Rom 8 | TpjSC | STEP | Hãrã, mba’etyma ñunupa opaite Cristo Jesús ñymypente hãndiare, opaite ikomba hete potavape, koñeĩ iko Espiritu potavape.

Romans 8

Tykove Espiritu Santo potava rãĩmi

1 Hãrã, mba’etyma ñunupa opaite Cristo Jesús ñymypente hãndiare, ^{▼▼Kova mba’ety hai arykai mbyparahavape.}opaite ikomba hete potavape, koñeĩ iko Espiritu potavape. 2 Shara ñee mbyparahava Espiritu ryheva japokava meẽ tykove Cristo rupii, ^{▼▼A’ãmo mbyparaha vekua hei “ndyreky”.}shyrekyshi ñee mbyparahava mbai porãmba ryheva hareka ñymano. 3 Shara Tũpa japo, Moisés mbypara vekua katumba japova, shara kuaretare hete potavape katuã ĩñeerendu, Tũpa mboumba Tay pente tyretepe kuaretare mbai porãmba japo’ia hete rãĩmi, hareka mbai porãmba rehe jukaha verã, kyrã jahehe verã mbai porãmba tyrete potava ryheva. 4 Hokava japoha hekopekavi iko ñandyrehe verã ñee mbyparahava, shara ñande jaikoveama ñandyrete porãmba potava rãĩmi, koñeĩ jaiko Espiritu potava rãĩmi. 5 Shara opaite ikovare hete potava rãĩmi, ha’ẽĩ pya mbijetahe japo verã hete potava, tẽvã Espiritu potava rãĩmi ikovare, Espiritu ryhevaĩ pya mbijetahe. 6 Shara ñandypya ñambijetahe ñandyrete potavairã raha ñymano kyty, tẽvã Espiritu ryheva jaikoherã, ĩmepojare tykove hareka pyavapy. 7 Hãma hete potavaĩ japo’ia, iko ñymbyvaishohe Tũpa; shara japoã Tũpa ryheva ñee mbyparahava, ajemaĩ potatẽã ẽãshu japo verã. 8 Hãme rãnga hete potavaĩ japo’iare katuã mbyhory Tũpa. 9 Tẽvã pee pikoveama pyndyrete potavape, koñeĩ Espiritu potavaima, ĩmepyre Espiritu Tũpa ryhevarã, tẽvã ĩme’ẽ mba’etyreva Espiritu Cristo ryhevarã, ha’eã hai ña’ãpova. 10 Tẽvã Cristo ẽẽ pyndypyaperã, ajemaĩ pyndyrete manotẽvã mbai porãmba vekuare, espiritu iko shara Tũpa ñanymbyheko kavima. 11 Ãñete iko pyndypyape Espiritu Tũpa ryheva arykai Jesús mynguerajy vekua manovare mbyteivirã, hokava Jesucristo mynguerajy vekua, mynguerajypokui pyndyrete mano verãre, Espiritu Tũpa ryheva iko pyndypyapeva rupii. 12 Hãrã shyryvyre, ĩme’ẽ jajapoñoĩ verã, tẽvã ha’ẽã ñandyrete potava rãĩmi. 13 Shara piko pijapo pyndyrete potavarã, pymanopokui; tẽvã Espiritu rupii pijuka pyndyrete potavarã, pipitypo tykove. 14 Opaite ikova Espiritu Tũpa ryheva potava rãĩmirã, hai hokava Tũpa tayre. 15 Shara me’ẽhãpe espiritu pikojy verã jokuehareirea rãĩmi, pykyjeĩpijy verã. Kyrãtẽ verã, Espiritu japo pyndyhevi Tũpa tayre rãĩmi, hai rupii katu ja’eshu Tũpa: “Abba Teru!” 16 Hãrã Espiritu kuaaka ñande ñandypyape ñande haimava Tũpa tayre. 17 Hareka ñande hai tay retarã, ha’eĩ jyve ñande tay tynondevare; Tũpa tay tynondevare, hareka tynondeiteva Cristo hãndi, añeteĩte jahasa’asy Cristo handirã ñanymbyveteapo jyve handikui. 18 Kyrã, jyhasa’asy ã’ẽ jahasava mba’ẽã, ñambivachehe hĩmbipeva Tũpa heshaka ñande verãrã. 19 Shara opaiteva Tũpa japo vekuare hãrõñynoĩvape ikoraiñynoĩ, heshahaka verã ãñete ñande haiva Tũpa tayre. 20 Opaite japoha vekua ãñete opareii, ha’ẽã hai kyrã potarã, Tũpa kyrã potarãmeĩ rãnga; tẽvã japoha vekuare ĩmeteri’ẽshu ñyhãrõkua, 21 japoa vekuare opa ma’ẽĩjyhe verã opa mambaia verãĩvi hareka porãmbape jokuehareirea. Hipity verã vya hĩmbipeva opa nohẽãjy verãpe Tũpa tayre. 22 Ñande rãnga jaikuaa opaĩ japoha vekuare jahasa’asy, taupe memby’ẽ verã rãĩmi hasa’asyrã. 23 Ha’ẽã hairetaĩ, ñande ñandijehetei jahasa’asy jyve, ajemaĩ ĩmematẽjare Espiritu tynonde me’ẽã ñandeva japity verãvaivi. Ñahãrõteñaĩ Tũpa ta’yrã ñandapo verãpe, hareka ñandyrete nohẽshi verã porãmba vekua. 24 Kova ñyharõva rupii ñanymondoajepe. Tẽvã ñahãrõñaĩva heshahava, ha’ẽã hai ñyhãrõva; shara mbavara hãrõ’ẽ ĩmemareva? 25 Tẽvã ñaharõñaĩ jaheshambavarã, ñyhãrõkuape ñahãrõ.

