Rom 10 | TpjSC | STEP | Shyryvyre, shypyape aipotava hareka Tũpape airureva hai, Israelitare ohojepe verãre.

Romans 10

Israel hareka Ñee kaviva

1 Shyryvyre, shypyape aipotava hareka Tũpape airureva hai, Israelitare ohojepe verãre. 2 Aikuakavi haire kyrẽỹte Tũpa heiva japova, tẽvã kuaa kaviã añeteĩte marãrapo japo reta. 3 Haire kuãã Tũpa haiva kuaretare mbyheko kaviva, hai retai pota ñymbyheko kavi jyre ijupe, hareka kyrã iñiñonoã reta Tũpa ñonovape ñanymbyheko kavi verã. 4 Shara Moisés mbypara vekua opahea hai Cristo, opaite jyrojaheare mbyhekoa kavi verãre. 5 Ñymbyheko kaviva ryheva Moisés mbypara vekua, kyrãmba mbypara: “Opaite kuareta japova kova Japoa verã, hai rupiipo iko”. 6 Tẽvã ñymbyheko kavi ouva jyroja rupii hei: “Avy ere ndypyape, mbara jupipo vate arape?” (hokava hai Cristo pota mbyvejy vate araivirã). 7 Maĩrã “mbavara vejypo yvykua vasupe?” (jaishu hai pota Cristo jupijy manovare mbyteivirã). 8 Akuarã, marãra hei mbyparahava? “Mbyryã rãnga’ẽ ndyhevi ñee, ndijurupe hareka ndypyape”. Kova hai ñee jyrojakue ryheva mbe‘uha’ia. 9 Nde rere ndijuruipi Jesús haiva Teja, hareka ndypyaivive ryroja Tũpa mynguerajyva manovare mbyteivirã, reojepepokui. 10 Shara typyaivi rojaha hipitya verã tykove hekope kavi’õ ryheva, hareka tijuruipi he’iha Jesucristo jarojava jahajepe verã. 11 Shara kuatia Mbyparahava hei: “Opaite jyrojaheva, ñymymarãkããpo”. 12 Shara jyvavyã Judiore hareka Griegore; shara penteĩ’ẽ Teja, hareka ha’ĩjy opavare Ija hareka hetavee hai meẽshu hai hẽnova retape. 13 Mbyparahava heiva rãĩmi: “Opaite Ñandeja hee hẽnovare, ohojepepo”. 14 Marãirapo hẽno reta, jyrojambaheare? Marãirapo roja reta hendumbare kova? Marãirapo hendu reta mbamba mbeushuare? 15 Marãirapo oho mbeu reta, mondohambare? Kuatia Mbyparahava rãnga hei: “Haikavi jahesha vãhẽ ou, ñee kavi veruvarã”. 16 Tẽvã opaiñoã israelitare myvãhẽ Ñee Kaviva. Isaías heiva rãĩmi: “Sheja, mbavara roja ñee mbe’uava?” 17 Shara jyrojakue hai ñee hẽnduava rupii ouva, hareka hokava mbe’uava ou Cristo ĩñeevi. 18 Tẽvã apyrãndu: Ĩmera’ẽ hendumbare Ñee kaviva? Hendu rãnga reta! Shara kuatia Mbyparahavape hei: “Haire ĩñee oparupi henduha ko yvy jerekue, yvy japyapeve vãhẽ haire mbeuva”. 19 Tẽvã hykuaĩ apyrãndujy: Ĩmera Israelvare kuãã reta? Tynondemba Moisés hei: Ãma’ẽĩpohe ñymorãã hãndi pente tenta haimba shyrenta ĩrũre, hareka apyrỹmbyposhykapo tenta kuaambare rupii. 20 Haivi Isaías kyjembape hei: “Shyrekamba vekuare, shyresha; pyrãndumba shyrehevare, aijeshakashu reta”. 21 Tẽvã Israel rehe Isaías hei: “Opa ara shepo ãmondoshu pente tenta ñee hẽndumba hareka pya tãntava”.