Rev 19 | TpjSC | STEP | Kova mbaijyrã, ahendu vate arape kuareta ñymbaty’õre rãĩmiva hỹnatu hei ñynoĩvare: Aleluya! Ñymondojepe, ñemombai hareka mbaikatu rãnga ñanu Tũpa ña’ãpovare.

Revelation of John 19

Vya vate arape

1 Kova mbaijyrã, ahendu vate arape kuareta ñymbaty’õre rãĩmiva hỹnatu hei ñynoĩvare: Aleluya! Ñymondojepe, ñemombai hareka mbaikatu rãnga ñanu Tũpa ña’ãpovare. 2 Shara Tũpa pirĩmbivacheka hekopekavi hareka añetevape. Shara nupa kyrãrãĩ’ia ojaimbava opa mbyheko porãã opaite ko yvy jerekue heko kyrãrãĩ’i vekuapy. Tũpa jepyjyvehe mba‘apo’ishuare opa juka’irã. 3 Haivi hykuaĩ heijy reta: “Aleluya! Hareka hai hãtãtĩkue, opa ara pevarãmapo”. 4 Hãrã 24 kuakuavare hareka urũndy hykove’iare jyroa reta yvypeve omombai reta Tũpa vapyhasepyape vapy’õ, hei: “Amén, Aleluya!” 5 Haivi vapyhasepyaivive ñyhendu ñee heiva: Pymbyveteshu ñanu Tũpa opaite pee hai pymba’apopishua pykyjeshia ryheve, pundupukumavare hareka pynyndeiterivare! 6 Haivi ahendu vate arape kuareta ñymbaty’õre rãĩmiva, yyvasu mbyhy’apuva, hareka hỹnatu hy’apuva rãĩmi, heiva: “Aleluya! Õñepyrõma huvisha vasurã’ẽ hai ẽvãpe, Ñandeja opa ñymbaikatuva. 7 Ñandyrorypo, ñaĩmytynyhẽ vy’a hareka ñamombai vasushu, shara vãhẽma ara Avisha Ray omenda verã, hyreko opama õĩkavi. 8 Tũpa mymondekama mondehava pyrẽrĩva, kyambava hareka hĩmbipeva. Kova mondeava pyrẽrĩva he’ise Tũpa ryhevare kyambare hekopekavi japo vekua”. 9 Tũpa jokueva heishe: Mbypara kova: “Vy’apo opaite hẽnohakavare Avisha Ray omendavape”. Haivi heishe: “Kovare hai ñee añeteva Tũpa ryheva”. 10 Haivi ãĩñesu hỹnonde ãmombaishu verã, tẽvã hai heishe: “Avy hoka japo! Emombai Tũpa, shara she ha’ẽĩ jyve hai jokuerea, nde rãĩmiva hareka opaite ñandyryvyre Jesús ĩñee jyrojateriheare”. Shara ñee Jesús pyrỹmboihea hai mykyrẽyva kuaretare mbeu verã ñee iko verã.

Kavaju tĩĩvare’ia

11 Haivi ahesha vate’õ ara jypearã hareka haipe jykuaa pente kavaju tĩĩva, oporeheva he’iashu Jyrojaheva hareka Añeteva, hekopekavi pirĩmbivacheva hareka ñyrãrõva. 12 Hesare tata hendyva rãĩmi; ñakare hetare tankare ñonoava, hareka ĩmere tyree mbyparahava mbamba kuava, Ha’iĩ koñeĩ kuaa. 13 Haivi ñimimondepy mondeava turuvykuetei vekua, hareka hee: “Tũpa Ĩñee”. 14 Oho haykue syndaro vate arape’õre, kavaju tĩĩvare’iare, ñymonde mondeava pyrẽrĩvapy, tĩĩva hareka kyamba. 15 Hãrã juruivi õhẽ kyse hãĩmbeva, mbyperepy verã opaite tenta vasure. Pỹrãtape ñumbuhuvishapokui, hãrã haiteipo uva ñami’õvã rãĩmi, he’ise Tũpa ñymbaikatukue ryheve poshyva. 16 Ñyponshore hareka iure mbyparahahe hee: “Mburuvisha vasure Juhuvisha Vasu hareka karaivasure Ija”. 17 Hareka aheshajy pente Tũpa jokueva ñymbo‘y’ẽ kuarasyre, hareka hỹnatu sapukeshu vyra vate ara mbyteipi veve’iare: “Pei hareka pimbatyve karuvasu Tũpa pevarãpe. 18 Peupokui mburuvishare ho’okue, syndaro miñaka’iare hareka katu ñyrãrõ’iare ho’okue. Peupo jyve kavajure hareka kavajure’iare ho’okue; yngangaiva tyro’opo peu; jokuehamba hãndi jokuehareirea, kuareta mbai vasuveva hareka kuareta mbaimbava”. 19 Haivi ahesha mymba ñarõva, yvy ĩãrẽ’õ mburuvisha vasure hareka ñysyndarore ñymbaty ñyrãrõ verãre. 20 Hãrã pysyha hokava mymba ñarõva hareka Tũpa ĩñee japupe mbeu’ia, hareka hỹnonde mbai heshaha verã japo’ia hareka mbytavy jyreshu mbai heshahava rupii ma’ẽĩhe ñonoka’ijevare mymba ñarõva hareka hã’ãnga omombaishuare. Mokue’õ hykove ryheve opa momboha tata vasu hẽndyvape asufre. 21 Hãrã opaite yngavare opa jukaha kyse pukuvape õhẽva kavajure’ia juruivi, hãrã vyrare opaite hỹvãtapy ho’okue.