26 Kyrã Espiritu ñanymbory ñanykangyñaĩrã. Shara jaikatuã ñaĩmboi, ñaĩmboi verã rãĩmi, tẽvã Espiritu teiva Tũpape jurure ñandyrehe, katumba ĩñee rupii kuaahava. 27 Hãma Tũpa opa maĩ kavihea ñandypyape’õ, kuaa mbaivara Espiritu pota hei, shara Tũpa potava rãĩmi jurure’ĩãrẽ opaite jyrojava kyambare. 28 Hareka jaikuaa kavi opaite haihuvare Tũpa, opa mbaipe mboryshu haikavivape, hai hẽno vekuare hai potava rãĩmi. 29 Shara opaite Tũpa kuaamavare, õñepyrõãivive pyhỹrõ ova verãre Tay hã’anga, tyvyre hetava mbytepe ikoshi verã tynondeva. 30 Hãma õñepyrõãivive pyhỹrõ vekuare hẽnoshu, hareka henoshu vekuare mbyheko kavi, hareka mbyheko kavishu vekuare õmombaishu. 31 Mbaivaverapo ja’e? Tũpa ẽẽ ñanendierã, mbavarapo ñymbyvaishojy ñandyrehe? 32 Hai haihuããmba ñandyhevi Tay, hãma ma’ẽĩmbahe mano ñandyrehe, marãrapo me’ẽã jyve ñande Tay hãndi, opa mbai mba’ety ñandeva? 33 Ĩmera’ẽ mbava ijeta porãmbahe verã Tũpa pyhỹrõvare? Tũpa teiva rãnga mbyheko kavishu reta. 34 Mbarapo katu jahehe reta? Cristo rãnga hai mano vekua, ĩãrẽve hai kuerajy manovare mbyteivi, hai ĩme’ẽ Tũpa jakata kyty, hareka hai jurure’ẽ ñandyrehe. 35 Mbarapo ñandyrekyshi Jesucristo jyhaihukue? Jyhasa’asyra, vyamba vekua, maĩrã nymoñahãvapera, ñymbahykuera, maĩrã nynanivapera, ñanyngyjeavapera, maĩrã ñymanora? 36 Mbyparahava rãĩmi: “Ndyrehe rãnga urukaha verãĩma ikoha; avisha rãĩmi yryrahaha urukaha verãpe”. 37 Opa mbaipe mba’ety jepy ñandyreheva, Jesucristo rupii ñandyraihu vekua. 38 Hãrã tãnta airoja’ãĩ, ñymanoĩmba, tykoveĩmba, Tũpa jokueva retaĩmba hareka mbaikatukue retaĩmba, ã’ẽvã retaĩmba, ou’ẽ verãĩmba, 39 vate arape’õvãĩmba, yvykuape’õvã, mba’ety Tũpa japo vekua ñanymbysyryshi verã Tũpa jyhaihukue, hai heshaka ñande Cristo Jesús Ñandeja rupii.