Luke 16

Agara shiin Mushori maa Kori kǝng Shaa Ɓet

1Yesu ɓan angaa byaa mee ka, “Sum yen ta kǝng ɗǝ sokghaa, kǝng ɗǝ mung kǝ ˈyaa yis maa awuu kwak mee. Vii yena na mu sokghaa ki yir ka, sum ki ng ɗǝ yarsa maa awuu sokghaa mee. 2Pang tok sum ki, shee yiɓǝn ma ka, ‘Yani pang ng yiraki ta shii mwaa kan paa? Na mi yokgha ta shiin awuu kwak min mang kǝng ˈyii ku ta, tung ka a yaa nakghaa mushori maa kori min tǝkwak ta rak.’

3“Mushori maa kori ki ɓan shii mee ka, ‘Yani pang ng shaa paa? Meen ni, mulok min puna mi ta ˈyaan yis maa awuu kwak mee ya. Ng ɗǝ shadnang kǝng shaa ɗǝn nak, ng yira nɗoon kwarsa maa awuu. 4Ng yok awung kǝng shaak, mang kǝ ryakghaa kaa sum yalan mi ta lok yena, ng ɗǝn min ni kǝd tii.’

5“Shee tok nzup maa angaa kǝ mulok mee byaa yen awuna gaat gaat, pang yiɓǝn mang kǝ gaat ki ka, ‘Mak ni pang mulok min ng byaa ku paa?’

6“Ɓan ma ka, ‘Dudurn kaman noo nggagham nanas (800).’

“Pang mushori maa kori ki ɓan sum ki ka, ‘Cir pwarin min mu kaa warang ta afang mwaa nyee ka, nggagham nangs (400).’

7“Yiɓǝn kǝmɓaa ki ka, ‘Mak ni pang mulok min ng byaa ku paa?’

“Pang sum ki pal ma ta ka, ‘Yom zher zari gaat (1,000).’

“Shee mushori maa kori ki ɓan ma ka, ‘Cir pwarin min mu kaa warang zher nggagham nanas (800).’

8“Pang mulok mushori maa kori, mu ɓet ki, mak ma tung sakgaɗan kǝ shii. Kaɓan ni pang angaan maa yisan ɓari, a ɓyak angaa byaan Vitor sakghaɗa ɗǝ shaa maa awuna yen. 9Ng ɓana yin, kapsan sokghaa yin asum maa tung kǝ yin sok amar ta, tung ka ng sokghaa yin ni kǝd, a yala yin ta lokng mang ɓetki ɓetkyaa.

10“Nzup mung kǝ a shama ˈyaa shii ta myaa shii maa awuu njot ɗaa rak, a shama ˈyaa shii ta myaa shii maa awuu damai yaa rak. Nzup mung kǝng shaa ram shiin maa awuu njot ɗaa, kaɓan ni pang shaa ram shiin maa awung kǝng damai yaa. 11Ng pang wani shama wura awuna maa par kun kun nak, nani naa ku wuran awuna mang toor paa? 12Ng pang wani wura awen mang muɗakghai kun kun nak, nani naa ku awuu shii mu paa?

13“Kori gaat sham kǝ bung angaa lok mɓaa maa rak. Ng mee ni shee ka shaa kaɓan, vana gaat ta kǝshii yena kǝ rud gaat ki, koo kǝ rud gaat ki kǝ ryak gaɗi ki tǝsak rak. Yin shama byaa Vitor ɗǝ ruɗan pyar tǝkwak rak.”

Yesu Shee nung ɗaa Farisi

(Mat 11.12-13; Mar 5.31-32)

14Afarisi kǝ a ɗaa angaa ruɗan pyar ni, ɗǝ yiran nung kǝ Yesu sheeri, shee a shiishal ma. 15Pang ɓan yen ka, “Yin ni kǝ yin zhakghaa shii yin yis maa suma ka yin ɗaa angaa ram ni rak, nzup ɗǝ kaɓan Vitor yok aɗoo yin. Awung kaa ɓyak makghaa ma kǝshii maa suma, ng ɗaa awung nyang ni nggen Vitor.

