Rom 11 | TpjSC | STEP | Hãme rãnga apyrãndu: Tũpa mbijicherashu hai ryheva reta? Mba’ety. She hai jyve israelita, Abraham ñymoñashia, Benjamín henta ĩrũre.

Romans 11

Tũpa mbijicheãshu hai ryheva reta

1 Hãme rãnga apyrãndu: Tũpa mbijicherashu hai ryheva reta? Mba’ety. She hai jyve israelita, Abraham ñymoñashia, Benjamín henta ĩrũre. 2 Tũpa hejareiã henta ĩrũ Israel hai arykaivaĩ pyhỹrõ vekua. Pikuããra jyve kuatia mbyparahavape heiva rãĩmi Elías rehe? Marãramba hei arykai pya jyrova Tũpa hỹnonderã Israelva retare? Tũpape ñymboirã? Heirã vekua: 3 “Sheja, jukama reta ñimiñee’iare hareka opa mambai reta ñymbatyhaseaipi. Sheĩĩma apyta hareka pota shukajyre jyve”. 4 Tẽvã Tũpa heishu: “She pevarã yngai ãñono 7.000 kuimbaire, Baal hỹnonde ĩñesumba vekuare”. 5 Kyrãi jyve, ã’ẽpeve Tũpa myhemby vekuamire haire retaivi mbovyĩ pyta Tũpa pya kavikue rupii pyhỹrõvare. 6 Kova rãnga iko Tũpa pya kavi rupii. Ha’ẽã haire mbai japo kavirã. Kyrãrã Tũpa pya kavikue haiveãmapo pya kavi. 7 Hãmera, mbaivara? Israelitare vãhẽãshu reta haire hekava, tẽvã pyhỹrõãvare vãhẽshu hai, hareka ĩrũre Tũpa pya mytãntashi hai, 8 kuatia mbyparahavape heiva rãĩmi: “Tũpa meẽshu reta pente espiritu mbaimba ñanduva mbaimbaa ñandu verãre, ã’ẽ peve, hesare hesha jyvyã hareka japysare henduã”. 9 David hei jyve: “Vy’aseape tikoshi mbai mykatỹrõãvare hareka jypysa, oapy retarã, jaheahe verã! 10 Hesare opa tymbotyhashi hareka heshamba verã kũvãĩpi; kupe opa tijapashi reta opa ara pevarã”.

