Rev 7 | TpjSC | STEP | Haivi aheshajy urũndy Tũpa jokueva ñymboy’õre urũndy yvynavape, jocha’õre urũndy yvytu potãã peju yvy’ĩãrẽ, yyvasure’ĩãrẽ, hareka yvyra retarerã.

Revelation of John 7

Tũpa mondojepepo hai ryhevare

1 Haivi aheshajy urũndy Tũpa jokueva ñymboy’õre urũndy yvynavape, jocha’õre urũndy yvytu potãã peju yvy’ĩãrẽ, yyvasure’ĩãrẽ, hareka yvyra retarerã. 2 Haivi aheshajy ynga Tũpa jokueva kuarasy ohẽaivi õhẽ ouva, ĩmerea Tũpa hykove’ia isello, hãrã hỹnatu sapukeshu urũndy Tũpa jokuevare mbaikatu me’ẽãshu vekuare porãmba japohe verãre yvy hareka yyvasure: 3 Heishu reta: Avy pijapohe porãmba yvy hareka yyvasure, maĩrã yvyra retare, opapeve myhã’angahashu syvare ñanu Tũpa ryhevare. 4 Hãrã ahendu opama myhã’anga vekuare: 144.000 mil opaite Israel ñymoñashiare. 5 Juda ñymoñashiaivi 12.000, Ruben ñymoñashiaivi 12.000, Gad ñymoñashiaivi 12.000, 6 Aser ñymoñashiaivi 12.000, Neftalí ñymoñashiaivi 12.000, Manasés ñymoñashiaivi 12.000, 7 Simeón ñymoñashiaivi 12.000, Levi ñymoñashiaivi 12.000, Isacar ñymoñashiaivi 12.000, 8 Zabulón ñymoñashiaivi 12.000, José ñymoñashiaivi 12.000, Benjamín ñymoñashiaivi 12.000. 9 Hokaivima amaĩrã, ahesha kuareta jahe vekua, katumbaa mbava opa papava, opaite hekyava tenta vasuivi, kuareta ñymoñashiare, henta’õre hareka opaite tiñeere, ñymbou ñynoĩ vapyhasepya Avisha Ray hỹnonde, hareka tĩĩvape ñimimondevare ipopere reta karãnday hãka. 10 Hareka hỹnatu sapuke retarã hei: Ñymondojepeva ou ñanu Tũpaivi vapyhasepyape vapy’ẽ, Avisha Rayvi jyve. 11 Opaite Tũpa jokuevare ñymbou jerehe vapyhasepya, hareka kuakuavare hareka urũndy kuareta hykove’iare. Haire jyroa vapyhasepya hỹnonde mbojapeve syvare yvyre hareka omombaivasu reta Tũpa. 12 Hei reta: Amén! Japyraheshu hareka ñambyveteshu, ñameẽshu ãrãndu, ñameẽshu ñandy’ajetekue hareka ñamombaivasushu, ñameẽshu mbaikatu, hareka pyrãtakue ñanu Tũpa opa arapeva. Amén! 13 Hãma kuakuava penteva pyrãndu she: Mbava retara kova mondeva tĩĩvare hareka maĩvira jyveru? 14 She haishu: Sheja nde rãnga rikuaa. Hãrã hai heishe: Kova reta rãnga hai opa jyhasa’asy hasashi vekuare, haire johe mondeva hareka mitĩĩmba reta Avisha Ray huvype. 15 Hãme rãnga ã’ẽ haire ẽẽ Tũpa vapypya hỹnonde, ara hareka pyhare ijokueka ñynõishu jytũpaope, Tũpa ẽẽpo hãndi reta hareka ñyngarekopohe. 16 Ñymbahyveãmapo hareka ju’uheveãmapo reta, haire kuarasy hapyveãmapo hareka iko’asyveãmapo reta hakukueivi. 17 Shara Avisha Ray ẽẽ vapyhasepya mbytepe ñyngarekopohe hareka rahapo meẽshu verã yy õhẽ’õ meẽva tykove, hareka Tũpa opapo joheshu say hesa retaivi.