Titus 3
Jesús jyrojaheva japo verã
1Opaiteva mymandu’akahe tiñiñono jyve huvisharã’õre ipope, ñee tyhendu hareka õĩñoĩpo japo verã haikaviva. 2Avypo mbava ijeta porããhe yngavare hareka avypo potaĩ ñyrãrõjyre, pyryraihupo, heshakapo heko kavikue opaite kuareta retape. 3Ore mba’eã kuaaha jyve arykai, ñee henduhãã, kuahãã ikohavaipi, mbai porãmbape yrokueha’i hareka mbai potakuepe. Ikoha’i porãmbavape hareka ijeshatambavape, yryreshatãã reta hareka oreĩ opa jyhaihuhaveã. 4Tẽvã Tũpa Pyrỹmondojepeva heshakama pya kavikue hareka jyhaihu opaite kuaretaperã, 5ñanymondojepe haimbatẽ mbai haikaviva jajapo jairã, shara ñandypareko. Ñandohe mbai porãmbavaivi, ñanymby’oa py’ahujy hareka Espiritu Santo rupii meẽ ñande tykove py’ahuva. 6Jesucristo Ñanymondojepeva rupii, hetakavi ñohẽ ñandyrehe kova Espiritu, 7Hai, ñanymbyheko kavi verã jyhaihukue tivishava rupii, japity verã tykove opambava ñahãrõva. 8Kova rãnga hai ñee añeteva hareka aipota hykuaĩ rerejykui kova mbaire, õñehã japo verãre Tũpare jyrojavare haikaviva. Kova mbaire haikavi hareka opava pevarã poryha verã. 9Tẽvã ijijokoshi ñeereii vekuare, ñee aryka’evare mbeu vekua hareka Moisés mbypara vekua japoa verã rehe ijakava. Kova mbai reta rãnga mbaivapeã haikavi hareka mbavapeã mboryshu. 10Ĩme’ẽ potaĩ pirĩmbijao’iarã, ñimiñeeshu pente maĩrã mokuejy; hãrã potãã nyrẽndurã rỹmohẽpo tũpaovi. 11Rikuamapo hokava kuareta javyva hareka mbai porãmba japoma hareka hai pyape mbijetavaĩ jyvarehe.Marãndu opahea
12Arỹmondoma Artemas maĩrã Tiquicoperã, narẽãmite ei maĩ shyrehekui Nicópolispe, shara haimaje haipe ro’ykue ahasa verã. 13Mborykatu jyveshu pyryrepy’ia Zenape hareka Apolope, meẽshu maĩnunga ikotẽvehe verã ohomarã. 14Ñandyryhevare tikuaa jyve haikaviva japo verãre hareka mborypo reta ikotẽvevare hareka kyrãrã hetapo japo reta mbai haikaviva. 15Opaiteva ẽẽ shendievare nymarãndu. Mymarãnduka jyve ore yryraihuvare jyrojakuepe. Tũpa tymaĩkavi pyndyrehe. Amén.
Copyright information for
TpjSC