16“Kaa pang taang Yohana mu bonza, shiiring Musa ɗaa warangaa maa angaa fwaa nung Vitor ni pang asum mee byaaki, kǝ Yohana mu bonza tari a riinggena ɗǝ ɓana asum nung zar shiin tǝruun Vitora, pang koo nani paa ng yaraki ka kǝ lǝri ta mang shadna. 17Ng ɗaa wuu ɗakghaa ni rak, kǝ Toor ɗǝ apar kǝd, nzup ɗǝ kaɓan ng ɗaa wuu ɗakghaa ni kǝ warangaa njot ta kǝshii shiiring Vitor twaak.

Kabsana ɗǝ Yii ɗǝ Yalan ɗakghai

(Mat 19.1-12; Mar 10.1-12)

18“Nzup mung kǝ fuyang yii mee pang yal ɗakghai ta ng shaa tǝfuu ni, sum ni yal yiin kaa fuyangaa ng shaa tǝfuu ni ket.”

Mu Sokghaa ɗǝ Lyazaru

19Pang Yesu shee agara mari ka, “Sum yen ta kǝng mu sokghaa ni ng ɗǝ ryaksa akǝrɓǝtng ɓeeli mang pyar, mang kǝshii ki kal, ng shaa ɗaan wusungaa ng ryaa awura zar nzup maa vii. 20Mu shoor yen ta kǝ tǝsak mee ka Lyazaru, akulur ta rii maa yaa. Asum taa ˈyii maa ta nggen karkǝshiin lok mu pyar kyaa. 21Lyazaru ki ruɗaki kǝ rii awung kǝng piraki ndaa ta kwak mu sokghaa kyaa. Koo afuu maa a ɗǝ taa lamsa akulur Lyazaru ki.

22“Yisa shii, shee mu shoor ki taa kuu, pang awan tokghaan zarng Vitor taa cir ma wunak ma nggǝrng Ibrahima. Mu sokghaa ki kuu ket pang a luu ma. 23Nak aran kǝ angaa kuusa toksaki ta, kǝng taa bungaa kyaa, cir yis mee gakghaa pang ɓee Ibrahim yang, kǝ Lyazaru ta nggǝr myaa. 24Shee tok ma, ‘Dǝ min Ibrahim, ɓee shoor min kaa ton Lyazaru kǝ ryak fan kwak mee kǝshii mina kǝ shiishiin maa tǝlǝm min ta, tung ka ng ta bungaa kyaa ɗǝng, kǝshii ghǝlǝp rwaa ryaa.’

25“Nzup ɗǝ kaɓan Ibrahim pal ma ta ka, ‘Fan min, kaa rikǝn ɗaa yisan ka mee wom kaa mee yira wusungaa mu, ng kǝ Lyazaru mee bungaaki, nzup ɗǝ kaɓan zheri ng ta yira wusungaa, wokghai a ta bungaa kyaa. 26Kǝshiin nzup maa maryaa, ta tǝɗoo waraa ɗǝ yin banji kung ta sor sor, tung ka angaa kaa ruɗaki ka kaa nanzu ta waraa tii kaa nak ta yinaa kaa sham naaki rak, koo kǝ muɗakghai sham nyari tang kǝ taa ta waraa rak.’

27“Pang mu sokghaa ki shee ka, ‘Ng kwarsa ku dǝ min, kaa foo Lyazaru kǝ nak lokng dǝ mina, 28tung ka ng ɗaa zaa min kwen. Mang kǝng ruɗaki ka, kǝ naa nap yen maa kutu, tung ka kaa taa ta ara bungaa ryaa rak.’

29“Ibrahim palta ka, ‘Azaa mu a ɗǝ Musa ɗaa angaa fwan nung Vitor, kaa yir yen.’”

30Pang mu sokghaa ki shee ka, “O oi, dǝ min Ibrahim, ng mban en sham nak. Ng muɗakghai ni wuu war ta angaa kuusa kǝ nak ta yenaa a kala shaa maa ram yen.”

31“Shee ɓan ma ka, ‘Ng ayen ni yir Musa ɗaa angaa fwan nung Vitor rak, koo muɗakghai ni nanzu ta angaa kuusa a yira ma rak.’”