Rev 6 | TpjSC | STEP | Ahesha pente Avisha Ray pea tynondehea 7 sello’õ hareka ahendujy penteva urũndy hykove’iare sapukerã hy’apuva rãĩmi, hei: Ei maĩhe!

Revelation of John 6

7 sello tynonde ẽvãre

1 Ahesha pente Avisha Ray pea tynondehea 7 sello’õ hareka ahendujy penteva urũndy hykove’iare sapukerã hy’apuva rãĩmi, hei: Ei maĩhe! 2 Amaĩrã, ahesha pente kavaju tĩĩva. Hãrã ĩãrẽ vapy’ia veru ipope pente vyrapa, haivi me’ẽãshu pente tankare ñonoava, hareka õhẽkavi ñyrãrõivi hareka hykuaĩ õhẽkavijy verã ñyrãrõivi. 3 Avisha Ray peajy sello mokuehearã, ahendu mokuehea kuera’iare hei: Ei maĩhe! 4 Haivi õhejy pente kavaju pyntava, ĩãrẽ vapy’ia me’ẽhãshu mbaikatu heky verã pyavapy yvy ĩãrẽivi, hareka kuaretare opa ijuka verã, me’ẽãjyshu pente kyse marẽyva. 5 Hãrã Avisha Ray peajy sello mbahapyhearã, mbahapyhea kuera’ia hei: Ei maĩhe! Ãmaĩrã ahesha pente kavaju hũũva, ĩãrẽ vapy’ia, ipopere pente mbapesahasepya. 6 Ahendu urũndy kuerateri’iare mbyteivi pente ñee heiva: Ã’ẽ pente kilo trigo maĩrã mbahapy kilo avatiku’i pente ara mbyhepyapyva, tẽvã asaite hareka vino hepy avy hupi. 7 Avisha Ray peajy sello urũndyhearã, ahendu urũndy hykove’iare hei: Ei maĩhe! 8 Ãmaĩrã ahesha pente kavaju ijuva, ĩãrẽ vapy’ia hee “manova”, haykueivi ou mano vekuare ẽvãpe’õ me’ẽãshu reta mbaikatu juka verãre urũrũndy hendape’õ ko yvy ĩãrẽ’õre ñyrãrõpe, ñymbahype, mbairasype, hareka mymba ñarõvare yvy’ĩãrẽ õivi. 9 Avisha Ray peajy sello 5 hearã, ahesha altar’ipe jukahavare hykovekue Tũpa ĩñee rehe hareka mbeujyre hokava ñee rehe. 10 Hãrã hỹnatu sapuke reta: Sheja heko kyamba hareka añeteva, mbaiperapo rĩmbivache hareka rỹmyngoviashu reta irijuka’i vekuare yvy ĩãrẽ ikovare? 11 Hãrã me’ẽhashu reta mondeava tĩĩva hareka he’iashu reta kỹỹmi putuujy verãre, opa manopeve mano verãre Tũpa heepe haire rãĩmi, 12 Avisha Ray 6 sellohea pearã, ahesha iko yvyryryvasu. Kuarasy opa hũũ mondeava jyhasa’asype mondehava rãĩmi, hareka jasy turuvy rãĩmi pyta, 13 hareka jasytatare opa oa vate araivi yvype, oava igo hovyteri’õ rãĩmi yvytu mytymo’ẽ hãka retarã. 14 Hãrã ara syryjy ẽvaivi kuatia mbapu’ahajya rãĩmi, opaite yvyturusu hareka yy hỹmbey’õmi ẽvã rãĩmi yngaty rahajy. 15 Hãma opaite tenta mburuvishare yvy‘ĩãrẽ’õ opa ñemi yvykua hareka ita vasure ñanaipi’õ paũpi, opaite jokuehareare hareka opaiteva haimba jokuehareare, opa ñemi yvyturusu paũpe, hareka ita vasu ñanava paũpi. 16 Hãrã heishu yvyturusure hareka ita vasupe: Pea yrẽãrẽrã ĩrĩñomishi vapyhaseape vapy’õ hỹnondeivi hareka Avisha Ray poshykueivi, 17 vãhẽ ara Tũpa hareka Avisha Ray jahe yryrehe verã, hãrã mba’etypo katu jepyhea.