Rom 2 | TpjSC | STEP | Hãme rãnga mba’etyma rere ndijehe verã, jaishu ĩmerãẽva nde rĩmbivachekariva. Kyrã rijaporã ndeiima rĩñimbijichekari, shara haire rãĩmi rijapo jyve maĩnunga.

Romans 2

Tũpa pirĩmbivache hekope kavi

1 Hãme rãnga mba’etyma rere ndijehe verã, jaishu ĩmerãẽva nde rĩmbivachekariva. Kyrã rijaporã ndeiima rĩñimbijichekari, shara haire rãĩmi rijapo jyve maĩnunga. 2 Jaikua rãnga Tũpa mbivacheka mbai porãmba japo’ia retaperã, hekope kavi mbivacheka. 3 Nde rĩmbivachekariva yngare, kyrãmi rãnga rijapori jyve, mbyryny rijavy. Rĩmoãra katu rỹkañyshi Tũpa ñunupa? 4 Rĩmbijiche, opambava Tũpa ñymbai kavi, pyakavikue, hareka ñyhãrõkuaa, rikuamba rỹmondova hokava ñymbai kavikue katu ndyverujyva Tũpa kyty. 5 Tẽvã ndypya tantaivi rĩmbeujyvyãhe porãmba vekuarã, rỹmbatypo ryraha ñunupa ndeii pevarã ara poshy pevarã, Tũpa heshakapokui ñimbivache hekope kaviva. 6 Shara Tũpa pepenteĩpo meẽshukui japo vekuare rupii. 7 Tũpa meẽposhukui tykove opambava, opaite haikavivaĩ japo’iare, haikavivaĩ Tũpaivi hekavare, mandu’akavihea hareka pente tykove katumba mambaihava. 8 Tẽvã pota ha‘epaite’iare, poshypepo jahehekui, he’iseva opaite añeteva ñymbyvaisho’iheare, hekopemba’õvaĩ haihuva. 9 Opaite heko poshyvare jahehapohekui hasyshurã jyvarehea; tynondepo’ẽ, Judiore hareka jyve haimba Judiore. 10 Hãma haikaviva japoñoĩ’iare, Tũpa meẽposhukui tenda haikaviva, mbyvetehapo hareka pyavapy, tynondepo Judiore hareka jyve haimba Judiore. 11 Shara Tũpa hỹnonde kuaretare opaĩ jyvache!

Judiore hareka mbyparahava japoa verã

12 Opaiteva porãmba japo’iare kuambava Moisés mbypara vekua japoha verã, jyvarehapohekui mbyparahava japoa verãmbape; hãrã opaite mbai porãmba japova Moisés mbypara vekua kuaatẽvã, mbyparahava japoa verãpypo mbivachehaka. 13 Shara Tũpa mbyheko kaviã Moisés mbypara vekua hẽndupeveĩ’ia, koñeĩ hendurã japovaĩ. 14 Shara haimba Judiovare japo jyve ñee mbyparahava japoha verã Tũpa ryheva, ajemaĩ kuambatẽva, shara haire kyrã potarã, kuaa reta mbaivara haikaviva hareka mbaivara porãmba. 15 Kyrã heshaka reta haire ĩmereare pyape, ñee mbyparahava Tũpa ña’ãpova. Haire pyape’õtei my’añeteshu reta, hareka pya mbijetaheape heiposhu reta haikavivara maĩrã porãmbara. 16 Opaitepo ikokui kova vãhẽma ara Tũpa mbivacheka verã Cristo Jesús rupii opaite kuaretare ñomire vekuarã, kova Ñee Kaviva ambeuva heiva rãĩmi.

17 Nde rĩmbyheeriva Judio, rirojahe Moisés mbypara vekua hareka nu Tũpa rehe rirojajy ndijehe. 18 Rikuakavi Tũpa potava, hareka rikatu ryhekapy, haikaviva hareka porãmba. Shara kyrã nymboi ñee mbyparahava japoha verã, 19 rirojajy ndijehe moa rikatu ryrahava heshamba kũvaĩpiare hareka rysapeshu verã pyntuaipi’iare. 20 Shara ĩmeryre ndepope Moisés mbypara vekua japoha verã, rerema ndijehe nde haiva ñymboimbare mboirea hareka ãrandu ija hareka añeteva. 21 Tẽvã, marãĩrapo rỹmboijy yngare, nderãnia tynonde rikuarã? Marãrapo rỹmboijyhe manarõmba verã, ndeteiva rỹmanarõrirã? 22 Nde rereva yngangava pota’ijya japohamba verã, marã’ĩrãra rijapo? Rỹmymorãã ta’ãngare, tẽvã marã’ĩrãra rỹmanarõjy jytũpao retape? 23 Rirojahe ĩmeryre Moisés mbypara vekuarã, tẽvã rijapoã, kyrã remomba’ẽãshu Tũpa. 24 Añetei rãnga Mbyparahava heiva rãĩmi: “Kuareta haimba Judiovare ijeta porããhe Tũpa, pyndyrehe rupii” ^{▼▼Kova ñee ẽẽ Isaías 52:5.}. 25 Mba’ẽã rãngaposhu mbava pire chĩchĩka’i Moisés mbypara vekua japoãrã, mbijicheĩrã, hãĩny haimbatẽã pire chĩchĩkava. 26 Ajemaĩ haimbatẽ hai pire chĩchĩavare, tẽvã japo hai reta Moisés mbypara vekuarã, Tũpa ryheva retama jyve, ajemaĩ pire chĩchĩkambatẽãre. 27 Hãme rãnga Moisés mbypara vekua japovare nimbivachekapo, ajemaĩ pire chĩchĩhãmbatẽ haivare. Shara nde ndipire chĩchĩhãmatẽvã hareka ĩmematẽ ryreva Moisés mbypara vekua, mapemba pijapotẽã. 28 Shara añeteĩte Judiova ha’ẽã Judio ikova rãĩmi ikova, hareka heshahahe verã rãĩmi hetere chĩchĩkava. 29 Judiore añeteĩteva hai ñee mbyparahava Tũpa ña’ãpova pyaivive japova, Espiritu Santo rupii, hareka ha’ẽã mbyparava rupii. Kyrãva kuaretare Tũpa pysyĩma hai, ajema kuaretare mbijichetẽvã.