Revelation of John 2

Ñee tũpao Éfesope’õ pevarã

1Mbyparashu Tũpa jokueva tũpao Éfesope’õ: Kyrã hei 7 jasytata ipo jakataperea, hareka ikova 7 tataĩndy hyru ita vera ijuva mbyteipi: 2She aikuaa rijapova hareka pohy rỹmba’apova hareka rỹhãrõkuajy, hareka katumba ryhesha tykove porãmbape’iare. Aikua rẽñehãriva hã’ãha verã hei’i ijehevare apostolva tẽvã ryvãheshu añeteãrã japureiva. 3Rỹharõkuarã, ryhasa’asykuajy hareka heta rỹmba’apojy shyraihuvape, nykangymba ryheve. 4Tẽvã ĩme’ẽ pente mbai rijapo porãmba; shyraihu nungaveãma jypyite shyraihu vekua rãĩmi. 5Hãma nymanduapohe mapera reajy, eijy jykoty Tũpa, tynondeite rikova rãĩmipo rikojy. Rijapoã kyrãrã ahekypo ndyhevikui nytataĩndy hyru hendaivi, reijyvyã Tũpa jykotyrã. 6Tẽvã ĩme’ẽ pente mbai rijapo kaviva: Ryheshatãã nikolaitare japova, she aheshatamba rãĩmi jyve. 7Ĩme’ẽ japysava tyhendu Espiritu heiva tũpao retape: Opaite õhẽkaviva ñyrãrõivi ameẽposhu hou verã yvyra’ia hykoveva Tũpa jy’yvoty rẽnda mbytepe’ẽva.

Esmirna pevarã ñee

8Mbypara jyveshu Tũpa jokueva tũpao Esmirnape’õ: Kyrã hei tynonde hareka japyhea, arykai manova hareka puãjy vekua, 9She aikuaa rijapo vekuare, ryhasa’asyvare hareka ndypavetekuepe, ndy espiritupe rikokatutẽva. Aikuaa marãra ijeta porãã ndyrehe Israelitare hei’i ijehevare tẽvã ha’ẽã, koñei Satanás ñymbatyse’õ retape hai. 10Avy kyje ryhasa’asypo rẽĩvare; Ãña rãnga ã’ãmo hããposhu hareka minjekapokui mbyperesoha verãpe pyhasa’asypo 10 ara. Tanta jyroja rỹmanopeve, hãrã she ameẽponde tykove opamba. 11Japysava tyhendu Espiritu heiva tũpao retape: Opa õhẽkaviva ñyrãrõivi hasaveãmapo ñymano mokuehea.

Ñẽẽ Pérgamo pevarã

12Mbyparashu Tũpa jokueva tũpao Pérgamope’õ: Kyrã hei kyse hakuapuku mokue hãĩmbeva ĩmerea. 13She rãnga aikuaa Satanás vapyape rikorirã. Hareka ndysareã shyrehe, rirojañoĩ shyrehe, ara Antipas añeteĩte shyreshava jukaha pynymbyteperã, Satanás ikovape. 14Tẽvã ĩme’ẽ pente mbai ajetemba’ẽshea: Ĩme’ẽ pynymbytepe Balaam pyrỹmboiheva potamba hejava, mboi vekua Balac israelitare oa verã mbai porãmbape hareka pota houshu reta mymba jukahava Tũpa rã’anga retape me’ẽãva hareka mykyrẽyshu reta kyrãrãĩ jyre verã. 15Potãã hejajy reta nicolaitare pyrỹmboihea. 16Hãrã japojy haindeva, shara rijapoã hokavarã narẽ’ãĩtepo ahandekui, hareka ãĩrãrõpo hãndi retakui kyse pukuvapy shijuruivi õhẽva. 17Japysava tyhendu Espiritu heiva tũpao retape: Õhẽkaviva ñyrãrõivi ambyho’ukapokui maná ñomihareva ameẽpojyshu reta ita tĩĩva, mbyparahaheva tyree py’ahuva, mbavamba kuaava, koñeĩ me’ẽãshuvaĩpo kuaa.

Tiatira pevarã ñee

18Mbyparashu Tũpa jokueva tũpao Tiatirape’õ: Kyrã hei Tũpa ray, hesa tata hendyva rãĩmiva hareka ipy bronce verava rãĩmiva. 19She aikuaa rijapova, rypyryhaihukue, rirojakue, hareka rỹpyrỹmboryva hareka rỹhãrõkuaa, aikua rijapove tynondeite rijapo vekuaivi. 20Tẽvã ĩme’are pente mbai shypya’ohombahe ndyheviva: Rỹma’ẽĩhe Jezabel taupe ñimiñee Tũpa heepe, mbytavy shyryhevare, mboishu reta ikoĩ hãndi verãre taupe omendambape hareka hou verã ho’uavare me’ẽãva ta’angape. 21She ahãrõĩtẽshi oujy verã Tũpa kyty, tẽvã ñateỹ heja heko porãmba vekua. 22Hokava rehe aitypo turupape hareka amboupo jyhasa’asy tivishava, opaite kyrãrãĩ’i hãndiare, Tũpa kyty peijyvyãrã. 23Hãrã membyre opapo ajukashi. Hãrãpo opaite tũpaore shykuamakui opaĩ aikuava tankapy’õre hareka typyare, hareka amyngoviaposhu reta pepenteĩ japo vekua rehe. 24Tẽvã pee Tiatirape peĩva, pehombahipia hokava pyrỹmbo’eahea hareka pikuamba haire mbyhee vekua Satanás japokava ñemiãpe’õ, hai pee: Añonoveãmapo peãrẽ ĩrũ mbai pohyva. 25Tẽvã pingareko kavipohe ĩmepyreva, she aijypeve. 26Opaite õhẽkaviva ñyrãrõivi hareka japova aipotava ara japyapeve, ameẽposhu mbai katukue reko verã tentavasu retare, 27Sheru ñonova rãĩmi shepope, hãrã jepypohe reta yvyra rãĩmiva hiero ipoperea rãĩmi hareka opapo jojoka japepo tujuivi japoava rãĩmi. 28Ameẽposhu reta jasytata kõĩ ourã õhẽva. 29Japysava, tyhendu kova Espiritu heiva tũpao retape.