Luke 21

Naan Pyarng Yiiɗok Lokng Vitora

(Mar 12.41-44)

1Yesu cir yis pang ɓee angaa maa awuu kwak kaa fura pyar kǝshii gurokng yalan pyar lok Vitor. 2Pang ɓee yiiɗok yen Kǝng ɗǝ shoor taa fur ketlin pyar mɓaa ta kǝshii gurok kyaa ket. 3Pang shee ka, “Kǝ duk dukghaa, ng ɓana yin, yiiɗok mu shoor ri fur pyar kǝ ɓyak shiila maa dǝs maa sumyai nzup. 4Nzup yen a na ta kǝshiin maa awung kwak kaa ɗǝ mee pang a furaki ta, nzup ɗǝ kaɓan yiiɗok ki ta kǝshii shoor myaa ni pang foo masalang pyarng kǝng ˈyaa shii ta nzup.”

5Kǝ a dǝs maa angaa byaa mee ta sheen nungaa ta shiin lokng Vitor kyaa, tung ɓyaan kunan kǝshii ki ng kaa kasa maa ɗaa awan tǝtar nyendal ɗǝ awung kaa naa Vitor, pang Yesu shee ka, 6“Awuna maryai kǝ yin ɓee ri, ayisa ta taa kyaa mang kǝ atǝtar ryaa kǝ yin ɓyaaki ri ɗakghai nakghaa shiin ɗakghai yaa rak. A rumza yen fura ndaa nzup.”

7Shee a yiɓǝn ma ka, “Mu maksa, awuna mari shaa naskǝ yeni paa? Yeni zhakghaa war ka awuna mari shii yaa pyet shaaki paa?”

8Pang shee ka, “Ɗǝrang, kǝ muɗakghai dukshii yin nak. Asum pyak taak kǝshiin tǝsak min, kaa sheeki ka, ‘Mani Kǝristi! Ayisa ki shii yaa!’ Kǝ yin bii yen nak. 9Ng yin ni yir nung rom ɗǝ awung nanzwa maa ɗoo mari mari, kǝ yin shii wop rak, tung ka awuna mari shee ayen ni shii yen kaa pang, nzup ɗǝ kaɓan masala maa par ki taa nyee rak.”

10Pang ɓan yen ka, ndar ɗǝ ndar a shaa rom ɗaa ɗakghai, tǝruu ɗǝ tǝruu a shaa rom ɗaa ɗakghai. 11A shaa banji zhigǝɗang ndar, a shaa ɗama taa ndaraa ɗaa vishii maa wamnak ta araa mari mari. Pang a ɓyaa amaksar maa awung wop ɗaa awuu shiisan ndus waraa toora.

12Nzup ɗǝ kaɓan kaapang kaa awuna maryaa nanzwak, a mokghaa yin kaa ryak yin kǝshii bungaa. Awura naa yin toor ta ara shamang shii maa Yahudwaa, kaa mok yin kaa ton yin jaaruma, a wura naa yin nggen maa ruu ya ɗaa angaa wuran ndar, a shaa yin maa awuu mari tung ka yin ɗaa angaa byaa min ni. 13Mari ni nakghaa yin maa gwarshii kǝ yin ɓaa yen nung zar ta. 14Kǝ pis yin ɗaa awun kǝ yin naa shee tung ka kǝ yin ɓwak shii yin nak. 15Makghai ng naa yin nung ɗǝ sakghaɗa ɗaa awung kǝ yin shee, mang kǝ gaat ta kǝshii maa angaa vana yin shama shee ka yin shee ta giri kyaa ni rak. 16Adaa yin ɗaa tǝɗong yin ɗaa zaa yin ɗaa mar yin a cira yin ryapɓak, a dǝs yin a ɓora yen kaa kuushii. 17Nzup maa sum vana yin tung min. 18Nzup ɗǝ kaɓan tǝkoɓin shii yin gaat twaa rak. 19Ng yin ni Shambal gǝng yin ɓwakghaa shii yin.

