Rev 4 | TpjSC | STEP | Haivima amaĩjy vate araperã ahesha pente õche jypeava. Hãrã ñee tynondeite ahendu vekua trompeta rãĩmiva, heishe: Jupi kope ambishakaponde iko verã.

Revelation of John 4

1 Haivima amaĩjy vate araperã ahesha pente õche jypeava. Hãrã ñee tynondeite ahendu vekua trompeta rãĩmiva, heishe: Jupi kope ambishakaponde iko verã. 2 Haipevaĩ ahesha Espiritu Santo rupii pente vapyhasepya vate arapy, hokavape ĩme’ẽ vapy’õ. 3 Hãma vapyhapyape vapy’õ ova pente ita verava sãkava hovyããveva pyntahũva. Vapyhaseapy jerehe jyi hĩmbipeva pente esmeralda rãĩmiva. 4 Hãrã vapyhasepya jerevejyhe 24 vapyhasepya hareka hokavape vapyñynoĩ 24 kuakuavare tĩĩvapy ñymondeare tankare ñonoava ita vera ijuva ñaka retare. 5 Hãrã vapyhasepyaivi õhẽ hy’apu verasevea, vapyhasepya hỹnonde 7 tataĩndy hendyva sape, hokava reta hai 7 Tũpa ijespiriture. 6 Hãrã vapyhasepya hỹnonde ẽẽjy pente yyvasu mbai sãka jykuapyva rãĩmi. Vapyhasepya mbytepe hareka jerehapya, ẽẽ urũndy hykove’iare tyresare ĩmerea hetere hỹnonde hareka haykue. 7 Tynonde’õ ova java, mokuehea ovajy toro, mbahapyhea kuimbai hova rãĩmi, urũndyhea katy ova pente vyrachevasu veve ohova. 8 Kova urũndy hykove’iare 6 kavi hypepo reta pepenteĩ, hesare oparupi ẽẽshu, opa ara hareka pyhare pyraherã hei: Santo, santo, santo, hai Teja Tũpa ñymbai katuva, hai hykoveñoĩ’ia, hykoveva hareka oujy verã. 9 Hãma urũndy hykove’iare mbyveteshu, omombaishu hareka jyvy’akue meẽshu vapyhaseape vapy’õ, opa ara hykovejy verãpe, 10 hokava 24 kuakuavare ĩñesu Tũpa hỹnonde hareka omombai reta opa ara hykovevape, tankare ñonoava mombo reta vapyhasepya hỹnonderã, hei: 11 “Yreja hareka Yreru, ndeñõi ẽẽ nde nemomba’ea verã, he’ia ndyrehe haikaviteva hareka ñymbai katuiteva; shara nde opa rijapo opa maĩnungare, nde ripotava rupii iko hareka japoha reta”.