Rev 21 | TpjSC | STEP | Hãme ahesha pente ara vate’õ py’ahuva hareka yvy py’ahuva, shara ara vate’õ hareka yvy tynonde ẽvãre mba’etyma, kyrãĩjy yyvasure.

Revelation of John 21

Ara vate’õ py’ahuva hareka yvy py’ahuva

1 Hãme ahesha pente ara vate’õ py’ahuva hareka yvy py’ahuva, shara ara vate’õ hareka yvy tynonde ẽvãre mba’etyma, kyrãĩjy yyvasure. 2 Hareka aheshajy tenta kyamba, Jerusalen py’ahuva, vate araivi vejyva, Tũpa ẽvãivi, myhẽvãhava tyrekorã ñymymashiãva, temerã vãhẽma ourã pevarã. 3 Ahendu vapyhasepyaivi õhẽ pente hỹnatu heiva: “Kope ĩme’ẽ Tũpa ñytavernáculo kuaretare mbytepe ẽva. Ikopo hãndi reta, hai retapo henta’ĩrũre hareka Tũpateipo ẽẽ hãndi retakui Ñu Tũparã. 4 Tũpa opapo joheshi sayre, ẽẽveãmapo ñymano, mbairãmba hykũaĩ ñymbairasyjy verã, maĩrã jaheojy, hareka mbai hasyvamba ñandujy verã, shara arykai’ẽ vekua mba’etyma”. 5 Tũpa hei vapy’ẽvaivive: “Opa mbaire ajapo py’ahujy!” Hãrã heijy: “Mbypara, shara kova ñee añeteva ryheva hareka katu jarojava”. 6 Heijyshe: “Opama iko! She hai õñepyrõhea hareka opahea. Ju‘uhe’ia, ameẽreiiposhu ñymbyupy verã yy õhẽ’õ tykove meẽva. 7 Opaite poporãmba vekuaivi õhẽkaviva opa mbaipo me’ẽãshukui, hãrã sheepo haikui Ñu Tũpa, hareka haipo shyray. 8 Tẽvã kyjekatuva hareka jyrojambaa, heko kyava hareka pirijuka’iva, kyrãrãĩ’ia hareka pajeva, tarã’ãngape omombai’ia hareka opaite japuvare, haire mombohapo tata vasu hareka asufre ẽvãpe, hokava hai ñymano mokuehea”.

Jerusalén py’ahuva

9 Haivi ou penteva 7 Tũpa jokuevare 7 copa ĩmereva tynyhe’õ koñemahe verã mbairasy porãmba, hareka heishe: “Ei kope; ãrỹmbyheshakapo tyrekorã, Avisha Ray hyrekorãpokui”. 10 Hãrã Tũpa Espiritupe ahesha shyresape ouva, Tũpa jokueva shyrahajy pente yvyturusu vate’õpe, shymbyheshaka verã tenta tivishava kyamba Jerusalén, vate araivi vejyva, Tũpa ẽvãivi. 11 Tũpa hĩmbipekue opa mykõĩ, hareka sapekue maĩnypi pente ita mashyã verava, ita jaspe rãĩmi, vidrio sãkapya rãĩmi. 12 Katoakyty opa jerehe mangorahapya tivishava hareka vate’õ, ĩmerejy 12 õche tivishava; pepenteĩ õchepe ñyngareko’ẽ pente Tũpa jokueva, õche tivishavare mbyparahajy tyree 12 Israel ñymoñashiare hee. 13 Mbahapy õche ẽẽ kuarasy õhẽa kyty, mbahapy yvytu kyty, mbahapy rovai kyty, mbahapy kuarasy ichea kyty. 14 Tenta mangorahapya ĩmere 12 jypyre hareka ĩãrẽ ẽẽ 12 tyreere 12 Avisha Ray jy’apostolre hee. 15 Tũpa jokueva aijeta ai handiva ĩmere pente mbai myhã’angapya ita vera ijuva, hãrã hoka mbai myhã’angapyape myhã’ãnga tenta hõchere tivishava hareka mangorahapya. 16 Tenta jichere urũndy’õ opaĩ jyvache. Tũpa jokueva myhã’ãnga mbai myhã’angaheape ita vera ijuvaivi, myhã‘ãngaherã’õhe 2.200 kilómetro, pukukue, vatekue, hareka ipekue. 17 Tũpa jokueva myhã’ãngajy ñymangorahapya, hãrã 65 metrore, ñande kuareta ñamyhã’ãngava rãĩmi, Tũpa jokueva myhã‘anga’õ rãĩmi. 18 Ñymangorahapya japoha ita jaspe he’iashuaivi, hareka tenta ita verava iju vekuatei, hainy vidriokue sãkapyva. 19 Hãrã mangorahapya jypyre ita yngangaivape mymashy’ãva; tynonde’õ jaspeivi, mokuehea zafiroivi; mbahapyhea agataivi, urũndyhea esmeraldaivi; 20 pandepohea oniceivi; 6 hea rubiivi; 7 hea crisolitoivi; 8 hea beriloivi; 9 hea topacioivi; 10 crisoprasaivi; 11 hea jacintoivi; 12 hea amatistaivi. 21 12 õche ẽvã hai 12 perla; pepenteĩ’õ õcheivi japoha penteva perlaivi. Hareka tenta vatahaite’õĩpi ita vera ijuteiva vidrio sãkapya rãĩmi. 22 Tenta hapype aheshãa tũpao, shara Teja, Tũpa ñymbaikatuva hareka Avisha Ray haitei tũpao. 23 Hareka tenta vasu ikoteveãhe kuarasy hareka jasy mykoĩ’ĩãrẽ verã, shara Tũpa hĩmbipekue sape’ẽhe hareka Avisha Ray hai ñymbai sapeka. 24 Opaite kuaretare tenta vasu retaivi ouva vatapo reta hai sapevape, hareka mburuvishare yvy ĩãrẽ’õ veruposhu ikokatukue omombaipyshu verã. 25 Hareka hõchere ñymboty’ãĩteipo ara hareka pyharekue shara haipe pỹntu mba’etypo. 26 Hareka meẽposhu reta ikokatukue hareka tenta vasure hĩmbipekue. 27 Tẽvã mbaipeveãmapo hokape ichejy mbai kyava, mbai porãmba’eiteva hareka japuvare. Koñeĩ’ẽ iche verã heere mbyparahava Avisha Ray jykuatiape tykove ryheva.