Rev 13 | TpjSC | STEP | Haivi aheshajy yyvasuivi õhẽ’ia pente mymba ñarõva 10 ijuureva hareka 7 ñaka, pepenteĩ ijuure ĩmere tankare ñonoava, hãme ñakare pepenteĩrejy mbyparahava pente tyree Tũpa jypejuheva.

Revelation of John 13

Ãña jokuevare

1 Haivi aheshajy yyvasuivi õhẽ’ia pente mymba ñarõva 10 ijuureva hareka 7 ñaka, pepenteĩ ijuure ĩmere tankare ñonoava, hãme ñakare pepenteĩrejy mbyparahava pente tyree Tũpa jypejuheva. 2 Kova mymba ñarõva ova michivasu, tẽvã ipy mymba oso rãĩmiva hareka juru ñavapynta juru rãĩmiva. Hãrã mboi vasu meẽshu ñymbaikatukue hareka vapypya, harekajy pota japova japohe verã kuaretare. 3 Mymba ñarõva penteva ñakare hãĩny ĩmerea mbyperehavape juka verã, tẽvã kuerajyhe. Opaite kuaretare mbyryitemaĩ hareka opa ohohipi mymba ñarõva. 4 Haivi opaitevama omombai mboi vasu, shara me’ẽãshu mbaikatu ojaimbava pota japova japo verã hareka omombai jyveshu reta ko mymba ñarõva hãrã hei reta: Mbavara pyrãta kova mymba rãĩmi? Mbavara ñyrãrõpo hãndi? 5 Hãrã ñonoãjyshu hei verã hai mbai vasuva hareka jypeju’ihe verã Tũpa hareka me’ẽãjyshu pota japova japo verã 42 jasykavi. 6 Hasama kovarã õñepyrõ jypeju’ihe Tũpa hee hareka iko’iape, hareka opaite vate arape’õ retare. 7 Hareka ñonoãshu ñyrãrõ hãndi verã Tũpa ryhevare hareka jepyhe verã, hareka me’ẽãjyshu mbaikatu opaite kuareta ñymoñashiare, opaite henta’õre, opaite tiñeere hareka tenta vasure ĩãrẽ. 8 Hareka omombaishu reta kova mymba opaite Avisha Ray jykuatia tykove ryhevape hee ñonoambava, jukaha vekua. Kova kuatia ẽẽmba arykai Tũpa yvy ndeiteri japorã, haipe opa ĩme’ẽ kuaretare hee tykove ĩmemareare. 9 Ĩme’ẽ japysa’iarã, tyhendu. 10 Ĩme’ẽ mbyperesoa verãrã, rahapo mbyperesoha, hareka kyse pukuvape jukaha verã, kyse pukuvapepo jukaha. Hokava he’ise Tũpa ryhevare ñyhãrõkuapepo hasa reta mbai hasyva hareka tantapo’ẽ jyrojakuepe.

Mymba ñarõva yvyivi õhẽva

11 Haivi aheshajy ĩrũ mymba ñarõva yvyivi õhẽva, hareka ijuu mokue ĩmerea avisharay rãĩmi, tẽvã mboi vasu rãĩmi ijeta; 12 mymba ñarõva tynondeva mbyperearã manotẽ verã kuerajya hỹnonde ĩme’ẽrã, opaĩ pory jyve mbaikatu hai ĩmerea, hareka japoka yvy’ĩãrẽ opaite ikopyare omombaishu verã. 13 Hareka japo jyve mbai heshaha verã ojaimbava kuaretare hỹnonde, tatave ity jyve vate araivi yvy ĩãrẽ. 14 Kova mymba ñarõva opa mbytavy kuaretare heshaha verã rupii, hejahashua japo verã mymba ñarõva tynondeiteva hỹnonde. Haivi ñonokajyshu reta japo verã pente mymba ñarõva tynondeva ha’ãnga, kyse pukupe mbyperea vekua, tẽvã manoã. 15 Mymba ñarõva mokuehea me’ẽãjyshu mbaikatu meẽshu verã tykove mymba ñarõva tynondeva ha’ãngakue, tarã’ãnga ijeta hareka opa juka tarã’ãnga omombaimbashuare. 16 Haivi japo opaitevare ñonohahe verã pente heshahe verã, ipo jakatare maĩrã syvare, ikokatuva hareka pavetevare, sanjayre hareka sanjaymbare, jokuembareare hareka jokuehareare. 17 Mba’etypo mba’ovava maĩrã mavendeva mba’etyre heshahe verãrã, jaishu mymba ñarõva hee maĩrã jypapa ryheva. 18 Kope ikoatẽvepokui ãrãndu. Mbai heta kuava pya timbijetahe kova jypapa mymba ñarõva ryheva, shara jypapa hai kuareta ryheva; haiva 666.