Rom 4 | TpjSC | STEP | Akuarã, mbaivarapo jaihe Abraham hasa vekua, ñanytynondeva?

Romans 4

Abraham jyrojakue

1 Akuarã, mbaivarapo jaihe Abraham hasa vekua, ñanytynondeva? 2 Shara Abraham mbyhekoakavi hai japo vekuarerã, ĩmeñoĩmbapore ojejapohe verã. Tẽvã ha’ẽã Tũpa hỹnonde. 3 Shara Mbyparahava kyambava hei: “Abraham jyrojambahe Tũpa, hãrã Tũpa rekoshu heko kaviva rãĩmi”. 4 Hãrã ã’ẽ, mba‘apo’ia kyrypoti hembyshuva ha’ẽã me’ẽãreiishua, koñeĩ me’ẽãñoĩshu verãĩ rãnga. 5 Tẽvã mba’apombava, Tũpa jyrojaherã mbyhekokaviva mbai porãmbaveĩ japo’ia, ajemaĩ mbai porãmba japo’ia mbaimbatẽã kyrã japoa verã, shara jyrojarã Tũpa mbyhekokavishu. 6 Kyrã hei jyve David, vy’apo kuareta hekope kavi’ia Tũpa ñonoshu hekokavivape’ia rãĩmi ha’ẽã japova rehe.
7 “Vy’apo Tũpa hejareishiva mbai porãmba vekua! Tũpa manduaveãmapohe porãmbava japo vekuare!
8 Vy’apo kuareta mbai porãmba japo vekua Ñandeja hejareiishiva”.

9 Hãmera kova vya hai, pire chĩchĩavare pevarãĩ, maĩrã haimbaa retara jyve? Shara he’iama Tũpa heiheva Abraham heko kaviva rãĩmi, shara hai Tũpa jyrojahe. 10 Marãra mbyhekoa kavishu? Abraham pire chĩchĩkarãvãĩra maĩrã ndei japorãra’e? Ha’eã ajerai, ndei japokarãvãĩ rãnga mbyhekoha kavi. 11 Hãrã Abraham ñonoãhe heshaha verã ñichĩchĩkava sello ñimbivache ryheva Tũpa mbyhekokavimashuva jyrojakue rupii. Kyrãmba Abraham ikoshi jyrojavare tuu, ajemaĩ ñichĩchĩkambatẽãre, hãrã Ñandeja Tũpa reko jyvehe reta heko kyamba rãĩmi jyrojakue rupii. 12 Hareka ñichĩchĩkavare tuu, hareka Tũpa jyroja jyvehe reta, ñanderu Abraham ikova rãĩmi ndei ñichĩchĩkarãvaĩ.

Ñee me’ẽãva Tũpare jyrojavape

13 Shara ñee me’ẽãshuva Abraham hareka opaite ñymoñashiare opa pytashu verãre yvyjerekue ha’ẽã, japoã Moisés mbypara vekuape’õrã, shara Tũpa heimahe heko kaviva jyrojakue rupii. 14 Añete Tũpa ĩñee meẽ vekua ñee mbyparahava japoa verã japovare pevarãĩrã, jyrojakue mba’ẽãmbapo, hareka ñee me’ẽã vekua ikoãpo. 15 Shara Moisés mbypara vekua veru jahe pyryreheva japomba; tẽvã Moisés mbypara vekua mba’etyrã mba’etymbapo porãmba’õ. 16 Hãme rãnga, Tũpa ĩñee meẽva ou jyrojakue rupii, opaite Abraham tayre me’ẽãreiishu verã; ĩñee meeshu opaite ñymoñashiare pevarã, ha’ẽã Moisés mbypara vekuape’õ japo’ia retaĩ, koñeĩ Abraham rãĩmi jyrojava retajy. Hãme rãnga hai opaiteva ñanderu. 17 Mbyparahava hei: Arĩñono tentare hetava tuurã, hokava he’ise Abraham haiva ñanderu, Tũpa hỹnonde, kova haimba Tũpa Abraham rojava, Tũpa meẽshuva tykove mano vekuare, hareka japova maĩnunga ikombaterivare. 18 Ñyhãrõkuaa mba’etymava, Abraham roja hareka hãrõkuaajy, kyrã ikoshi tenta vasure hetava tuu, Tũpa heishua rãĩmi: “Kyrãpo hetakui ñymoña ndyhevivare”. 19 Ajemaĩ Abraham kuakuama 100 ãñomapore, hareka hete tujama hĩnjapo verã, tẽvã poĩãmba jyrojahe Tũpa. Kuaatẽjy hyreko Sara katumba membyva, 20 poĩã roja Tũpa ĩñee meẽ vekua japoñoĩ verã, jyrojakuepe ñymypỹrãtajyvyĩ hareka õmombaijy Tũpa. 21 Abraham rojañoĩ Tũpa ĩmereva mbaikatu opa japo verã ĩñee meẽ vekua. 22 Hãrã, jyrojakue rupii Tũpa ñonoshu hekokaviva rãĩmi, 23 hãrã jyrojakue rupii rekohashu heko kaviva rãĩmi, hareka kova ha’ẽã Abraham reheĩ mbyparahava, 24 ñandyrehe rãnga jyve, shara jaroja Tũpa haitei mupũajy vekua Jesús Ñandejape. 25 Tũpa meẽmba Jesús mano verã mbai porãmba jajapo vekua rehe, hareka mupũ’ãjy ñanymbyhekokavi verã hai hỹnonde.