Rev 3 | TpjSC | STEP | Mbypara jyveshu Tũpa jokueva tũpao Sardispe’õ: Kyrã hei 7 Tũpa Espiritu ĩmerea hareka 7 jasytata: She aikuaa rijapo vekua hareka aikuaa jyve rỹmanorã ajemaĩ oparupi nymbe’uha rĩmeĩteririva.

Revelation of John 3

Sardis pevarã ñee

1 Mbypara jyveshu Tũpa jokueva tũpao Sardispe’õ: Kyrã hei 7 Tũpa Espiritu ĩmerea hareka 7 jasytata: She aikuaa rijapo vekua hareka aikuaa jyve rỹmanorã ajemaĩ oparupi nymbe’uha rĩmeĩteririva. 2 Sareko hareka mypyrãntajy hembyteri’ẽndeva rijapo verã; tẽvã rypoiserima rijapo, shara ahesha rijapova porãã Tũpa hỹnonde. 3 Nymanduahe mbai me’ẽhande vekua hareka rỹhendu vekuare; eijy Tũpa jykoty hareka japoshu heiva. Rysarekoãrã, ahapondekui manarõ’ia rãĩmi, rĩmoambarẽĩvape. 4 Tẽvã Sárdispe mbovyĩ’ẽ mondeva myngyambavare, hãrã hokavare mondeva tĩĩva ryhevepo iko shendie, shara kyrã’ẽ jyveshu retarã. 5 Opa õhẽkaviva ñyrãrõivi, mondepokui mondeava tĩĩva hareka ambaiãpokui hee kuatia tykove ẽẽpyvaivi, heere ambeupo jyveshu Sheru hareka Tũpa jokuevare hỹnonde: 6 Japysa’ia, tyhendu Espiritu heiva tũpao retape.

Ñee Filadelfia pevarã

7 Mbypara jyveshu Tũpa jokueva tũpao Filadelfiape’õ: Kova hei heko kyamba hareka añeteva, David pe’aka ĩmerea, peamarã katumbaa mbava mbotyjya, hareka mbotymarã mbavamba katu peajya. 8 Opa aikua rijapova. Kope apeande pente õche mbavamba katu mbotyva hareka ajema nypyrãta nungambatẽva rijapo shiñee hareka rĩñomiãjy shyree. 9 Ryheshamapo ajapohe verã japurei’ia Satanás ñymbatyvape ryhevare. Hei ijehevare Judio, tẽvã añetẽĩte ha’ẽã. Amiñesukapo nynondekui, kuaa verã aryraihuva. 10 Oupo pyarã’ãkuere opaite ko yvy’ĩãrẽ iko’ia retape, tẽvã aingarekopo ndyrehekui, shara opa rijapo shiñee poimba riroja shyrehe verã. 11 Aijyserima. Ñyngarekokavihe ĩmeryreva, avy mbava typyhỹrõ ndyhevikui mbai tankare ñonoava iju verava. 12 Opa õhẽkaviva ñyrãrõivi, ajapoposhi Tũpa jytũpao ñyrãntahe verã, hareka õhẽjyveamapo haivi, she ambyparapohe shu Tũpa hee hareka shu Tũpa vasu henta hee, haiva Jerusalén py’ahu vate araivi vejyva shu Tũpa ẽvãivi, hareka ambyparapo jyvehe shyree py’ahu. 13 Japysa’ia, tyhendu Espiritu heiva tũpaore pevarã.

Ñee Laodicea pevarã

14 Mbypara jyveshu Tũpa jokueva tũpao Laodiceape’õ: Kova hai he’ikava Amén, mbai heshava japumbava, añeteva heiva, Tũpa japova õñepyrõhe vekua. 15 She aikuaa rijapova, nyry’ỹsãã hareka ndyrakuã. Potaiti nyrỹ’ỹsa maĩrã ndyraku! 16 Tẽvã ndyraku javeĩrirã hareka nyrỹ’ỹsãã maĩrã ndyraku’ãĩteirã, ãvẽẽjypo ndyrehekui. 17 Tẽvã nde rere rikokatuva, opa mbai ohokavindea, tẽvã rikuãã rymondo ndijehe rymbasy verã hareka mbai mba’etyape, ndypavete, ryheshamba kũvaĩpi hareka nynaniã. 18 Hãme rãnga she hainde, reva shyhevi verã ita vera ijuva tatapy opa joheava, añeteĩteape rikokatuma verã, reva shyhevi verã mondeava tĩĩva rỹmonde verã mahẽ ndyreshaha nynaniteirikui, hai mbai ñanotiva; hareka colirio ndyresare rykytyrã ryheshajy verã. 19 She rãnga ãĩngãtashu hareka anupa opaite ahaihuvare. Hãrã ñymykyrẽy hareka eijy Tũpa jykoty. 20 She ãĩme nyrõchepe, hareka ãhẽno; shiñee rỹhendurã, rypeashe nyrõcherã aichepo nderope hareka rykarupo shendiekui. 21 Opa õhẽkaviva ñyrãrõivi ambyvapypokui shyvapyka mburuvisha vasu vapypya, she avapysepyape, she ãhẽkaviva rãĩmi ñyrãrõivi hareka avapyĩma hãndi Sheru vapyseape. 22 Japysa’ia, tyhendu Espiritu heiva tũpao retape.