Rev 5 | TpjSC | STEP | Vapyhaseape vapy’õ ipo jakata kyty ahesha pente kuatia opa mbapu’ahava, ĩmerea ñee hapype hareka ĩãrẽ hyvavaisho ryheve hareka mbotyha 7 sellope.

Revelation of John 5

1 Vapyhaseape vapy’õ ipo jakata kyty ahesha pente kuatia opa mbapu’ahava, ĩmerea ñee hapype hareka ĩãrẽ hyvavaisho ryheve hareka mbotyha 7 sellope. 2 Haivi aheshajy pente Tũpa jokueva pyrãtaĩteveva hỹnatu ijeta pyrãnduva: “Mbavara ẽẽshu pea verã kova kuatia hareka jorashi verã 7 sello ñonoãheva?” 3 Tẽvã mba’ety vate arare’õ maĩrã yvy‘ipe’õ, katu peava kuatia mbapu’ahava maĩrã maĩhe verã ẽẽpya. 4 Hãrã heta ajaheo, shara mba’ety ẽẽshuva pea verã kuatia mbapu’ahava ma’ẽĩtepy verã. 5 Haipe kuakuavare penteva heishe: “Avy jahe’o, maĩkavi Java Juda ñymoñashia, mburuvishavasu David ñymoñashi vekua, hai õhẽkavi ñyrãrõivi, kova kuatia pea verã hareka jora verã 7 sellore”. 6 Haivi ahesha vapyhaseape, urũndy ĩmeĩteri’iare hareka karai kuakuavare mbytepe, ñymbo‘y’ẽ pente Avisha Ray jukahava rãĩmi vekua 7 ijuu ĩmere hareka 7 hesa, hareka hesare hai 7 Tũpa ijespiritu mondoha vekua oparupi yvy’ĩãrẽ. 7 Haivi Avisha Ray ou, hãrã heky kuatia mbapu’ahava vapyhasepyape vapy’õ ipo jakataivi. 8 Hekyma kuatiarã, urũndy hykoveteri’iare hareka 24 kuakuavare ĩñesu Avisha Ray hỹnonde, pepenteĩ ipopere arpa hareka vaso ita vera ijuva tynyhẽ’õ mbai pishekatuva, hokava he’ise Tũpa ryhevare jurureva. 9 Hãrã jyvache pyrahe reta pente mbyrahe py’ahuva heiva: “Ndeñõi rãngapo katu rypysy ko kuatia mbapu’ahava hareka ryhekyshi verã sellore, ndukahava rehe, hãrã nduruvype yry’ovajy Tũpa pevarã, opaite kuaretare ñymoñashia, opaite tiñeere, henta’õre hareka tentavasure. 10 Hareka Tũpa pevarã rijapo yryhevi mburuvisha vasu hareka paire, huvisha vasurãre iko yryhevi verã ko yvy’ĩãrẽ”. 11 Haivi ahendu Tũpa jokuevare ĩñee hetava vapyhasepya juri, hykove’ia reta hareka kuakuavare, 12 hỹnatu sapukerã hei reta: “Avisha Ray jukaha vekua ẽẽshu pysyma verã mbaikatu hareka ikokatukue, ãrãndu hareka pyrãtakue, mbyveteha verã, õmomba’eha verã hareka pyraheashu verã”. 13 Haivi ahendu opaite japoha vekuare vate arapy, yvy’ĩãrẽ, yvy’ipe hareka yyvasu’ipe hareka ẽẽpyare heirã: Vapyhapyape vapy’õ hareka Avisha Ray pyraheashu, typyraheashu, tomomba’eha hareka mbaikatukuepe, opa arape. 14 Haipe urũndy hykove’iare hei reta: Kyrãpokui! Haivi 24 kuakuavare ĩñesu hareka omombai reta.