Ñymondo jepe Judiomba retape

11 Ã’ẽ apyrãndu: Israelitare oa retarã, haipemaĩra pyta pũãmbape? Mba’ety! Ha’eã kyrãva, haikaviveva hai, Judiore ñee henduã retarã, haimbaa Judiovare Tũpa mondojepeshu, Israelitare ñyngareko jyre verã. 12 Hãme, Judiore ñee hendumbaa veru ikokatukue opaite yvy ĩãrẽ pevarã hareka Judiore javyva rupii veru ikokatukue haimbaa Judio retape, ñañonoshu mbaivarapo verukui Judiore ñymbypy’aujymarã! 13 Tẽvã ĩme’are hai pee verã, pee Judiombare. Tũpa shymbou ĩñee ambeu ai verã pynymbytepe hareka ãmombai kova ajapova. 14 Aipota a’ãmore shyryhevare ñyngareko pyndyrehe, kyrãrã a’ãmo hipitypo ñymondojepeva. 15 Shara Tũpa Judiore mbijicheape, he’ise opaite yvy jerekue Tũpa ñymbeujyshuva, mbaivara he’isepo Judiore myvãheãjyshurã? He’iserapo haire ĩmerapore reta tykove, shara aryka’e manova rãĩmi jyre. 16 Shara tynonde muhũ’ũãva pãhã Tũpa me’ẽãshua ky’arã, ky’ã jyve muhũ’ũãva hembyva, hareka jypy ky’ãrã, hãkare ky’ã jyve. 17 Hokava olivoivi, hai Judiore, ã’ãmo hãkãre jasyjaha hareka minjehahe olivo ñanaipi’õ, nde hai hokava haimba Judiova. Hãme rãnga hapopeve rẽĩhe, tykove meẽshua olivo. 18 Tẽvã avypo rirojahe haikavive rẽĩshia Judiore opa mbijicheavare. Nymanduapohe ha’eã nde rijoko rĩñonova hapo, katynga ndoko niñonova hai hapo. 19 Katupo nde rere: “Ẽẽ, tẽvã yvyra hãkãre jasyjaha shimbihi’aha verã”. 20 Haikavi, opa jasyjaha reta shara jyrojãã reta, hareka nde tanta rẽĩ jyrojakuepe. Hãrã avypo riroja ndijehekui; koñeĩ jyrykyje. 21 Shara Tũpa hejareiããshu yvyrahãkare, ha’eã jyve nde hejareii ndyhevi verã. 22 Maĩhe, Tũpa pyakavi tẽvã katu poshy jyve. Pya poshy hãndi opaite oa vekuare hareka pyakavi nendie. Tẽvã rikoã hai potava rãĩmirã, nde ndijasyjahapo jyve. 23 Hãma Judiore oujy jyrojajyhe Tũparã, mbihi’ajypokui, shara Tũpa ĩmere mbaikatu hykuaĩ mbihiajy verã. 24 Nde ndijypyivive hai nde olivo ñanaipi’õ, haivi ndijasyjaha hareka nimbihi’a olivo haikavivare hareka javai’ãĩtevemapo mbihi’aha Judio retare, arykaima hai peeva olivo haikaviva hãka.

Opaite Israelvare ohojepepo

25 Shyryvyre, aipota pikuaa kavi ko mbai ñemiãpe’õ, mahẽ pyrojakui pyny ãrãndurã: A’ãmo israelvare pya mytãnta reta, tẽvã koñeĩpo opama ẽẽ papahava haimba Judiovare vãhẽ Cristo hendaperã. 26 Hãma kova ikomarã, opaite israelvare ohojepepokui, kuatia mbyparahavape heiva rãĩmi: “Pyrỹmondojepe’ia oupokui Sionvi hareka opapo joheshikui mbai porãmba vekua Jacob ñymoñashi vekuare. 27 Kova hai ñee me’ẽãva ajapo handiare, opama ahejareishi mbai porãmba vekuarã”.

28 Hãma Ñee kaviva rehe, Tũpa japohe Judiore hai hyvaishorã rãĩmi; tẽvã Tũpa haihushu reta hãĩrã pyhyrõrã vekua ñytynondeva retape hai ryhevare japo verã. 29 Shara me’ẽhãĩva Tũpa meẽva hekyjyvyã, hareka sareãhe hai pyhỹrõva. 30 Shara ara hasavape, ñee pyhenduããshu Tũpa; tẽvã ã’ẽ israelitare ñee henduãã retarã, Tũpa pyndypareko. 31 Kyrãi jyve, ã’ẽ haire ñee hẽnduveã, tẽvã pe pyndyparekova rãĩmi Tũpa pareko jyveshu reta. 32 Shara Tũpa opa jokoshu reta ñeẽ hẽndumbape, opaiteva parekoshu verã. 33 Tũpa iko katukue ojaiã, ãrãndukue hareka mbaikuaakue Tũpaivi ouva. Mba’ety katu mbeu kavi verã hai potava hareka kuaa verã hai japova. 34 Shara, mbavara kuaa marãra Teja pya mbijeta? Mbavarapo mbarakuaashu? 35 Mbavara tynonde meẽshu Tũpa, haivi Tũpa mbyhekoviashu verã? 36 Shara opaite Tũpaivi ouva, hai rupii hareka hai pevarã. Hĩmbipekue opa ara Tũpa pevarã! Amén.