Tit 1 | TpjSC | STEP | She Pablo, Tũpa jokueva hareka Jesucristo jy Apostol, shyrẽno Tũpa pyhỹrõvare jyrojahe verã hareka kuaa verãre Tũpa ĩñee añeteva, heshahakava tykove mbijicheava Tũpa pevarã rupii.

Titus 1

Pablo mbyparashu Tito

1 She Pablo, Tũpa jokueva hareka Jesucristo jy Apostol, shyrẽno Tũpa pyhỹrõvare jyrojahe verã hareka kuaa verãre Tũpa ĩñee añeteva, heshahakava tykove mbijicheava Tũpa pevarã rupii. 2 Ñahãrõ ñaĩva hai tykove opambava. Tũpa japuã, shara Hai heimba aryka’e meẽ ñande verã kova tykove. 3 Hãrã jy’arape kavipo pyrymbykuaaka ĩñee, Tũpa ñanymondojepe’ia heishe vekua ambeu verã. 4 Kova kuatia ambyparande Tito, nde hai she pevarã pente tyray añeteĩteva rãĩmi jyrojakuepe. Tũpa hareka Ñandeja Jesucristo ñanymondojepe’ia jyhaihukue tivishava hareka pyakavikue toĩ nendie.

Marãrapo iko tũpaope miñaka’ia

5 Hokava rehe aryreja Cretape, opa rỹmyhenda kavi hareka ryhekapyrã hareka rĩñono verã tũpaope miñaka’õ tentare ẽvãipi, she haindeva rãĩmi. 6 Tũpaope miñaka’õ heko ky’ãpo, hyreko penteĩpo, tay hareka tajyre jyrojapo jyvehe Jesús, mahẽ he’iahe retakui heko porãmba hareka ñee hendumba’iare. 7 Shara tũpao miñaka’õ, ñyngarekopohe Tũpa ña’ãpovare, hãme hekope kavipo’i, ha’ẽã ñymbyvete’i verã, avypo poshypareii, avy tyka’u hareka ha’eãjy ñyrãrõ’i verã, hareka avy typota kyrypoti hekopemba’õ. 8 Kyrãte verã, ñyngareko kavipohe ñumbuhupare, pyryraihupo, ñerãmbapepo iko, heko kavipo, ñymyngy’ãposhu Tũpa hareka ñyngarekopo ijehe. 9 Tantapo’ẽhe ñee añeteva, mbarakua verã jyve yngava arakua kavivapy hareka roja verã yngare ñee ñymbyvaisho’iheare. 10 Shara heta’ẽ ñakareĩ’iare, ĩñeengãtuvare hareka pyrỹmbytavyĩ’iare, tynondeite’ẽ potañoĩ pire chĩchĩava ryheva japoashuare. 11 Hokava retape katu rĩmichirĩrĩ, shara opa porãã ñono oope’õre, pyrỹmboi jyrehe mbai japuva ryheva mbyhepyapyshu verã kyrypoti hekopemba’õ. 12 Pente kuimbai hairetava, Tũpa ĩñee mbeu’iare Cretape’õ, heihe henta ĩrũre: “Cretavare jajapuñoĩ, mymba ñarõvare rãĩmi ñymo’ãhashi, kakaruvare hareka ñateteỹvare”. 13 Añeteva hei; hãrã poshy ryheve ereshu reta, tantangãtu ñynoĩ verã jyrojakuepe. 14 Mahẽ roja retakui ñeẽ nohẽãreiva Judio retaivi hareka ñeẽ japoha verã kuareta retaĩ hei vekua añeteva syryshiare. 15 Heko kyambava pevarã opava ky’ãshu hai, katynga heko kyava hareka rojambare pevarã mba’etyshu hai kyambava. Mbai kya vekuaĩ ñakapyre hareka pyape. 16 Hei reta kuaava Tũpa, tẽvã japovare rupii jykuahe reta heireii jyrerã; kuaretare heshatããshu reta hareka ñee henduã reta, ẽẽãshu mbai haikaviva japo verãre.