Tit 2 | TpjSC | STEP | Tẽvã nde rijetahe pente ñeepe’ẽheva pyrỹmbo’eaheva kapyryva.

Titus 2

Arakuaa haikaviva ryheva

1 Tẽvã nde rijetahe pente ñeepe’ẽheva pyrỹmbo’eaheva kapyryva. 2 Kuakuavare mbai hekopeñoĩpo japo reta, japo kavipohe yngavare hareka ñakavapy verã, tanta jyrojava, jyhaihukuepy hareka jepyhe verã jyhasa’asy. 3 Kyrãmi jyve taupe kuakuavare, ikopo jyve kuareta Tũpa haihuvare rãĩmi, avypo ñee ryheva reta, avy tyka’u, haikavivaĩpo pyrỹmboihe. 4 Tymboihe kuñataĩre haihu verã ĩmere hareka membyre, 5 ñakavapy verã, heko kyamba verã, tingarekokavi hentape, pyakavipo reta hareka ĩmere ĩñeereĩpo iko reta, mbavamba ijeta porãmbahe verã Tũpa ĩñee. 6 Mykyrẽy jyveshu kunumire ñakavapy verã, 7 ndeteivapo ryheshaka marãra japoha mbai haikaviva, pyrỹmbo’eahea haikaviva rupii, pya kavipe, 8 pyrỹmbo’eahea kapyryva rupii, mbavamba porãmba hei verã. Kyrãrãpo, ñymbyvaisho ndyreheva ñymymarãkakui, vãhẽãposhu porãmba hei ñandyrehe verãre. 9 Rỹmboipo jyve jokuehareare opaĩ japoshu verã pyrokue’õ heishuva; tijapo mbyvyashu verã hareka avy tijetapareii. 10 Avypo manarõ, heshakapo jyrojahahea, opavare hykovere heshahe verã haikaviva pyrỹmbo’ehaheva Tũpa Ñanymondojepe’ia ryheva. 11 Tũpa jyhaihukue tivishava heshaka opaite kuareta retape, veru ñymondojepeva kuaretare pevarã. 12 Ñanymboihe jaheja verã mbai porãmba hareka mbai potakue ko yvy‘ĩãrẽ’õ, jaiko arãndupe, heko kavipe hareka tykove mbijicheava Tũpa pevarãpe, 13 ñahãrõteri ñaĩvape hĩmbipekue ryheve ou verã ñanu Tũpa ojaimbava hareka Ñanymondojepeva Jesucristo. 14 Hai ñymeẽ ñandyrehe mbai porãmba vekua ñandijorashi verã hareka opa kavi ñandohe, iko ñandyhevi verã henta’ĩrũre, mbai haikavivaĩ japo’i verã. 15 Hỹnatu ñimiñeehe kovare, rỹmykyrẽỹ hareka rỹmbyhaikavi verã kuaretare. Avy heja mbava timbyhory ndyrehe.