Rev 17 | TpjSC | STEP | Haipema ou pente Tũpa jokueva 7 õva retaivi, 7 copa ĩmereare, hãrã heishe: “Ei tarỹmbyheshaka taupe kyrãrãĩ’ia ojaimbava yy vasu ĩãrẽ vapy’õ nupaha verã”.

Revelation of John 17

Taupe heko porãmba jaheaheva

1 Haipema ou pente Tũpa jokueva 7 õva retaivi, 7 copa ĩmereare, hãrã heishe: “Ei tarỹmbyheshaka taupe kyrãrãĩ’ia ojaimbava yy vasu ĩãrẽ vapy’õ nupaha verã”. 2 Opaite huvisha vasu yvy‘ĩãrẽ’õre kyrãrãĩ’i hãndi reta, hareka opaite kuaretare ñymyngaupy vino kyrãrãĩ’ia ryhevapy. 3 Haipe Tũpa jokueva shyresape ouvape Espiritu Santo shymbyheshakavape, ou shyraha yvy ikoambaipi, haipe ahesha pente taupe vapy’ia mymba ñarõva pyntavare, heta ĩmere ijehe tyree ñee porãmba Tũpa pevarã hareka ĩmembare 7 ñaka hareka 10 ijuukuere. 4 Hokava taupe mondere pyntahũva hareka pyntateiva. Ĩmere ita vera ijuva, ita mashyãvare hareka jyve perla hepyva mondevare hareka hetere. Ipope copa vera ijuva tynyhẽ’õ maĩnunga porãmba vekuare hareka kyava kyrãrãĩ’ipya. 5 Syvare ĩmere pente tyree kuaahambateriva mbaivara he’ise: Babilonia ojaimbava, opaite kyrãrãĩ’iare ishy ko yvy’ĩãrẽ. 6 Haivi ahesha taupe savypo’ipy Tũpa ryhevare huvykue hareka jukaha vekuare Jesús hee myhỹrãkua jyrerã. Aheshama hokavarã mbyry ãmaĩ. 7 Haipe Tũpa jokueva heishe: Marã’ĩrãra mbyry rỹmaĩ? Ãmbeuponde mbaivara he’ise ko jaikuambava ryheshava, haiponde mbavara ko taupe, hareka mbavara hai mymba ñarõva 7 ñaka’ia hareka 10 ijuu’ia opo veruhea. 8 Kova mymba ñarõva ryheshava rãnga arykai iko vekua, tẽvã ikoveãma, katynga õhẽpokui yvykua vasuivi, opa mambaia verãĩ. Hãrã opaite yvy ĩãrẽ’iare heere kuatia tykove ryhevape mbyparahamba ko yvy ndeiteri õñepyrõrã, mbyrypo maĩ retakui heshama arykaiva mymba ñarõva hykove’ia, mano vekua hareka õhẽjya. 9 Ãrãndu ĩmereva kuaapokui kova: 7 tãkãre mbeu reta 7 yvyturusure taupe vapy’ẽhea hareka mbeu jyve 7 mburuvisha vasure. 10 5 hairetava opama mano, tẽvã penteva ĩmeĩteri’i, ĩrũ ndeiteri ou, tẽvã oumarã kỹỹãpo’ẽkui. 11 Mymba ñarõva arykai iko vekua hareka ã’ẽ ikoveãma, hokava hai mburuvisha 8 hea, haitẽva pente 7 hea ryheva, hareka oho opa mambaia verãpe. 12 “10 ijuu ryhesha vekua rãnga 10 mburuvisha vasu ndeiteri ñymyhendava mburuvisha vasu rãĩmi, ĩmepore hãndi pente ora mbaikatu mymba ñarõva. 13 Mburuvisha 10 õre jyvachepo ĩmere retakui pota japova, hareka haire meẽposhu retakui mbaikatu mymba ñarõva. 14 Haire ñyrãrõpo hãndi Avisha Ray, tẽvã hai jepypohe reta, shara hai tejare Ija, hareka mburuvisha vasure Juhuvisha vasu”, hareka Hai ẽẽ hãndivare, hai hẽnoavare, pyhỹrõãvare hareka Tũpape henduñoĩvare. 15 Hãrã Tũpa jokueva heishe: “Yyvasure ryhesha vekua, taupe kyrãrãĩ’ia vapy’õpe, heshaka tentavasure hetava, tentare hetava hareka heta tiñeere. 16 Ijuure 10 reva hareka mymba ñarõva ryhesha vekua, mymorãveãpo taupe kyrãrãĩ’ia, hejapo hã’ẽĩ hareka piretei, ho’okuepo houjy hareka tatapepo hapyjy. 17 Tũpa pyape ñonoshu reta haire potavẽĩ japo verã, shara pente ñeepe ñynoĩ meẽshu verãre mbaikatu mymba ñarõva opa ikopeve Tũpa hei vekua. 18 Hãrã taupe ryhesha vekua tenta ojaimbava ipope ĩmerea mburuvisha vasure yvy ĩãrẽ’õre”.