Mark 1
Yoni Tobafitaiso Yesu yana ela faꞋina givenuwaꞋata.
Madiu 3:1-12 Luke 3:1-18 Yoni 1:19-28
1VenuwaꞋata Yamumuna Yesu Keliso Yaubada Natuna faꞋina hidede amine. 2Tuwai-moꞋena Yaubada bonana ana toꞋawatalatalaina ana egana Aiseya gahe saꞋeyana giꞋetoladina. Yaubada yana gahe Natuna againe giꞋetoladina gigayo,UꞋita, hida yaku tovenuwaꞋata.
Bana ganaꞋiveninisena be wai ginanagona,
ya eda kaliva aseꞋasediya ginakidewedewena.
Kaliva agona hinanogalina
walaꞋaiya ginakovakovadadana ginagayo,
Kaiwabu yana eda wanavetauna,
yana eda aseꞋasemiya wanaꞋihagihagiyena.
Hidedemi Aiseya gigahe.
4Ada gavaimi tuwai-moꞋena Aiseya gigaheye-vagahina, medemi gilakayemu velemoꞋena. FaꞋina Yoni walaꞋaiya yana ivemogatala gilakayemu gilulumamala gigayo, “Yami dewa koyona wanavenikohiyena be wanahagavilami-yo wanabafitaiso be Yaubada yami koyona ginayawelina.” Hidedemi Yoni gilulumamala. 5Kaliva moyaꞋaidi Yudiya ana fafali kadu Yelusalema againe hitauya be hina Yoni yana laumamala hinanogalina. Yadi dewa koyona hiyau-yo gufa ana egana Yolidani againe gikivebafitaisoyedi. 6Bana Yoni ma yana miyami kaliva koyokoyo-Ꞌavana amine. Aikeva kameli utuutuna againe hiyogona-ma giꞋosena ada gaiyona bulumakau kwafiline hiyogona ma goline gihifona. Ada anaga ma koloma kadu maꞋawa gufadi amine. 7Ada gilulumamala gigayo, “Iya wai ganagona tu kaliva saꞋeyana wai ginamulina-ma gifaiwalahegeku. Bana kikaiwabu-moꞋena tu iya kwamana kabisoku faꞋina, keke akufaiweya Bana againe ganaveꞋagetoga be ganaꞋaiboꞋula-yo ana ageyafayafa adi abaꞋaiyauga ganayauni. 8Iya gufa againe gakivebafitaisoyemi tu BanaꞋe ma AluꞋaluwa Mahalina againe ginakivebafitaisoyemi be ginavemagami.” Hidedemi Yoni gilulumamala. a
Yesu gibafitaiso tu Setani giꞋaladibidibiyena.
Madiu 3:13-17, 4:1-11 Luke 3:21-22, 4:1-13
9Himiyami tu Yesu Nasaledi Galili ana fafaliya gitauya be Yoni againe giꞋela, ada Yoni Yolidani againe gikivebafitaisoyena. 10Ada Yesu gibafitaiso gihavaina, gufeya giꞋaꞋalakahini tu auheꞋama lobama giꞋayavalini-yo Yaubada AluꞋaluwana ana ita vaita bunebune amine Bana againe gihobuꞋela ma giꞋitana. 11Ada Yaubada agona lobameya gikova gigayo, “OꞋeni natuꞋaseꞋaseku, nuwaku ukiveyamumu-moꞋena.”12Yesu Yolidani againe gibafitaiso tu auheꞋama AluꞋaluwa Mahalina babigaga againe giwavina. 13Ada aiyeta foti agaidiya babigaga againe gimiyami tu Setani giꞋalaꞋaladibidibiyena. Ada kevakeva walawalaꞋa hinafadiya gimiyami keke tamo kaliva tu lobama ana tovenuwaꞋata hiꞋela hiꞋitaveꞋavina. b
Yesu tobayauma gikovadi be hinavetomuliya.
Madiu 4:12-22 Luke 5:1-11
14Tu Yesu Yoni valeyana ginogalina higa deliya hisena. Ada hidedemi ginogalini-yo gilowoga fafali ana egana Galili againe gina be Yaubada yana VenuwaꞋata Yamumuna gilulumamalena gigayo, “Yaubada yana aituha a gilakayemu. Tova kabisona kaliva yana itaveꞋavina againe hinamiyami be aseꞋasediya ginavehivehimeya. Au yami dewa koyona wanavenikohiyeni-yo wanahagavilami be VenuwaꞋata Yamumuna wanavetumaganena.” Hidedemi Yesu gilulumamala.16Tova saꞋeyana Yesu tobu ana egana Galili ana taliyeya ginauna tu Saimoni kadu taina Anidulu giꞋitadi. Alevatu hisesehobuyeni tu giꞋitadi faꞋina badi tobayauma. 17Ada Yesu gigahedi gigayo, “WaꞋela wanamuliyeku be kaliva adi bayauma ganavehawalemi.” 18Ada auheꞋama kaliva adiꞋiselu yadi alevatu hisehobuye-vagahini tu himuliyena.
19Kadu ginauna tu matalaviseya Yemesa wataina Yoni Sebedi natuneyao giꞋitadi, wakeya hihiyoto yadi alevatu giꞋakaninina-ma hikikidewedewena. 20Ada auheꞋama gikovadi be hinamuliyena. Au tamadi Sebedi yana tofaisewa buye wakeya himiyami-ma hinuyabuyabudi be Yesu himuliyena. c
Yesu kaliva wayafunena gikiveyamumuna.
