Luke 15

Agarang Cakng kǝ Too

(Mat 18.12-14)

1Vii yenaa ta, angaa yelan pyar ndar pyak ɗaa angaa shaan ram a ta toksa kyaa ta nggǝrng Yeswaa ka kaa yir awung kǝng maksaki. 2Nzup ɗǝ kaɓan Afarisi ɗaa angaa maksan shiiring Musa, ɓora gyer, a sheeki ka, “Sum mari ng yalla angaa shaan ram, ng ryaa awura ryaa ɗǝ yen.”

3Pang Yesu ɓan yen agara mari ka, 4“Kaa shee ka gaat yin, ng ɗaa cakng kaa gang nggagham gaat (100) pang gaat ni too ta kǝshii kyaa ri. Kala a dǝs maa warkǝ kwanas nyar kwanas (99) ki ta arang kǝn ɗǝ ˈyaa yen ta kǝ nak yarang mang kǝ too ki, shee mee ni sok ma rakghaa? 5Ng mee ni sok ma, cira ma fwaa parcaa ɗǝ katla maa ɗoo. 6Ng mee ni nak lokghaa, shee kǝ tokshii amar mee ɗaa angaan kaa pyet ɗǝ mee, kǝ ɓan yen ka, ‘Ɓwakghan mi ta katla maa ɗoo ya, ng sok cak min mang kǝ too panaa.’ 7Ng ɓana yin, kaɓan ni pang a shaa katla maa ɗoo kǝshii toora, tung mu shaan ram gaat kǝ kala shaan maa ram mee, kǝ ɓyak asum warkǝ kwanas nyar kwanas, ng kaa tokghaa shii yen ka a ɗaa sum zar ni, ta yena shangsa maa aɗoo nak yen maa dap ni rak.

Agarang Ketlin Pyarng kǝ Too

8“Koo kaa shee ka yii yen ng ɗǝ ketlin pyar ware, pang gaat too, ˈyobɓa rwaa dugusa, kǝ turi lok ki, kǝ yar kun kun, shee mee ni Sokghai rakghaa? 9Ng mee ni Sokghai, toksa amar mee ɗaa angaan kaa pyet ɗǝ mee, kǝ ɓanyan ka, ‘Ɓwakgaan mi ta katla maa ɗoo ya, ng sok ketlin pyar min mang kǝ too panaa.’ 10Kan kee, mang kǝng ɓan yin, awan tokghaan zarng Vitor shaa katla maa ɗoo, ta shiin sum gaatɗaa mung kǝ kala shaan ram mee.”

Agarang Fan kǝ Too

11Yesu rii nggena shee ka, “Sum yen ta, ng ɗaa awan mɓaa. 12Mang geɓi ki ɓan dǝ mee ka, ‘Dǝ min, nam mi ɓagham min ta kǝshii maa awuu sokghaa mwaa.’ Shee dǝ yen kapshii yen maa awuu sokghaa mee.

13“Ɗaa yisa njot, fan mang geɓi ki tokshii nzup maa wung kǝng ɗǝ mee, nanzu pang niyang ndar yenaa sor sor. Tǝɓang ni pang naa ta wun pyar mee, ta ara tǝwuu yaa. 14Ng kǝ wun nzup maa wung kǝng ɗǝ mee, shee vishiing ɗamaa lǝr ta ndar kyaa. Pang ɗama kap ma, ng ɗǝ awung kǝ ryaa rak. 15Pang nak shaa ɗǝn mu ndar ki maa. Shee sum ki na ma ɗǝn naa maa kangshiin lok mee awura ryaa. 16Ng ruɗaki ka kǝ wuu rii awura ryaa kǝ akangshiin lok ryaaki, nzup ɗǝ kaɓan muɗakghai na ma awuɗakghai rak.

17“Kǝ por tari kǝshii maa ɗoo mee yaa, shee ka, ‘Akoring dǝ min a ɗaa wura ryaan kaa ryaaki kaa kalak. Nzup ɗǝ kaɓan makghai ng ta Kwakyaa tǝɓii ɗǝ ɗama! 18Ng nanzwak kǝng por dǝbari nak ta dǝ mina kǝng ɓan ma ka, Dǝ min, ng shii ram ta nggen Vitora, ɗǝ wokghai maa ket. 19Ng yakghai mang kaa tokghaa mi ka fan mu ta rak. Ryak mi kǝng nak kan kee gaat ta kǝshii maa koring mwaa ri.’ 20Pang nanzu shee por ma nak ta dǝ myaa.

“Kǝ yakghai ma yang, kǝ dǝ mee ɓee ma pang ɓee shoor mee, som ɗaa ɓol nak ta fan myaa, mok kwak mee fur ndus myaa, kap ma shee ɗǝ kǝ kopsa ma.

21“Fan ki shee ka, ‘Dǝ min ng shii Vitor maa ram ɗǝ wokghai maa ket, ng sham kaa tok mi ka fan mu rak.’

22“Pang dǝ mee, ɓan akori mee ka, ‘Wuran taan kǝrɓǝt mang kǝ ɓyak kuna kǝ yin ryak maa, kǝ yin ryak maa gobzang ta fan kwak myaa ɗaa wukuɓol kǝ yin ryak maa ta kuɓola. 23Kǝ yin wutaak kala mang kǝ ɓyak makghaa kaa fyang, koo rii, koo shii katla maa ɗoo ta. 24Tung ka fan min ni, mang kǝ kuu mee yaa pang por maa taa wom tǝkwak, Too mee yaa, pang a sok ma.’ Pang a shii lakng katla maa ɗoo.

25“Kaa ta kaɓan pang fan mee muɗǝng ki kǝng ɗǝnaa. Kǝ taa gang pyet ɗǝ lok pang yir kaa wuna gǝngang kaa shaa nɗur. 26Pang tok gaat ta kǝshii maa koring lok kyaa, pang yiɓǝn ma awung kaa shaaki ta lok kyaa. 27Pang kori ki ɓan ma ka, zǝǝ mu ni por tari, ‘Pang dǝ yin, fyang banji kala mang kǝ ɓyak makghaa. Tung ka por taa lokghaa wommi ɗǝ shadna.’

28“Fan mee muɗǝng ki shii tura, pang van lǝraki kǝshii lokghaa, pang dǝ mee wari pang naa kwarshii ma, ka kǝ lǝr lokghaa. 29Nzup ɗǝ kaɓan pal dǝ mee ta ka, ‘Ɓee! Nzup maa yee ryaa ng ɗǝ bungaa ku maa, kan kee kori muri, ng ɗǝ vana shaa maa wung kǝ a ruɗaki kǝng shii rak, nzup ɗǝ kaɓan a nam mi koo fan fwolaa ka kǝng fyang kǝng tok amar min kaa taa koo rii ɗǝ yen nak. 30Nzup ɗǝ kaɓan kǝ fan muri tari, mang kǝ wun sokghaa mu shii maa ayii fuu ya por lokghaa, a fyang maa kala mang kǝ ɓyak makghaa!’

31“Pang dǝ mee pal ma ta ka, ‘Fan min, nzup maa vii wo ɗǝ wok, nzup awung kǝng ɗǝ mee mamu ni. 32Kun kǝ wo shii katla ma ɗoo ɗǝ shiishala tung zǝǝ muri kǝ kuu mee yaa, zheri por taa yaa wommi tǝkwak, too mee yaa, pang zheri a sok ma yaa.’”