Rev 11 | TpjSC | STEP | Haivi me’ẽhashe pente yvyra mbai myhã’angapya, haivi he’iashe: “Pũ’ã hareka myhã’anga Tũpa jytũpao hareka altar, papaha mbovyra’ẽ haipe omombai’õ.

Revelation of John 11

Mokue’õ mbai heshava

1 Haivi me’ẽhashe pente yvyra mbai myhã’angapya, haivi he’iashe: “Pũ’ã hareka myhã’anga Tũpa jytũpao hareka altar, papaha mbovyra’ẽ haipe omombai’õ. 2 Tẽvã tũpao mangorava katoape’õ avy myhã’ãngahe, shara hokava me’ẽhashu Judiombare, haire pypyrõpohe tenta kyamba Jerusalen mbahapy ãño hareka ova jasyheape. 3 Hareka she amondopokui mokue heshava, jyhasa’asype mondeava hũũvapepo ñimimonde, mambeu verã ñee iko verã mbahapy ãño hareka ova jasyheape”. 4 Kova mokue heshava mbeuvare hai mokue yvyra olivo hareka mokue tataĩndy hyru Ñandeja hỹnonde yvy‘ĩãre’õ. 5 Hãrã ĩme’ẽ mbava pota porãmba japohea retarã, haire juruivi nohẽpo tata hapy vẽra hyvaishore, ĩme’ẽ mbava pota porãmba japohea retarã, kyrãpo jukaha. 6 Kova heshavare ĩmere mbaikatu mboty verã vate arare, haivimba verã haire Tũpa ĩñee iko verã mbeuteri ñynoĩra, hareka katu japojy reta yyvi tuvy, katuĩ mbyhasa’asyjyshu kuaretare opaĩ marãrãngatuva mbairasy porãmba’eite vekuapy hetajy haire potava rãĩmi. 7 Hãrã opama mbapy mbeuva Tũpa ĩñeerã, mymba ñarõva õhe yvykua vasu huvaivi ñyrãrõ hãndi reta, jepyhe retarã jukapo reta. 8 Hetekuere jypypysopo oho tentavasu hape retaipi, hoka tentape Ñandeja kurusure mbysavavaha hãndi vekuape, mbyheea rã’ãngava Sodoma hareka Egipto he’iashuva. 9 Hãrã mbahapy ara mbyteipi opaite ñymoñashiare, opaite henta’õre, opaite tiñeere hareka opaite tenta vasure heshapo tyretekue tẽvã ma’ẽĩhãpohe ñoty. 10 Opaite tentare horyĩpo jyrehe heshama manorã, haivi mondokapo ijupe reta ijopepy verã jukahava rehe, shara hoka mokue Tũpa ĩñee mbeu’iare kuaretare pevarã hai jyhasa’asy vasu porãmba. 11 Hãrã mbahapy ara hareka ara mbyteheaipi Tũpa mbouva espiritu tykove meeva opa ichepy reta, hareka pũã ñymboy reta, opaite heshava myngyjerai reta. 12 Hãrã mokue Tũpa ĩñee mbeu’iare hendu hỹnatu ijetarã heiva: “Pijupi kope!” Hãrã jupi reta vate arape pente ãvãpyntupy hareka hyvaishore hesha. 13 Haipekavi iko yvyryry vasu, hareka 10 jaty’õvaivi pente henda tentavasure opa japara, hoka yvyryry vasu 7 mil’õ opa juka, ĩmeĩtẽ’i vekuare opa kyje hãrã omombaishu reta Tũpa vate arape’õ. 14 Hokava hai jyhasa’asy vasu mokuehea, tẽvã mbahapyhea jyhasa’asy vasu ouserimajy.

Trompeta 7 hea

15 Tũpa jokueva 7 hea mbi’ipu trompeta, vate arape ñyhendu hỹnatu ijetavare heirã: “Ñanu Tũpa hareka ñy Mesías opama’ẽ ipope opaite ko yvy‘ĩãrẽ’õre, hareka haipo opa ara mburuvisha vasurã’ẽkui”. 16 Hãrã 24 kuakuavare vapy’ẽva vapypyape Tũpa hỹnonde, ĩñesu reta syva mbojapeve yvyre hareka omombaishu reta, 17 haire hei: Me’ẽha nde yry’ajetekue Yreja, Tũpa opa nymbaikatuva, haiñoĩva hareka haiva, hareka ou verã. Shara ndepopemaryre nymbaikatukue hareka reñepyrõma huvisharãrẽĩ ko yvy’ĩãrẽ. 18 Hãrã tenta vasure opa poshy, tẽvã ndyposhykue ouma hareka ara rĩmbivacheka verã mano vekuare, haivi mbaikavipepo rijopejy jyroja ndyryhevare hareka Tũpa ĩñee mbeu’ia retape, hekokavivare hareka opaite ndyree omombaiva reta, rỹmaĩmbaheape ñymbaikatu maĩrã mishĩĩra, hareka opapo rẽhundi jyve yvy opa ohundivare. 19 Haivi jypea Tũpa jytũpao hõche vate arape’õ, hareka jykuaa tũpaopy ñee me’ẽãva hyru. Ikoma sapuke vasu, hy’apuva, yvy opa ryryva hareka yvytu vasukue hãỹseveva.