Psa 83 | TwiNAK | STEP | O Onyankopɔn, ntena hɔ komm; nyɛ komm! Nyɛ komm! Hwɛ! Wʼatamfo reyɛ basabasa, na wɔn a wɔtan wo no reyɛ dɔm.

‏ Psalms 83

Mpae a Israel bɔ pɛ sɛ wodi wɔn atamfo so

1 O Onyankopɔn, ntena hɔ komm; nyɛ komm!
Nyɛ komm!
Hwɛ!
Wʼatamfo reyɛ basabasa, na wɔn a wɔtan wo no reyɛ dɔm.
2 Hwɛ!
Wʼatamfo reyɛ basabasa, na wɔn a wɔmpɛ wʼasɛm nso ayɛ dɔm.
3 Wɔrepam esum ase atia wo nkurɔfo; wɔrepam atia wɔn a wobɔ wɔn ho ban.
4 Wɔka se, “Bra na yɛnsɛe wɔn man sɛnea ɛbɛyɛ a wɔn werɛ befi Israel kora kora.”
5 Wɔpenee wɔn apam no so kaa wɔn ho bɔɔ mu tiaa wo.
6 Edomfo,
Ismaelfo, Moabfo, Hagarfo,
7 Gebalfo ne Amonfo ne Amalekfo ne Filistifo ne Tirofo ne
8 Asiriafo akɔka wɔn ho ama Amonfo ne Moabfo a wɔyɛ Lot asefo no dɔm no ayɛ den.
9 Yɛ wɔn sɛnea woyɛɛ Midianfo ne Siserafo ne Yabinfo wɔ Kison subon mu hɔ no.
10 Wudii wɔn so wɔ Endor maa wɔn amu porɔwee wɔ fam.
11 Yɛ wɔn a wodi wɔn anim no sɛnea woyɛɛ Oreb ne Seeb no; di wɔn ahene so sɛnea woyɛɛ Sebah ne Salmuna
12 a wɔkae se, “Yɛbɛfa asase a ɛyɛ Onyankopɔn de no” no.
13 Bɔ wɔn hwete sɛ mfutuma,
O Onyankopɔn; sɛ ntɛtɛ a mframa bɔ gu.
14 Sɛnea ogya hyew kwae, sɛnea ogyaframa ma nkoko hyew no,
15 saa ara na fa ahum taa wɔn na fa wo mframa a ano yɛ den no yi wɔn hu.
16 Ma animguase nka wɔn,
O Awurade, na ma wonhu wo tumi.
17 Ma wonni wɔn so nkonim na wɔmmɔ hu daa daa; ma wonwu wɔ animguase pɔtɔɔ mu.
18 Ma wonhu sɛ, wo nko ara ne Awurade Otumfoɔ wɔ asase so nyinaa.