Rev 14 | TpjSC | STEP | Haivi amaĩrã, aheshajy Avisha Ray ñymboy’ẽ ñana’õ Sionpe, haipe õĩ hãndi 144.000 ĩmereva Avisha Ray hee hareka Tuu hee mbyparava syvare.

Revelation of John 14

Pente mbyrahe py’ahuva

1 Haivi amaĩrã, aheshajy Avisha Ray ñymboy’ẽ ñana’õ Sionpe, haipe õĩ hãndi 144.000 ĩmereva Avisha Ray hee hareka Tuu hee mbyparava syvare. 2 Hareka ahendujy pente ñee ara vateivi ouva hãĩ yy hetava ipukue hareka ipukue hãĩ hy’apu vasua hãrã ahendu pente ñee hãĩ arpa ipu heta vekua. 3 Hareka pyrahe reta mbyrahe py’ahuva mburuvisha vasu vapypya hỹnonde hareka urũndy hykovevare hỹnonde hareka kuakuavare hỹnonde, hareka mba’ety katuva mbyrahe, koñeĩ 144.000 opa mondoajepevare ko yvy ĩãrẽ. 4 Kova hai taupe ñyngyambaheare shara pokohãterihe. Kova reta hai Avisha Ray mi’ĩrũ jyrevare ohova reta kyty. Kova hai mondoajepevare kuaretare mbyteivi me’ẽãva kapyryva Tũpa pevarã hareka Avisha Ray. 5 Hareka jurupe vãhẽhããshu japu shara haire ky’ããmba Tũpa jyvapyka hỹnonde.

Mbahapy Tũpa jokuevare

6 Hareka aheshajy ynga Tũpa jokueva veve’ia ara vate’õ mbyteipi, ĩmereva opa ara Ñee Kaviva mbeu verã ko opaite tenta vasu retape, opaite ñymoñashia retape, opaite tiñeere hareka ñymoñavare hareka ĩñeevare hareka henta’õre. 7 Sapukerã hei: Pykyjeshi Tũpa hareka pemombai, shara vãhẽma ara hai pirĩmbivache verã hareka pemombaishu japova ara vate’õ, yvy hareka yy’vasu hareka yy õhẽ’õre. 8 Haivi ynga Tũpa jokueva moñarã, heijy: Oama, oama Babilonia tenta ojaimbava, opa myngauva tenta vasu retape pyrỹmyngaupya hoope potavaĩ. 9 Hãme mbahapyhea Tũpa jokueva moña yngavare sapukerã hei: Ĩme’ẽ omombaiva mymba ñarõva hareka ha’ãnga hareka ñonoka syvare heshahe verã, maĩrã ipore, 10 haipo hou jyve Tũpa poshykue, haitei ẽẽ vekua poshykue hyrupe; hãrã jyvareapohe tatapy hareka asufre Tũpa jokuevare kyambava hỹnonde hareka Avisha Ray. 11 Hareka jyhasa’asy hãtãtikuere jupi oho’ẽ opa ara. Mymba ñarõva hareka ha’ãnga omombaiva, putuveamapo arape hareka pynturã, opaĩ hai hee ñonokavare. 12 Kope ẽẽ Tũpa ryheva hãrõkavivare, Tũpa heiva natu kaviva hareka opa ara jyrojaheva Jesús. 13 Hareka ahendujy pente ñee araivi ouva heisheva: Mbypara: Vy’apo manova koivi kutyve Ñandejare ẽẽva. Ẽẽ, kyrã hei Espiritu, putuumapo opa mbai japovaivi shara japo vekuare ẽẽ hãndi reta.

Timity mynoo

14 Hareka amaĩjy, ahesha pente ãvãpyntu tĩĩva hareka ãvãpyntu ĩãrẽ vapy’ẽ ovava kuareta Hĩnjapo, ĩmereva ñakare pente tankare ñonoava verava, hareka ipopere kyse japava haĩmbeva. 15 Hareka õhẽjy tũpaovi ynga Tũpa jokueva sapukeshu hỹnatu ãvãpynture vapy’õ: Ity ndykyse japa haĩmbeva jasyja ñotyãva, shara vãhẽma ara rỹmynoo verãpe hareka ñotyãva yvy‘ĩãrẽ’õ opama javyje. 16 Hareka ãvãpyntu ĩãrẽ vapy’iva mbyhasa jykyse japa haĩmbeva hareka opa mynoo yvyivi. 17 Hareka õhẽjy ynga Tũpa jokueva tũpao vate arape’õvaĩvi, ĩmerea jyve pente kyse japa haĩmbeva timity mynoova. 18 Hareka õhẽjy ynga Tũpa jokueva altar ẽvãivi, ĩmereva pyrãta tata hendyvare hareka hỹnatu sapukeshu kyse japa haĩmbeva ĩmerea, heishu: Minje ndykyse japa haĩmbeva hareka opa jasyja uva yvy ĩãrẽ hẽñovare shara opama uva iare javyje! 19 – 20 Hãrã Tũpa jokueva mbyhasa jykyse japa haĩmbeva yvy ĩãrẽ, hareka opa jasyja uva heñovare yvy ĩãrẽ, hareka uva heñova i’akuere ñamiava, mohẽha tentaivi uva ñamiava, kova he’ise Tũpa poshykue. Uva ñamia vekua õhẽshi turuvy kavaju juru jokoapyapeve, 300 kilometro japy pukukue.