩndy hyru mbytepe ahesha kuareta Tay ovava, ñimimondeva mondeava pukuvapy ipypeve vãhẽva hãrã pente ku’a jokuahaka ita vera ijuva pitiare. 14 Ñakahaa tĩjypy avisha haa rãĩmi, ovajy amanda tĩĩva, hareka hesare hãinypi tata hendyva. 15 Ipy hĩmbipejy bronce mbyverava rãĩmi tatapy, hareka ĩñee yyvasure hy’apuva rãĩmi. 16 Ipo jakata kytyre 7 jasytata, hãrã juruivi õhẽ pente kyse hakua pukuva mokue haĩmbeva, hãrã hova hendyjy kuarasy sapetei’ẽrã rãĩmi. 17 Hãrã aheshamarã, a’a yvype ipy hỹnonde manova rãĩmi. Tẽvã hai ipo jakata ñono sheãrẽ, heishe: Avy kyje, she hai õñepyrõhea hareka japyhea. 18 Hykovejyva, amanotẽ vekua, tẽvã ã’ẽ manomba verãma aiko, ĩme’are mbaikatu ñymano hareka tatavasu rehe. 19 Mbypara kova mbai ryheshava, hareka ã’ẽ ikova hareka kutyve iko verã. 20 Hokava kuaahamba 7 jasytata ryhesha vekua shepo shakatape, he’iseva hai Tũpa jokuevare 7 tũpaore, hareka 7 tataindy hyrure ita vera ijuva ryheshava hai 7 tũpaore.