Romans 15

1Ñande jairojakuepe ñanypyrãtava, ñamborypohe pyrãtambare rahareva, ñande ñandypya ohohevaĩ jajapotẽ verã hendakuepe. 2Opaitevapo jajapo ñandapisha pya ohohe verã hareka haikaviva jajapo haire pevarã hareka jyrojave verãre. 3Shara Cristo hekããmba typya ohoahe verã, koñeĩ hai japopeveĩ Mbyparahava heiva: “Opaite poshyndevare heindevare opa ou sheãrẽ”. 4Shara opaite Mbyparahava hai ñanymboi kavi verã, ñyhãrõkuaa rupii hareka pya kavi meẽ ñandeva Mbyparahava, ĩmejare verã ñahãrõñaĩva. 5Tũpa meẽva ñyhãrõ hareka pya kaviva, pynymbory pepenteĩ piko kavi ijupii verã, Cristo Jesús iko vekua rãĩmi, 6opaiteva, pente ñeepeĩ pemombai verã Tũpa hareka Ñandeja Jesucristo Tuu. 7Hãrã, pepenteĩ piñymyvãhẽ kavi, Cristo ñanymyvãhẽva rãĩmi, Tũpa hĩmbipeva pevarã. 8Hãrã hai pee Cristo ou iko jyve Judiore jokuerea rãĩmi heshaka verã Tũpa ñy’ãñete, opaite ñichĩchĩkavare, heshaka verã Tũpa añeteva ryheva, my’añete verã ñee me’ẽãva ñanytynondeva retape. 9Hareka haimbava Judiore jypareko rupii pyraheshu verã Tũpa, kuatia heiva rãĩmi: “Hãme rãnga ãrẽmombaipo tentare mbyteipi hareka apyrahepokui mbyrahere ndyreepe”. 10Hykuaĩ Mbyparahava heijy: “Pyvy’a haimba Judiovare, Tũpa henta ĩrũre hãndi”. 11Hareka hykuãĩ heijy: “Pemombai Ñandeja opaite haimba Judiovare hareka pypyraheshu opaite tentamire!” 12Isaías mbypara jyve: “Pũ’ãpo Isai hapo, ñyngarekohe verã opaite haimba Judiovare, haire hãrõpo’ẽshu reta”.

13Tũpa hai, meẽva jyroja, vy’akue pynytynyhẽpo hareka pya vapype pirojahe verã, Espiritu Santo ñymbai katukue rupii pynytynyhẽ ryheve pynypyrãta verã. 14Shyryvyre, aroja katu pynytynyhẽva mbai haikaviva hareka opaite arãndukuepe pepenteĩ piñymbarakuaa kavi verã. 15Katynga, aijehumbape ambyparape a’ãmo maĩnunga potãã pyndysareherã. Tũpa pya kavikue rupii ajapo jyve, 16shara shypyhyrõ amba’aposhu verã Cristo Jesús hareka haimba Judiore amboryshu verã. Ĩme’are ajapo verã paire rãĩmi, ambeu verã Tũpa Ĩñee Kavi hareka arahape pee haimba Judiovare Tũpape me’ẽãva haikaviva, Espiritu Santo rupii mbijicheava. 17She Cristo Jesús airojaheva, airojashijehe mbai Tũpa ryheva retape. 18Shara she ha’ẽã mbaimba vekua aijetahepe verã, koñeĩ mbai Cristo japo vekua retaĩ she rupii, Judiombare ñee hendushu verãre ñeepe hareka japova rupii, 19heshaha verã hareka mbai heshahavare ñymbai katukue, Tũpa jy Espiritu ñymbaikatu rupii. Hãrã kyrã oparupi ambeu Ñee Kaviva Cristo ryheva, Jerusalenvi hareka opaite tenta Iliria juri. 20Tẽvã añehããñoĩ ambeu Ñee kaviva, Cristo ryheva henduambaipi, potãã yngavare jypyrã ñono vekua ĩãrẽ ãmupũãjyrã. 21Haikavive, kuatia mbyparahavape heiva rãĩmi: “Pyheshapokui opaite mapemba mbai kuaahashia, kuaapo retakui mapemba mbai kuaashivare”.

Pablo pya mbijeta oho pohy verã Romape

22Kova rehe rãnga katuã aha apyryhesha, ajema haĩtẽvã aha verã. 23Tẽvã ã’ẽ, kova tenta retaipi mba’etyma ajapo verãrã, hareka heta ãñoma potate aha apohy aipekueipi, 24ãhãrõ ajapokui Españape ahamarã. Ãhãrõ apyryheshakui haipi ahasarã, hareka shymboryhekui aha aiva kyty, tẽvã aikuaa avyapo penendierã. 25Tẽvã ã’ẽ ahapo Jerusalenpe, amboryshu verã ñandyryvyre heko kyambare. 26Shara Macedonia hareka Acayape’iare ha’eire mbaty reta ofrenda heshakapy verã jyparekokue pavetevare pevarã ẽvã ñandyryvyre heko kyambare mbytepe Jerusalenpe’õre. 27Haikavishu reta ha’ire japo verãrã, japo kavi reta, ajemaĩ hai jyve japoñoĩ verãre. Shara kyrã Judio jyrojavare mbijajao jyveshu espiritu ryheva haire hipityva haimba Judiovare, myvãhẽ jyve reta mbai haikaviva espiritupe, kyrã ẽñoĩjyvepe pymbory verã ñandyryvyre maĩnungape. 28Hãrã, opa kavima ajapo kovarã hareka ameẽ kova mbatyavarã, ahapokui España kyty hareka haipi ahasarã ahapo apyryheshakui. 29Hareka aikuaa kavi ãĩ, ãvãhẽpokui pynymbytepe heta mbai kavikue ryheve Cristo ryheva. 30Shyryvyre, Ñandeja Jesucristo rupii airure’asype hareka Espiritu jyhaihukue rupii, pẽĩ shendie verã kova ñyrãrõpe, pimboitẽve shyrehe Tũpape. 31Pirureshu Tũpa shynohẽjy verã jyrojambare Judeape’õ retaivi hareka ñandyryvyre heko kyambare Jerusalenpe’õre myvãhẽ kavi verã ofrenda arahashuva, 32hãrãpo, Tũpa potarã, vy’ape ãvãhe ahesha retakui hareka katuma pynypãũpe. 33Tũpa pya kavikue tõĩ penendie opaiteva. Amén.