Rom 7 | TpjSC | STEP | Shyryvyre, aijetape pikuaava Moisés mbypara vekua, pikuããra kuareta hykoveteri’irãmeĩ katu japova?

Romans 7

Õmendamavare hykove ñymyhã’anga

1 Shyryvyre, aijetape pikuaava Moisés mbypara vekua, pikuããra kuareta hykoveteri’irãmeĩ katu japova? 2 Ñañonoshu, tapype omendava ĩme ñymypente hãndi ñee mbyparahava rupii teme ĩmeĩteri’irã; tẽvã teme manomarã, taupe ijyhekymashi ñee mbyparahava omendava ryheva ĩme mypente hãndi vekua. 3 Hãrã ĩme manombateriva hareka yngava kuimbai iko’ijy hãndirã, he’iaposhu javasa’ia. Tẽvã teme manomarã, ijyhekymashi hokava ñee mbyparahava, hareka he’ihãpohe javasa’ia, ajemaĩ yngava kuimbai rekotẽjyva. 4 Kyrãĩ jyvepe shyryvyre, Cristo ñymano rupii pẽĩveamahe Moisés mbypara vekua, ã’ẽ pẽĩma Cristo hãndi, hokava hai Tũpa mupuãjy vekua manovare mbyteivi. Kyrãpo heta mbaikavi jajapo Tũpa pevarã. 5 Shara jaikoteri jajapo porãmba ñandyrete potavarã, ñee mbyparahava mbysareko mbai potakue, hokava mbyheta maĩnunga porãmba japokava ñymano. 6 Tẽvã ã’ẽ manoma mbyparava japoa verã ñymbai katukue’ipe ñandyreva, mbaiveama ñandocha jaijokueka verã Tũpape, tykove py’ahuvape Espiritu Santo ñymbaikatupy, haiveama arykaiva Moisés mbypara vekua tuja vekuapy.

Moisés mbypara vekua rupii ñymypyrãta mbai porãmbava

7 Hãmera jaipo Moisés mbypara vekua haiva mbai porãmbava? Mba’ety! Tẽvã mba’ety mbyparahava japoa verãrã, aikuããmbapo mbaivara mbai porãmba. Aikuããmbapo yngavare ña’ãpova jaipotava ryheva, Moisés mbypara vekua he’ĩãrã: “Avy pota yngavare ña’ãpova”. 8 Tẽvã mbai porãmbava pory, hãrã Moisés ñeẽ mbyparava japoa verã rupii japoshyre opa mbai aipota verã, shara Moisés mbypara vekuambape mbai porãmba vekua manova rãĩmi. 9 Arykai aiko ñee mbyparahava japoa verãmbape, tẽvã hokava oumarã, mbai porãmba vekua kuerajy, hareka she ãmano. 10 Kyrã jehu Moisés ñeẽ mbyparava japoa verã meẽte she verã tykove, shyraha ñymanope. 11 Shara mbai porãmbava Moisés mbypara vekua ñeẽ japoa verã poryrã shymbytavy, hareka ñeẽ japoa verã ha’imba meẽjy she ñymano. 12 Katu jai ñee mbyparahava japoa verã ijuhuvii ky’ã, hareka ñeẽ japoha verã ky’ã, heko kavi hareka haikavi. 13 Hãrã kova mbai haikavivara shyraha ñymano kyty? Mba’ety! Mbai porãmba vekua rãnga, heshaha verã haiva mbai porãmbava; mbai haikaviva rupii hai shuka. Kyrã ñeẽ japoha verã rupii mbai porãmba ijeshaka marãra porã’ãĩte. 14 Jaikuaa rãnga ñee mbyparahava haiva espiritu ryheva, tẽvã she hai pente kuareta me’ẽã vekua jokuearea rãĩmi mbai porãmbape. 15 She rãnga aikuãã ajapova, shara ajapoã potatẽ ajapova, aheshatamba vekuaĩ ajapojy. 16 Hãma potamba ajapovaĩ ajapo’airã, ahesha kavi Moisés mbypara vekua haikavirã. 17 Kyrãrã sheveama ajapo, mbai porãmba vekua shypyape’õ rãnga. 18 She aikuaa kavi shypyape hareka shyretepe mba’ety haikavivarã, potatẽ haikaviva ajapova, katuã ajapo. 19 Shara mbai haikaviva potatẽ ajapova, ajapoã, koñeĩ porãmbava potamba ajapovaĩ, ajapojy. 20 Hãrã porãmbava potamba ajapovaĩ ajaporã, sheveama ajapo, mbai porãmba shypyape’õ rãnga. 21 Hãrã kyrã ahesha kova ñee mbyparahava, potamatẽ ajapo mbai haikavivarã, mbai porãmba vekuaĩ ahesha shypyape. 22 Shara shypyape mbyhory ñee mbyparahava japoha verã Tũpa ryheva. 23 Tẽvã shypyape ãñandu pente mbai shijokova shypya ambijeta kavi verã: Hokava hai ñee mbyparahava mbai porãmba ryheva, shypyape ẽvã hareka shymbyperesotei’i. 24 Shymbypavete’i! Mbarapo hekyshyhevi kova ñymanokue ẽvã shyretepe? 25 Ameẽshu shy’ajetekue Tũpa, Ñandeja Jesucristo rupii. Koñemahea: Aikuaa ajapoñoĩ verã ñee mbyparahava Tũpa pota japoashuva, tẽvã shyrete ikangyrã, ãĩmeĩ’ãĩ ñee mbyparahava mbai porãmba japoa verãpe.