Yesu shee Rumzan Urushalimaa

(Mat 24.15-21; Mar 13.14-19)

20Ng yin ɓee Urushalimaa kaa fuu ma pok gilǝng maa yaa, kǝ yin yok ka nakghaa ta rak kaa rumji ma. 21Tung kaɓan angaan kaa kǝshii Yahudiya kaa somshii turi agenakghaa, angaan kaa ta kǝshii ndar kyaa kaa warshii, angaan kaa ɓwak war kala ndar ki yaa kaa por tari ka kaa yen lǝri rak. 22Tung ka mari ni ayisang bungaa tung ka kaa shiil nzup maa awung kaa warang. 23Ayiin kaa ɗaa wan teeli ɗaa mang kaa ɗaa awan dǝbaryaa awuu visa ni ta yena ta ayisa kyaa! A shaa banji awuu bungaa kǝ sokghaa ndar ri, turan Vitor jira ta shii maa angaa kyaa. 24A ɓora a dǝshaa ta romaa, kaa mok a dǝs yen kaa wunak yen tǝkori taa ndara mari mari. Angaan kaa ɗaa Yahudu ni rak a butukghaa Urushalimaa ɗǝ kuɓol, shee ayisang kǝ Vitor kom yen maa ka, kaa shii tǝruu ni kǝd.

Tarang Fan Sum

(Mat 24.29-31; Mar 13.24-27)

25“A shaa awuu wop ta vyaa ɗǝ pee ɗaa mar. Angaa maa par a daamak tung wopng fwan nung ɗǝ sǝran min banji kuɓor. 26Asum tung wop a pira ndaa kan kee a kuushii yaa ni, ng kaa shakghaa awuu wop kǝ sokghaa apar, tung ka awun kaa katlaki ta toor kurokghaa a zhigǝɗa yen. 27Pang ta ayisa kyaa a ɓyaa Fan Sum taaki kǝshii gurgushaa ɗǝ shadna ɗǝ banji makghaa. 28Ng nzup maa wuna mari ni kap Nanzwaki, nanzwan kǝ yin cir shii yin gakghaa, tung ka viing kǝ Vitor pora yala yin taa gangaa pyet.”

29Shee ɓan yen agara mari shee ka: “Ɓyaan kǝtǝr kooni ɗaa nzup maa kǝtǝr. 30Ng ayen ni tǝɓǝl, yini ɗǝ shii yin, yin ɗǝ ɓyaaki kǝ yin shee ka tǝkos shii yaa pyet. 31Tung kaɓan, ng yin ni ɓee awuna mari Nanzwaki, kǝ yin yok ka tǝruun Vitor nakghaa pyet ket.

32“Ng ɓana yin, kǝduk-dukghaa, angaa yisan ɓari a kuusa nzup rak, shee nzup maa wun maryaa ni shii pang. 33Toor ɗǝ apar laksak, nzup ɗǝ kaɓan awung kǝng shee laksa rak.

Ɗaan Ɗǝ Ɗǝra

34“Ɗǝran, kǝ yin rikǝn shiin ryaa ɗǝ swaa maa awun kǝ wuna yin koo pisaki shiii fedna yina rak, ng yin ni shiii kaɓan, vii taan Fan Sum taa sokghaa yin ɗǝ yokgha yin nak kee tarko ri. 35Vii ki taa ta shiin nzup maa angaa maa apar ryaa. 36Tung kaɓan kǝ yin ɗa ɗǝ nɗǝra nzup maa vii, kǝ yin ɗǝ kǝ kwarsa Vitor, tung ka awung kǝ ta nanzwak kǝ sok yin nak, tung kǝ yin sok Shambal nggen Fan Sum ma ta.”

37Yesu ɗǝ maksaki nzup maa vii kǝshii lokng Vitor, ɗǝ kǝryakghan ng ɗǝ naa ɗaaki shii agenakng Zetun. 38Ɗǝ pee kanas nzup maa sum ɗǝ naaki kǝshii lokng Vitor, tung ka kaa naa yir awung kǝng maksaki.