Romans 14

Jyrojakuepe pyrãntambaterivare

1Pymyvãhẽ kavishu jyrojakuepe pyrãntambaterivare, tẽvã avy pijakapi handi reta. 2Ñañonoshu, ĩme’ẽ pya mbijetava hou verã opaĩ marãrãngatuva ho’uavare, katynga jyrojakuepe pyrãntambaterivare, koñeĩ hou reta ñotỹhavare ia. 3Haikavi opava mbai houva, ha’eã mymorãmba verã kyrãva maĩnunga houmbaa hareka houmbavare ha’eãjy ijetareiihe verã opa mbai houva, shara Tũpa jyvacheĩ myvãhẽshu. 4Hãma nde yngava jokue’õ rỹmaĩrihea, mbavara nde kyrãri verã? Jokue’õ rãngapo kuaa mba’apokavira jokuerea. Hai pyrãtapo’ẽ shara Teja mypyrãta ñonoshu. 5Ĩme’ẽkuei pente ara mbivavyva, tẽvã ĩme’ẽjykuei heiva ara jyvacheĩva. Hãme rãnga pypyape pyrojava pymypyrãnta jyvyĩpo. 6Hãrã pente ara mbyveteveva ĩrũ araivi, kyrã japo Ñandeja pevarã. Hãma opava hou’iare japo jyve Ñandeja pevarã, shara meẽ jyveshu Tũpa jy’ajetekue; kyraĩ jyve maĩnunga houmbare japo Ñandeja pevarã shara meẽ jyveshu Tũpa jy’ajetekue. 7Mba’ety ñanymbytepe ijupii pevarã hykove’ia, kyrãĩjy mba’ety ijupii pevarã manova. 8Ñaĩmeterijairã, jaiko Ñandeja pevarã, hãrã ñamanomarã, ñamano Ñandeja pevarã. Kyrã ñamano maĩra ñaĩmeteri jairã, Ñandeja ña’ãpova ñande. 9Ha’erã rãnga Jesucristo mano hareka kuerajy manovare mbyteivi, ikoshi verã manova hareka hykove teri’iare Ija. 10Mbaiva rehera rijetarihe ndyryvy jyrojava? Marã’irãra ryheshatãã? Opaiteva rãngapo ñande jahakui Tũpa vapy’õ hỹnonde maĩhe verã marãra jaiko. 11Mbyparahavape heiva rãĩmi: “Shiñee ameẽ hei Ñandeja, opaitevapo ĩñesu shynondekui hareka heipo reta she haiva Teja”. 12Kyrãrã pepenteĩpo ñaĩkui Tũpa hỹnonde ñanimbivache verã. 13Hãrã avypo jaijetajai ijehe, avy ñañonoshu ñandyryvy jyrojava ity verã mbai porãmbape. 14She aikuaa, aroja Ñandeja Jesús rupii mba’ety ijuhuvii mbai kyavarã, ĩme’ẽ pya mbijetavarã pente mbai hai pevarã kyarã, ha’ei pevarãĩ kya. 15Tẽvã reuva rehe vy’ã i ndapisharã, rikoveãma jyhaihukuepe. Avy heja reuva rehe tata vasupe opakui Cristo manohe vekua. 16Avy pyheja ijetaha porããhe mbai kavi ĩmepyrea. 17Shara Tũpa vapy’õpe ryheva ha’ẽã karu maĩra ñymbyuva, koñeĩ hekope kavi, pya vapy hareka vy’a Espiritu Santope. 18Kyrã japova Cristo pevarã hai, pya ohohe Tũpa hareka kuaretare mymorãshu. 19Kyrãpo ñañehãã jaiko verã vy’ape, ñañymboryñoĩ verã hareka pepenteĩ ñañymykyrẽỹ jaraha verã tynonde pya vapy. 20Avy mbaishi Tũpa japova ho’uava rehe. Ãñete opa mbai ky’ã, porãmba rãnga hai jaityjy pente kuareta jauva reherã. 21Haikavive ja’ũã soo hareka ñambusururuã vino, avy mbaiva japo rity verã ndyryvy jyrojava. 22Hokava jyrojakue ĩmeryreva, natu nde pevarãĩ Tũpa hỹnonde. Vy’apo hokava mbai haikavi japova mbaivamba jochavape hareka japova rehe porãmba’ẽ verã. 23Tẽvã pyhuva ho’uava rehe, ha’ei jyvare ijehe; shara japoã jyrojakue ryheve hareka opaite jyrojakue ryhevamba japoava, hai mbai porãmba.
Copyright information for TpjSC