Rev 10 | TpjSC | STEP | Hãrã aheshajy Tũpa jokueva ĩrũ ñymbaikatuva, vejy vate araivi ãvãpyntu mbytepe hareka ĩmere ñakare pente jyi. Hova hĩmbipe kuarasy rãĩmi, tymare tata puku jypotavasu’õva rãĩmi.

Revelation of John 10

Tũpa jokueva hareka kuatia mishĩva

1 Hãrã aheshajy Tũpa jokueva ĩrũ ñymbaikatuva, vejy vate araivi ãvãpyntu mbytepe hareka ĩmere ñakare pente jyi. Hova hĩmbipe kuarasy rãĩmi, tymare tata puku jypotavasu’õva rãĩmi. 2 Ipope ĩmere pente kuatia mbyparahava michĩva pe’ava, haivi ipy jakata kyty’õ ñono yvasu’ĩãrẽ ipy jasu kyty’õ yvy iãrẽ. 3 Hãrã hỹnatu sapuke, ñavãpỹnta karõrõva rãĩmi, hareka sapukerã, ñyhendu 7 ijetava hỹnatu hy’apuva rãĩmi. 4 Ijetama 7 hy’apuva retarã, pota ambypara’are kuatia mishĩvamipe haire heiva, tẽvã vate araivi ahendu pente ñee heisheva: Avy mbeukui 7 hy’apuva heivare hareka avy ñono kuatiape. 5 Hãrã Tũpa jokueva ahesha vekua ñymbo‘y’ẽ yyvasu hareka yvy’ĩãrẽ, hupi ipo jakata vate arakyty, 6 hareka meẽ ĩñee Tũpa opa ara ikova heepe, arykai japova arare hareka yvy, yyvasu hareka opa mbai ẽpyare hãrã hei: Tũpa hetaveãmapo hãrõ. 7 Vãhẽpokui ara Tũpa jokueva 7 hea õñepyrõ mbi’ipu verã trompeta hareka ikoma verã Tũpa japo verã ñemiãpereva, hai heishuva rãĩmi jokueva Tũpa ĩñee mbeu’ia retape. 8 Hãrã hoka ñee ahendu vekua, vate araivi ijetajy she hãrã hei: “Ekua, hekyshi kuatia mishĩĩvami, hoka Tũpa jokueva ipoivi, ñymboy’õ yvasu hareka yvy’ĩãrẽ”. 9 Hãrã aha Tũpa jokueva’õpe airureshu meẽshe verã kuatia mbyparahava mishĩva, hãrã hai heishe: Ko’ẽ he’u. Ndijurupe hẽ’ẽpokui ei rãĩmi, tẽvã ndypyape iropokui. 10 Hãrã aheky hokava kuatia mbyparahava mishĩva Tũpa jokueva ipoivirã, hãrã hau. Shijurupe hẽ’ẽ ei tyy rãĩmi, tẽvã ãmokuemarã shyryepy iro. 11 Hãrã heishe reta: “Ñimiñehẽ ñee iko verã henta’õre jaheva, tentavasure, opaite tiñeere hareka huvishavasu retape”.