Rev 18 | TpjSC | STEP | Hokava haykuema aheshajy yngava Tũpa jokueva vejy ou vate araivi. Ñymbaikatu vasukue ryheve, hareka hĩmbipekuepe opa mykõĩ yvy’ĩãrẽ.

Revelation of John 18

Babilonia nupaharã

1 Hokava haykuema aheshajy yngava Tũpa jokueva vejy ou vate araivi. Ñymbaikatu vasukue ryheve, hareka hĩmbipekuepe opa mykõĩ yvy’ĩãrẽ. 2 Hynatu sapuke, hãrã hei: O’ama Babilonia, tenta tivishava, ikomashi mbaiposhyre henta, opaĩ marãrãngatuva espiriture ikua hareka opaĩ marãrãngatuva vyra ky’ava hareka opaite mymba ñarõva. 3 Shara opaite tenta vasure ñymyngaupy vino heko kyrãrãĩ’iapy; mburuvisha vasure yvy ĩãrẽ’õre kyrãrãĩ jyre hãndi, mavende’iare opa ikokatupy hai oparei mombo vekuapy. 4 Hãrã ahendujy ñee yngava hỹnatu vateivi heiva: Pẽhẽshivi, pee henta’õ shyryhevare, mahẽ pymboryhekui mbai porãmba japojyreva, hãrã pindipity jyvekui mbairasy porãmba ouhe verãre. 5 Mbai porãmba japo vekuare vãhẽma vate arape, hareka hokava mbai porãmba Tũpa manduahe. 6 Pijapo jyvehe hai japo vekua rãĩmi yngava retare, mokuejy pymeẽjyshu porãmbava hai japo vekua. Pymbyupy mokuejy iroveva hai yngavare myhẽvã’ẽshua. 7 Hai rãnga jyroja’ijehe hareka pya ohohe haikavivape iko verã; hãme ã’ẽ pymbyhasa’asyveshu hareka tijaheo. Shara hai pyape hei: “Kope avapy ãĩ huvisha vasu rãĩmi. Ha’ẽãshe ĩme manoshia hareka ahasa’asyãvãĩpojy”. 8 Hãme rãnga, pente araheapeĩpo opa ouhekui mbahapy mbairasy porãmba: Jyhasa’asy, ñymano hareka ñymbahy, opapo mambaiha tatape, shara Ñandeja Tũpa pirĩmbivacheva, hai ñymbaikatuva. 9 Hãrã mburuvishare yvy‘ĩãrẽ’õ kyrãrãĩ’i hãndiva hareka vya vasupe iko hãndi vekuare, jahe’opo hareka sapukepojyre heshama tatãti hendy’ẽhevarã. 10 Heshama ñunupa vasurã kyjeite retarã, mbyryĩpo ñynoĩshi hareka sapukepojyre: Tenga, tengaponde, tenta vasu Babilonia, tenta pyrãtai’i vekua, sapy’aitepemba vãhende jaheandyrehe verã! 11 Opaite yvy’ĩãrẽ mavende’iare jaheopo jyve hareka mbasypohe reta hokava tenta, shara mba’etymapo ovashi verã veruvare; 12 ita verava ijuva, ita vera tĩĩva, ita mashyãva hareka perla, mondea verã tarapo pyrẽrĩva hareka ĩshiva, pyntahũũpya hareka pyntateiva; yvyra pishekatuva hareka opaite poryava marfilvi japoha vekua, opaite poryava yvyra mashyãvaivi japoha vekua, bronce, hiero hareka marmolvi; 13 kanela hareka timbiu mbipisheka, asaite mbipisheava, mirra, mbai pishekatuvare, vino, asaite, avati ku’i hareka trigo; mymbare avisha, kavajure, hareka karetare, jokueharea retave hareka ñyrãrõpe pysyavare. 14 Hareka he’iamapohe Babilonia: “Mba’etymaryre rikokatuhea ndypya oho’ihea; opareima rivarehe mbai kapypyryva”. 15 Hareka mavende’iare, opa ikokatu kova mbai ovende jyrerã, mbyryĩpo jyreshi kyje moã mbihi’ahe reta jaheaherã. Say hareka jahe’okue ryheve heipo reta: 16 Tenga, tengapo, nde tenta ojaimbava hareka nypyrãtava! Rĩmimonderiva mondeava pyrẽrẽrĩvapy, mondeava pyntahũũva hareka pyntateiva, rĩmymashyãva oropy, ita mashyãva hareka perla. 17 Pente orapeĩ sapy’aite opashi reta mbai ikokatuahe vekua, opaite barco mbyvata’iare hareka barco oho’ipyare, barkope mba’apo iare hareka yyvasupe mba’apovare mbyryĩ opa pyta reta. 18 Heshama reta tenta vasu okeva hãtãtĩkuerã, sapukejyre: Ĩmera’ẽjy ĩrũ tenta pyrãtava kova tenta ojaimbava rãĩmi? 19 Haima ñono yvykui ñãkare, jaheo ryheve, hareka sapuke reta: Tenga, tengapo, tenta ojaimbava, ikokatukuepy opa ikokatu reta yy vasuhupi mavende’iare. Sapy’aitepe opa oñehũndi tenta vasu! 20 Ryvy’apo nde ara vate’õ, pyvy’apo jyve pee heko kyambare, apostolre hareka Tũpa ĩñee mbeu’iare, shara Tũpa nũpamarã, japomape ñimbivacheva ryheva. 21 Hãrã pente Tũpa jokueva pyrãtava hupi pente ita, trigo mungu’iapya rãĩmi marẽỹva, hareka momboma yy vasuperã hei: Kyrãpo pyrãtãkue ryheve opa ityha Babilonia, tentavasu ojaimba, hareka mbai arapemba ndyreshahajy verã! 22 Ñyhenduveãmapokui arpa ipukue, hareka mimby maĩrã trompeta mbopu’iare! Mbaipemba ryheshajy verã yngangaiva kuaretare mavendeva, hareka rỹhenduveãmapo itapy mbai mungui’õ! 23 “Sapeveãmapo lampara, ñyhenduveãmapojy omendava ñymby’aretevare! Shara mavende’iare hai pyrãtava yvy’ĩãrẽ, tẽvã nde ndypajekuepe opa rymbytavy tenta vasu retape. 24 Tũpa jahehe hokava tenta, hai rehe opa jukaha Tũpa ĩñee mbeu’iare, hareka hai pyhyrõvare, hareka jyve heta yvy‘ĩãrẽ’iare”.