Luke 4:31-37
21Hinauna tu Kafeneumi againe hiyemu. Ada sabati againe Yesu manuwa-abavehawala ana egana sinagogi againe giluku givebutu givehawala. 22Ada yoꞋo yana vehawala faꞋina hiyaulowoga higayo, “Keke Mosese yana vehimeya ana tovehawala amine gidavehawala, au vaita tovehimeya velemoꞋena amine givehavehawala, yana vehawala aseꞋaseda giꞋonana.” 23Higahegahe tu kaliva wayafunena yadi sinagogi againe giluku gikovaꞋawafatafata gigayo, “Yesu kwanaNasaledi gavadi ime agaimeya unagani-yo uꞋela? KaꞋi O uꞋela be ime yafune ama loi unamunuma-yo anabwavi? O ya inuba gahalamanena. OꞋeni Yaubada yana Kaliva Mahamahali.”25Tu Yesu yafune gihawatana gigayo, “GiꞋalove. Una, kaliva unuyabuyabuni.” 26Yafune kaliva gikivefavefanina toyogina gitatawayana-yo ginuyabuyabuna.
27Kaliva moyaꞋaidi hiꞋita-yo hiyaulowoga-moꞋa buye hiveꞋagahegahe higayo, “Hida hima gavaꞋana? Yana vehawala tuli-moꞋena kadu ana wavehimeya. Yafune nonogana hida kaliva gihawatadi-ma bonana hiꞋabina.” 28Ada au Yesu valeyana Galili ana fafali matatabuna againe giveꞋaliyahega. d
Yesu toꞋaulolo moyaꞋaidi gisiveyawadi.
Madiu 8:14-17 Luke 4:38-41
29Tu Yesu manuwa-abavehawala againe gihobu-yo gina Saimoni Anidulu yadi manuweya. Ada Yemesa Yoni badi buye hina manuweya hiluku. 30Saimoni lawana adi iviya hidauda wowodi vaita ai, ada badi faꞋidiya Yesu himaduvenuwaꞋatana. 31Au gina giꞋitadi nimadiya giꞋabi be gisivemidididi. Wowodi auheꞋama gituluna ada hivebutu adi wakawaka adiga hikidewedewena.32Mala gibogi kauwana giholu-yo kaliva yadi toꞋaulolo moyaꞋaidi kadu wayafunediyao Yesu againe hiꞋaliyedi. 33Melala ana kaliva moyaꞋaidi Saimoni yana edaꞋawaneya hivagaꞋauta-Ꞌowoga, ada Yesu toꞋaulolo moyaꞋaidi yadi aulolo tulina tulina ma gisiveyawadi. Kadu yafune moyaꞋaidi kaliva hiluvaiyedi-ma giwavidi, ada yafune Bana inubana hihalamanena faꞋina gihawatadi be keke hinalukahihiyeni. e
Yesu Galili ana fafaliya gilulumamala.
Luke 4:42-44
35Tu aiyeta anavelu mala aimo keke gidalauni tu Yesu giꞋenohobu be gina melalagaga saꞋeyana againe giveꞋoveꞋoꞋola. 36Saimoni tobohiyaneyao buye hina hilelena ada hinuhagana againe higayo, “Kaliva moyaꞋaidi O hilelele.”38Yesu gigayo, “WaꞋela be kana mali melaleya be kadu badi agaidiya ganalulumamala. Hidema faꞋina gahobuꞋela.” 39Ada au Galili ana melala moyaꞋaina agaidiya ginunuwaliliuga, yadi manuwa-abavehawala agaidiya gilulumamala, adi yafune giwaviwavidi. f
Yesu tovedawodawowo gikiveyamumuna.
Madiu 8:1-4 Luke 5:12-16
40Tu tovedawodawowo saꞋeyana giꞋela Yesu againe tugana giveꞋetodonena be gihawayafeyafena gigayo, “KaꞋi nuwanuwa digo, afaiweya unakiveyamumuku.”41Gigahe-yo Yesu gihinekalikaliyena nimana gitunena kaliva giꞋabina gigayo, “Iya nuwanuwaku. Au unayamumu.” 42Ada auheꞋama ana dawodawowo gihavaina be giyamumu.
43Giyamumu tu Yesu gimaduꞋatuhegena ana hawata givelena gigayo, “Unogali. Keke tamo hakwadi unavenuwaꞋatani, au abaveyao ana tofaisewa againe unamaduna be wowo unavehawalena. Kadu ya yamumu faꞋina manuga luhei ada sifi, higa abaveyao Mosese boi tuwai-moꞋena givehimeyena amine ma unanauwedi be moyaꞋaidi o uyamumu velemoꞋena ma hinahalamanena.”
45Atu kaliva gilowoga be gina yana yamumu valeyana givebutu kaliva moyaꞋaidi agaidiya gilukahihiyena, ada au valeyana ginauna. MoyaꞋaidi hiyoꞋoyoꞋo faꞋina, Yesu keke anafaiweya melaleya ginaluku kaliva matadiya. Au melalagaga agaidiya gimiyami. Atu kaliva melala tulina tulina agaidiya hitauya be Yesu againe hiyoꞋo. g
Copyright information for
VIV