Rev 20 | TpjSC | STEP | Haivi ahesha pente Tũpa jokueva vate araivi vejyva. Ipopere pente llave yvykua vasu ryheva hareka pente kadena.

Revelation of John 20

1000 ãñoheape

1 Haivi ahesha pente Tũpa jokueva vate araivi vejyva. Ipopere pente llave yvykua vasu ryheva hareka pente kadena. 2 Ko Tũpa jokueva pysy mboi vasu, arykaiva mboi, haiva Ãña hareka Satanás, hareka ñapĩnti kadenapy 1.000 ãñopeve. 3 Hareka mombo yvykua vasupe, haipe mboty’ĩãrẽ ñonojyhe pente sello õchere õhẽmba mbytavyjy verã tenta vasu retape opa mbotypeve 1.000 ãño. Haivi mbovy araĩpo jorahajykui. 4 Haivi ahesha vapyhasepyare, hareka vapyñynoĩpyare mbaikatu me’ẽãshuare pirĩmbivache verã. Aheshajy tykovere ñaka jasyjahashi vekua Jesús ryheva mbeu jyrerã hareka Tũpa ĩñee. Hai reta rãnga omombaimbaa mymba ñarõva maĩrã hã’ãnga, ma’ẽĩahe ñonoka ijehe ha’ãnga syvare hareka ipore, haire opajy kuera hareka Tũpa meẽshu vapyhasepya mburuvisharã ñynoĩ hãndi verã Mesías 1.000 ãñopeve. 5 Hareka hokava hai tynonde hykovejy vekuare; tẽvã ĩrũre hykovejyvyã opa mbotypeve 1.000 ãño. 6 Vyapo reta heko kyamba ñytynonde hykovejy verãre. Ñymano mokuehea jepyveãmapohe reta, koñeĩ pai ruvisha Tũpa ryhevaĩmapo hareka Cristo, hãrã mburuvisharãpo’ẽ hãndi 1.000 ãño.

Ãña jepyhahe

7 Hãrã mbotyma 1.000 ãñorã, Satanás poiapojyshi mbyperesohareaivi. 8 Õhẽpo mbytavy verã opaite tenta vasu retape, Gogpe hareka Magogpe, hoka he’ise opaite tenta yvy‘ĩãrẽ’õre. Ñymbatypo hokava tentape’õre ñyrãrõ hãndi verã; ñysyndarore katumba opa papahava yvy ku’i rãĩmi. 9 Haire vatapo opaite yvy ĩãrẽ, Tũpa henta ryheva opapo jerehe hareka tenta haihuhava, tẽvã õhẽpo tata vate araivi hareka opaitepo hapy. 10 Ãña, opa mbytavy vekua, opapo momboha tata vasu asufre hendy’õvape, haipe mombahaĩpo jyve mymba ñarõva hareka Tũpa ĩñee japupe mbeu’ia. Haipe hasa’asypo reta opa ara, arakuepe hareka pyharekue. 11 Haivi ahesha vapyhasepya marẽỹva tĩĩva, hareka vapy’ẽpya, hai hỹnonde opa kañy yvy hareka arare, mba’ety heshajya. 12 Ahesha jyve opa mano vekuare, ndeiva hareka sanjaymba, ñymboy ñynoĩ reta Tũpa hỹnonde; haivi pe’aha kuatiare. Pe’aha jyve yngava kuatia, haiva kuatia tykove ryheva. Mano vekuare mbivachehakahe kuatiape mbyparahaheva rãĩmi. 13 Hareka yyvasu meẽ opa manopy vekuare, kyrãĩ jyve ñymano hareka manovare ẽvãpe opa meẽ ẽẽpy vekuare, hareka pepenteĩ mbivachehaka haire japo vekuare. 14 Haivi mano hareka manovare ẽvape’õre momboha tata vasupe. Kova hai ñymano mokuehea. 15 Hareka heere ñonohãmbaa kuatia tykove ryhevape, momboha reta tata vasupe.