Revelation of John 16

7 copa Tũpa poshykue ẽẽpya

1Hareka ñee hỹnatuva ahendu õhejy tũpaoivi heiva 7 Tũpa jokueva retape: Pekua pakuava 7 kopa yvy’ĩãrẽ. 2Hãrã tynonde’õ Tũpa jokueva oho hakuava kopapy’õ yvy’ĩãrẽ, hareka opaiteva myhã’ãnga ĩmereva mymba ñarõva ryheva hareka omombaiva ha’angare õhẽhe tukuru hasyraiva.

Copa mokuehea

3Tũpa jokueva mokuehea hakuava jycopa yyvasu ĩãrẽ hãrã ikoshi tuvy manova rãĩmi hareka opa mano opaite yyvasupy’iare.

Copa mbahapyhea

4Tũpa jokueva mbahapyhea hakuavajy jycopa ysyryvare hareka yy õhẽ’õre ĩãrẽ hãrã ikoshi turuvy. 5Haivi ahendu Tũpa jokueva yy ija: “Tũpa, nde ndyreko kyamba, opa arañoĩ rikova, hekope kavi nde rijaheheva. 6Shara ndyvaishore hetama juka nyrẽta ĩrũ heko kyambare, hareka Tũpa ĩñee mbeu’iare. Hãme rãnga ã’ẽ nde rỹmbyu reta turuvype, shara kyrãvaĩ heka reta”. 7Ahendujy pente ñee altarvive heiva: “Ẽẽ, Sheja Tũpa ñymbai katuva añetevape rãnga rĩpirĩmbivacheka hareka hekope kavi”.

Copa urũndyhea

8Tũpa jokueva urũndyhea hakuava jykopapy’õ kuarasy’ĩãrẽ, haivi hejaĩ kuarasy hakukuepy kuareta oke. 9Opaiteva oke reta hakukuepy, tẽvã oujyvyã reta Tũpa jykoty hareka pyraheĩmbatẽshuare. Jahehe reta Tũpa, mbaikatu ĩmerea jepyhe verã mbairasy porãmba.

Tũpa jokueva pandepohea

10Tũpa jokueva pandepohea hakuava jykopaivi mymba ñarõva vapypya ĩãrẽ, haivi huvisha vasurã’õpe opa pyntu, kuaretare hasyiteshu retarã ĩkure shutẽjyre. 11Haipeĩmbatẽ maĩnunga porãmba poi japovare, jahepevẽĩ jyrehe Tũpa vate arapeva, mbai rasykue hareka kurukueivi.

Copa ovahea

12Tũpa jokueva ovahea hakuava jykopaivi ysyryva Éufrates ĩãrẽ, haivi yy syryva opa typa, myhẽvashu verã pee mburuvisha vasure ouva kuarasy icheakyty’õ. 13Haivi ahesha mboivasu juruivi hareka mymba ñarõva juruivi hareka Tũpa ĩñee mbeu’ia japuva juruivi, õhẽ mbahapy espiritu porãmbava kururu rãĩmiva. 14Kova reta hai espiritu añare ryheva japova heshaha verã, õhẽ mbaty verã opaite yvy‘ĩãrẽ’õ mburuvisha vasure Tũpa Opa ñymbaikatuva ñyrãrõ hãndi verã vãhẽma Tũpa pirĩmbivacheka jy’ararã. 15Pymaĩ, manarõ’ia rãĩmipo aijy. Vy’apo shy’ãrõ õva hareka mondea natuva, mahẽ nanitei vãhẽashukui hareka heshaha ñynoti. 16Haivi espiritu porãmba opa mbaty mburuvishare pente hendape, hebreore ĩñeepe mbyheheava, Armagedon.

Copa shiuhea

17Tũpa jokueva shiuhea jycopa yvyture ñohẽ hareka õhe pente ñee hỹnatuva tũpaoivi, jyvapykaivi heiva: Opama iko! 18Haivi ẽẽjy vera vekua, hy’apuva hareka yvyryry vasu kuaretare yvy ĩãrẽ iko jyrerãvaĩ ikomba vekua. 19Haivi yvyryryvasu tenta vasu opa mbijao mbahapy hendape, hareka tentare tenta vasu retaivi opaite japaku. Tũpa sareãhe Babilonia, mbyupy verã vino Tũpa poshykue pohyiteveva ryheva. 20Opaite yy hỹmbey’õmi hareka yvyturusure opamba kañy. 21Haivi vate araivi oa amanda marẽrẽyva kuaretare ĩãrẽ, pohykue ajete 20 kiloreva, hareka kuaretare Tũpa hee jahe jyrehe, shara haire pevarã hokava amanda haimba ñunupa pohyiteveva.