Rom 9 | TpjSC | STEP | She Cristo airojaheva, añeteva hai, shapuã. Hareka shypyaivi hai Espiritu Santo pyrỹmboiheva, heishe ko haiva añeteva,

Romans 9

Tũpa pyhỹrõ Israelitare

1 She Cristo airojaheva, añeteva hai, shapuã. Hareka shypyaivi hai Espiritu Santo pyrỹmboiheva, heishe ko haiva añeteva, 2 avya ãĩte rãnga, hareka shypyape pente hasyva opamba shyheviva. 3 Shara shetei aipota jahea shyrehe, Cristo asyryshiape, shyryvyre ahaihurã hareka sheii shyrẽnta ĩrũre. 4 Hai reta rãnga Israelita, Tũpa pyhỹrõshu reta ta’yrã, Tũpa ẽẽmba hãndi reta heko hĩmbipe vekua ryheve, hareka japo ñee me’ẽãva, meẽshu reta Moisés mbypara vekua, haikavi õmombaivasu verãre hareka ĩñee meẽ. 5 Hai reta rãnga ^{▼▼Kova mondoahe Abraham, Isaac hareka Jacob.}ñanytynondevare ñymoñashi vekuare, hareka kuareta hekope Cristo oujyve haivi, hai rãnga Tũpa opa mbai ĩãrẽ’õ. Tomomba’ea vasushu opa ara pevarã! Amén. 6 Tẽvã ha’ẽã Tũpa ĩñee javyrã, shara opãĩñoã Israel ñymoñashiare hai añeteĩteva Israelita. 7 Opaĩñoã Abraham ñymoñashiare, hai añeteĩteva tayhea; shara Tũpa heimbashu: “Ñymoña ndyhevivare oupokui Isaac rupii”. 8 Kova heshaka ñande, mba’ety Tũpa tay ikoshia, mbava henta ĩrũrãrã. Koñeĩ Tũpa ĩñee meẽ vekuape oajyva reta, hokavare ikoshi Abraham ñymoñashia. 9 Shara kova hai Tũpa ĩñee meẽshu vekua Abraham: “Jy’arapepo aijykui, hãrã Sara ĩmemaporekui memby”. 10 Tẽvã kova hokapeiã opa. Rebeca memby mokue’õre penteĩmbare reta tuu, hokava hai ñanytynondeva Isaac. 11 Hareka ndei oa retarã, nde’iave japo reta mbai haikaviva maĩrã porãmbavarã, hareka Tũpa potava ẽẽ verã hai pyhỹrõva rãĩmi hareka ẽãhe kuareta japova, koñeĩ hẽnoãva rupii. 12 Hãme rãnga, Tũpa heishu Rebeca: “Nymemby tynondeva, taykueva nymembypo jokuerekui”. 13 Hokava ẽĩ jyve Mbyparahavape: “Ahaihu rãnga Jacob, tẽvã Esau aheshatãã”.

Tũpa ha’ẽã hai heko kavimba

14 Ja’eraposhu, Tũpa heko jyvachembave? Mba’ety! 15 Shara Tũpa heimbashu Moisés: “Aparekoposhu, pota aparekova; ajapo kavipohekui, pota ajapo kavihea”. 16 Hãrã ha’ẽã kuareta pota hareka õñehããrã, Tũpa rupii rãnga, hai pyryparekova. 17 Shara kuatia Mbyparahavape heishu Faraón: “She ãriñono Egipto juhuvisha vasurã, nde rupii ãmbishaka verã pyrãtãkue ĩme’areva, hareka shyree opa kuaaha verã ko yvy’ĩãrẽ”. 18 Hãrã Tũpa parekopo, hai pota parekovape, hareka pota pya mytantashiva, hai mytantashi. 19 Tẽvã rereposhe: “Kyrãrã, mbaivarapo Tũpa kuareta mbojajyhe? Mbavara katu jokoshi hai pota japova?” 20 Hãma nde kuimbai maĩrã taupe. Mbavara nde rỹmbyhovai verã Tũpa? Timbipory yvyivi japohavara heiposhu japo vekua: “Marã’ĩrãra kyrã shapo?” 21 Tujure mba‘apo’ia rãnga ẽẽshu tujuivi pota japova, japo verã, hareka hokava tujuivi katu japo timbipory pentevapẽĩ poryha verã, hareka yngavape katu japoshi opavape poryha verã. 22 Tũpa, pota heshaka marãra hai purũnupa, hareka heshaka verã pyrãtãkue, heta hãrõkuaatẽ timbipory tujuivi japoava, haiva kuaretare mbyposhykarevare, ẽẽshua jaheahe verãre hareka jyvarehahe verã. 23 Kovape, hai heshaka ñande jyhaihukue hareka ñymbaikatu ñanymondojepe verã. Hareka heshaka verã hai hĩmbipe ikokatukuere ñande haiva timbiporyre arykaima japova haikavivare pevarã, heshakashu hĩmbipeva. 24 Kyrã Tũpa ñanyrẽno arykai Judiovare mbyteivi hareka haimba Judiovare. 25 Kuatia Oseaspe heijyve: “Shyrẽta ĩrũre haiposhukui, haimbavare. Haihumbava, haiposhukui ahaihuva. 26 Haipe he’iashua retape: Pee ha’ẽã shyrẽta ĩrũre, he’iaposhu retakui Tũpa hykove’ia tayre”. 27 Tũpa ĩñee mbeu’ia Isaías sapukeape hei Israelitare: “Ajemaĩpo israelitare yvykui yyvasu hỹmbeypi’õ rãĩmi heta, koñeĩpo ohojepe retakui Tũpa myhemby vekuamire, 28 shara ãrẽ’ãĩtepo Ñandeja opa japokui ko yvy’ĩãrẽ hai hei vekua”. 29 Isaías arykai hei vekua rãĩmi: “Teja Ñymbaikatuva, hejãã ñande ñandyra’yrãrã, ikombapo ñandyhevi, tenta Sodoma hareka Gomorra rãĩmi”.

Israelitare hareka Ñee kaviva

30 Mbaivarapo ja’eshu kova? Jyrojakue rupii rãnga Tũpa opa mbyheko kavi haimba Judiovare. Hokava he’ise jyrojakue rupii haimba Judiovare hipityva teko kavikue; 31 tẽvã Israelvare oho reta Moisés mbypara vekua haykue mbyheko kavishu verãre, tẽvã hipityã reta. 32 Marã’ĩrãra hipityã reta? Shara japovare rupii pota hipity reta hareka ha’ẽã haire jyroja retarã. Hãme rãnga vapihe reta “ita pyrỹmbyvapi’õ”. 33 Mbe’uhava rãĩmi kuatia Mbyparavape: “Ãñono pente ita Sionpe, ita mbyvapi’ẽ verãre; jyrojaheva ñymymarãkããpo”.